ພິທີສະເຫຼີມສະຫຼອງວັນສ້າງຕັ້ງເຫຼົ່າຮົບປືນໃຫຍ່ໜ້າດິນ ຄົບ ຮອບ 70 ປີ (15 ທັນວາ 1954-15 ທັນວາ 2024) ແລະ ຍ້ອງຍໍຜົນງານ ຂອງກົມກອງລວມໝູ່ທົ່ວເຫຼົ່າຮົບປືນໃຫຍ່ໜ້າດິນ ໄດ້ຈັດຂຶ້ນໃນວັນທີ 13 ທັນວາ 2024 ນີ້, ຢູ່ທີ່ ສະໂມສອນ ກອງພັນໃຫຍ່ 605, ໂດຍການເປັນປະທານ ຂອງສະຫາຍ ພົນຕີ ປະສິດ ທ່ຽງທໍາ ກໍາມະການຄະນະປະຈໍາພັກກະຊວງ, ຮອງລັດຖະ ມົນຕີກະຊວງປ້ອງກັນປະເທດ.
ສະຫາຍ ພົນຈັດຕະວາ ວົງແກ້ວ ວົງພິລາ ກໍາມະການຄະນະ ພັກ ກົມໃຫຍ່ເສນາທິການກອງທັບ, ຫົວໜ້າກົມປືນໃຫຍ່ໜ້າດິນ ໄດ້ຜ່ານຄໍາສັ່ງປະຈໍາວັນ ຂອງກົມໃຫຍ່ເສນາທິການກອງທັບ ພ້ອມທັງຫວນຄືນມູນເຊື້ອ ຂອງເຫຼົ່າຮົບປືນໃຫຍ່ໜ້າດິນ ໂດຍຍົກໃຫ້ເຫັນປະຫວັດຄວາມເປັນມາ, ການເຕີບໃຫຍ່ຂະຫຍາຍຕົວແຕ່ລະໄລຍະ ເຫຼົ່າຮົບປືນໃຫຍ່ໜ້າດິນໄດ້ກຳເນີດຂຶ້ນຢູ່ເຂດທີ່ໝັ້ນການປະຕິວັດແຂວງຫົວພັນ ໃນວັນທີ 15 ທັນວາ 1954 ໃນໄລຍະຕໍ່ສູ້ປົດປ່ອຍຊາດ ຈາກກອງພັນໃຫຍ່ 605 ເຊິ່ງເປັນກົມກອງທໍາອິດປະກອບປືນຄົກ, ເດກາ, 12,7 ມມ ທີ່ຍຶດໄດ້ຈາກສັດ ຕູ, ບົນແປວໄຟແຫ່ງການຕໍ່ສູ້ຕ້ານຈັກກະພັດ ໄດ້ເຕີບໃຫ້ຂະຫຍາຍຕົວເປັນຫຼາຍກອງພັນ, ກອງຮ້ອຍເອກະລາດ ທີ່ປະ ກອບອາວຸດປືນໃຫຍ່ລາກແກ່, ຄົກ, ຈະຫຼວດຫຼາຍປະເພດບັນດາກົມກອງເຫຼົ່າຮົບປືນໃຫຍ່ ໄດ້ສູ້ຮົບຢ່າງພິລະອາດຫານ, ມີໄຫວພິກເອົາຊະນະສັດຕູ, ທົນທານໜຽວແໜ້ນບົນສະໜາມຮົບ ທັງສູ້ຮົບ ທັງປັບປຸງກໍ່ສ້າງກຳລັງ, ໄດ້ເຂົ້າຮ່ວມບັນດາບັ້ນຮົບໃຫຍ່ ແລະ ນ້ອຍ, ສາມາດສ້າງໄດ້ຜົນງານ ແລະ ວີລະກຳອັນແສນອົງ ອາດກ້າຫານ ເຊິ່ງໄດ້ກາຍເປັນມູນເຊື້ອອັນດີງາມໃຫ້ແກ່ພະນັກ ງານ-ນັກຮົບປືນໃຫຍ່ຕະຫຼອດມາ, ປະກອບສ່ວນເຂົ້າໃນການຍາດເອົາໄຊຊະນະ ແລະ ພາລະກິດປົດປ່ອຍປະເທດຊາດຢ່າງສົມບູນ ຕະຫຼອດໄລຍະປະຕິບັດສອງໜ້າທີ່ຍຸດທະສາດຄື: ປົກປັກຮັກສາ ແລະ ສ້າງສາພັດທະນາປະເທດຊາດ ພະນັກງານ-ນັກຮົບເຫຼົ່າຮົບປືນໃຫຍ່ໜ້າດິນ ໄດ້ສືບຕໍ່ຮັກສາ ແລະ ເສີມຂະຫຍາຍມູນເຊື້ອ ຂອງນັກປະຕິວັດຮຸ່ນກ່ອນຢ່າງບໍ່ຢຸດຢັ້ງ, ໄດ້ເຮັດວຽກງານປັບປຸງກໍ່ສ້າງກໍາລັງປືນໃຫຍ່ໃນທຸກດ້ານ ແລະ ມີການເຕີບໃຫ້ຂະຫຍາຍຕົວທາງດ້ານຄຸນນະພາບ ກໍຄືປະລິມານ ພ້ອມທັງ, ໄດ້ເຮັດໜ້າທີ່ສູ້ຮົບປົກປັກຮັກສາເຂດນໍ້າແດນດິນໃນທຸກໆ ບັ້ນຮົບ, ສໍາເລັດທຸກໜ້າທີ່ການເມືອງ ຂອງຕົນ ກໍຄື ຂອງຂັ້ນເທິງມອບໝາຍໃຫ້. ມາຮອດປັດຈຸບັນ ເຫຼົ່າຮົບປືນໃຫຍ່ໜ້າດິນ ແມ່ນກໍາລັງສູ້ຮົບ ແລະ ເປັນກຳລັງໄຟໜ້າຈຸດໜັກ ທີ່ມີບັນດາກອງພັນໃຫຍ່ເອກະ ລາດທີ່ຂຶ້ນກັບກະຊວງ, ມີບັນກອງພັນນ້ອຍປືນໃຫຍ່ທີ່ຂຶ້ນກັບກອງພົນ ແລະ ກອງ ບັນຊາການທະຫານແຂວງພ້ອມບັນດາກອງຮ້ອຍເອກະລາດຈໍານວນຫຼວງຫຼາຍທີ່ປະກອບອາວຸດຫຼາຍຊະນິດທັນສະໄໝ ມີຄວາມສາມາດເຮັດສໍາເລັດໜ້າທີ່ການເມືອງໄດ້ເປັນຢ່າງດີ. ຈາກນັ້ນ, ສະຫາຍ ພັນເອກ ຈັນທອນ ພັນທອງສອນ ຮອງຫົວໜ້າກົມນະໂຍບາຍ ກົມໃຫຍ່ການເມືອງກອງທັບ ໄດ້ຜ່ານຂໍ້ຕົກລົງ ຂອງກະຊວງປ້ອງກັນປະເທດ ວ່າດ້ວຍການປະດັບຫຼຽນໄຊ ແລະ ຍ້ອງຍໍຜົນງານ 70 ປີ ໃນນີ້, ປະດັບຫຼຽນໄຊພິລະອາດຫານ ຊັ້ນ I ມີ 3 ກົມກອງ,ປະດັບຫຼຽນໄຊພິລະອາດຫານ ຊັ້ນ II ມີ 16 ກົມກອງ ແລະ ປະດັບຫຼຽນໄຊພິລະອາດຫານ ຊັ້ນ III ມີ 20 ກົມກອງ.
ໂອກາດນີ້, ສະຫາຍ ພົນຕີ ປະສິດ ທ່ຽງທໍາ ໄດ້ສະແດງຄວາມຍ້ອງຍໍຊົມເຊີຍ ຕໍ່ບັນດາຜົນງານຂອງເຫຼົ່າຮົບປືນໃຫຍ່ໜ້າດິນ ຕະຫຼອດໄລຍະ 70 ປີ ຜ່ານມາ ພ້ອມທັງ ເນັ້ນໜັກບາງບັນຫາທີ່ສໍາຄັນ ສືບຕໍ່ສຸມໃສ່ຖືເອົາການສຶກສາອົບຮົມດ້ານການເມືອງ-ນໍາພາແນວຄິດເປັນກົກ ເພື່ອເຮັດໃຫ້ນາຍ ແລະ ພົນທະຫານ ມີຄວາມໜັກແໜ້ນ, ເຂັ້ມແຂງ, ມີລະບຽບວິໄນເຂັ້ມງວດ, ເອົາໃຈໃສ່ໃຫ້ບັນດາກົມກອງໄດ້ຈັດຕັ້ງອົບຮົມ-ຫັດແອບການເມືອງ, ການທະຫານ ມີຄວາມຊໍານິຊໍານານທາງດ້ານວິຊາສະເພາະ, ມີຄວາມ ຊໍານານໃນການໃຊ້ອາວຸດ-ກະສຸນ, ຫັດແອບຕາມແຜນການຂອງກົມກອງ, ເອົາໃຈໃສ່ປະຕິບັດ 7 ລະບອບ 18 ວຽກຢ່າງເປັນປົກ ກະຕິ, ເອົາໃຈໃສ່ວຽກງານກໍ່ສ້າງຮາກຖານການເມືອງ ໃນຂອບເຂດກົມກອງຮັບຜິດຊອບ ໂດຍສົມທົບ ກັບ ປກສ ບ້ານ, ນາຍບ້ານ ແລະ ກຸ່ມບ້ານ ເພື່ອສຶກສາອົບຮົມ ເຜີຍແຜ່ແນວທາງນະໂຍບາຍ ຂອງພັກ-ລັດ ໃຫ້ປະຊາຊົນ ມີຄວາມຮັບຮູ້ເຂົ້າໃຈ ແລະ ເປັນເຈົ້າ ການປົກປັກຮັກສາຄວາມສະຫງົບ ແລະ ຄວາມເປັນລະບຽບຮຽບ ຮ້ອຍຂອງສັງຄົມ.
ຂ່າວ: ສົມຄິດ ພູມມີຈິດ
