ວັນທີ 20 ກຸມພາ 2025, ທ່ານ ອາລຸນໄຊ ສູນນະລາດ ເຈົ້າແຂວງຈໍາປາສັກ ໄດ້ເຄື່ອນໄຫວຢ້ຽມຢາມສວນປ່າໄມ້ແປກ ໃນເຂດເທດສະບານເມືອງປາກຊ່ອງ.
ພາຍຫຼັງສໍາເລັດການເຄື່ອນໄຫວຢ້ຽມຢາມສວນດັ່ງກ່າວ, ເຈົ້າແຂວງຈໍາປາສັກ ໄດ້ມີທິດຊີ້ນໍາ ໂດຍມອບໃຫ້ຄະນະພັກ-ອົງການ ປົກຄອງເມືອງປາກຊ່ອງ ປະສານສົມທົບກັບພາກສ່ວນກ່ຽວຂ້ອງ ເພື່ອໃຫ້ກຳນົດຈຸດປ່າແປກ ເຂດເທດສະບານເມືອງ ເປັນສວນສາທາລະນະຂອງເມືອງ ໂດຍກໍານົດເຂົ້າໃນແຜນພັດທະນາເສດ ຖະກິດ -ສັງຄົມຂອງເມືອງ ແລະ ຄົ້ນຄວ້າຄືນດ້ານທີ່ຕັ້ງຂອງໂຮງ ຮຽນອະນຸບານ ເພື່ອຈັດສັນໃຫ້ເໝາະສົມ, ໃຫ້ຂື້ນແຜນສ້າງຮົ້ວອ້ອມ, ສ້າງທາງຍ່າງ, ຮັກສາຄວາມສະອາດສວຍງາມ, ສ້າງຫ້ອງນໍ້າສາທາລະນະ ພ້ອມທັງຂຽນປະຫວັດໂດຍຫຍໍ້ຂອງສວນສາທາ ລະນະດັ່ງກ່າວ ແລະ ປ້າຍ ຄໍາໂຄງຂອງເມືອງປາກຊ່ອງ ຕິດໄວ້ຢູ່ຈຸດດັ່ງກ່າວ.
ພ້ອມນີ້, ໄດ້ມອບໃຫ້ພະແນກໂຍທາທິການ ແລະ ຂົນສົ່ງ (ຍທຂ) ແຂວງເປັນໃຈກາງປະສານສົມທົບກັບບັນດາເມືອງ ເພື່ອສໍາຫຼວດ, ອອກແບບ ແລະ ວາງແຜນຜັງຕົວເມືອງ ໃຫ້ຖືກຕ້ອງຕາມມາດຕະຖານ, ເຕັກນິກ,ວິທະຍາສາດ, ເສດຖະກິດ-ສັງຄົມ, ວັດທະນະທໍາ ແລະ ການປົກປັກຮັກສາສິ່ງແວດລ້ອມ ລວມທັງການຄວບຄຸມການພັດທະນາຕົວເມືອງ ໃຫ້ສອດຄ່ອງກັບແຜນ ຜັງການພັດທະນາ. ພາຍຫລັງທີ່ສໍາເລັດການອອກແບບດັ່ງກ່າວແລ້ວ, ໃຫ້ນໍາສະເໜີອົງການປົກຄອງແຂວງ ເພື່ອພິຈາລະນາ ຮັບ ຮອງ ຕາມຂັ້ນຕອນ ແລະ ລະບຽບການ; ໃຫ້ພະແນກ ຍທຂ ແຂວງ ຮີບຮ້ອນກວດຄືນແຜນຜັງຂອງນະຄອນປາກເຊ ແລະ 9 ເມືອງກ່ຽວກັບການກຳນົດສວນສາທາລະນະແລ້ວລາຍງານທ່ານເຈົ້າແຂວງ ພາຍໃນ 10 ວັນລັດຖະການ.
ຂ່າວ: ທູນທອງໃຈ
