ຕອນຄໍ່າ ວັນທີ 25 ກໍລະກົດ 2024ທີ່ ໂຮງແຮມລາວພລາຊາ ໄດ້ມີພິທີສະເຫຼີມສະຫຼອງວັນສ້າງຕັ້ງສາຍພົວພັນການທູດ ລາວ-ການາດາ ຄົບຮອບ 50 ປີ ເຊິ່ງ ສປປ ລາວ ແລະ ການາດາ ໄດ້ສ້າງຕັ້ງສາຍພົວພັນການທູດນຳກັນ ໃນວັນທີ 15 ມິຖຸນາ 1974 ແລະ ວັນຊາດການາດາ ຄົບຮອບ 157 ປີ (01 ກໍລະກົດ 1867-01 ກໍລະກົດ 2024) ພ້ອມທັງ ສະເຫຼີມສະຫຼອງການເປັນປະເທດປະສານງານ ອາຊຽນ-ການາດາ ຂອງ ສປປ ລາວ ຈັດໂດຍ ທ່ານ ນາງ ປິ່ງ ກິດນິກອນ, ເອກອັກຄະລັດຖະທູດການາດາ ປະຈຳ ສປປ ລາວ ທີ່ມີສໍານັກງານຕັ້ງຢູ່ ບາງກອກ. ໃນພິທີດັ່ງກ່າວໃຫ້ກຽດເຂົ້້າຮ່ວມໂດຍ ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດໃນນາມຕາງໜ້າລັດຖະບານ ແຫ່ງ ສປປ ລາວ ແລະ ທ່ານ ນາງ MélanieJoly, ລັດຖະມົນຕີຕ່າງປະເທດຕາງໜ້າລັດຖະບານການາດາ ໃນໂອກາດທີ່ທ່ານເດີນທາງມາເຂົ້າຮ່ວມກອງປະຊຸມລັດຖະມົນຕີຕ່າງປະເທດ ອາຊຽນ ຄັ້ງທີ 57(AMM), ແລະ ກອງປະຊຸມປິ່ນອ້ອມຕ່າງໆ, ໂດຍມີບັນດາລັດຖະມົນຕີ, ຮອງລັດຖະມົນຕີ ແລະ ເຈົ້າໜ້າທີ່ຈາກຂະແໜງການຕ່າງໆຂອງ ສປປ ລາວ ແລະ ບັນດາທູຕານຸທູດປະເທດຕ່າງໆ ປະຈໍາ ສປປ ລາວເຂົ້້າຮ່ວມ.
ໃນໂອກາດນີ້, ທ່ານ ສະເຫຼີມໄຊ ກົມມະສິດ ຮ່ວມກັບ ທ່ານ ນາງ MélanieJolyແລະ ທ່ານເອກອັກຄະລັດຖະທູດການາດາ ປະຈຳ ສປປ ລາວ ໄດ້ກ່າວສະແດງຊົມເຊີຍ ແລະ ຕີລາຄາສູງຕໍ່ຜົນສຳເລັດການພົວພັນຮ່ວມມືອັນດີ ລະຫວ່າງ ສປປ ລາວ ແລະ ການາດາຕະຫຼອດໄລຍະ5 ທົດສະວັດ ທີ່ຜ່ານມາ ໂດຍສະເພາະສອງຝ່າຍໄດ້ມີການຮ່ວມມືໃນຫຼາຍຂົງເຂດ ເປັນຕົ້ນວຽກງານເກັບກູ້ລະເບີດທີ່ບໍ່ທັນແຕກ, ການສຶກສາ, ສາທາລະນະສຸກ, ມູນຄ່າການຄ້າ ລະຫວ່າງສອງປະເທດ ໄລຍະປີ 2019-2023 ສາມາດບັນລຸໄດ້ 141,486,316 ໂດລາສະຫະລັດ; ການາດາ ຍັງໄດ້ມາລົງທຶນ ໃນຂະແໜງຄ້າຂາຍຍົກ-ຄ້າຂາຍຍ່ອຍ, ສ້ອມແປງລົດຍົນ-ລົດຈັກ, ອຸດສາຫະກໍາປຸງແຕ່ງ, ກະສິກໍາ-ປ່າໄມ້, ການປະມົງ ແລະ ອື່ນໆ. ນອກຈາກນັ້ນ, ລາວ ແລະ ການາດາ ຍັງໄດ້ຮ່ວມມືພາຍໃຕ້ຂອບອາຊຽນ ໂດຍການາດາ ໄດ້ສະໜັບສະໜູນວຽກງານ ITແກ່ ສປປ ລາວ ໃນໄລຍະກອງປະຊຸມອາຊຽນ 2024. ນອກນີ້, ສປປ ລາວຍັງເຮັດໜ້າທີ່ເປັນປະເທດປະສານງານ ອາຊຽນ-ການາດາ ເປັນເວລາ 3 ປີ ເລີ່ມແຕ່ເດືອນກໍລະກົດ 2024 ເຖິງປີ 2027.
ພິທີສະເຫຼີມສະຫຼອງດັ່ງກ່າວ ໄດ້ເປັນນິມິດໝາຍອັນດີໃຫ້ແກ່ການເສີມຂະຫຍາຍການພົວພັນຮ່ວມມືທີ່ນັບມື້ນັບເພີ່ມຂຶ້ນ ແລະ ເປັນທິດທາງສໍາລັບການຮ່ວມມືໃນຕໍ່ໜ້າ ລະຫວ່າງ ສອງປະເທດ ລາວ ແລະ ການາດາ.
