ສູນກາງສະຫະພັນແມ່ຍິງລາວ ຮ່ວມກັບ ອົງການກາແດງແຫ່ງຊາດລາວ ສ້າງຂະບວນການຮັບບໍລິຈາກເລືອດ ເພື່ອຊ່ວຍເຫລືອຄົນເຈັບທີ່ຕ້ອງການເລືອດຢູ່ໂຮງໝໍຕ່າງໆ ໃນຂອບເຂດທົ່ວປະເທດ ພາຍໃຕ້ຄຳຂວັນ “69 ປີ ມີໄຊ ໃຫ້ເລືອດ ໃຫ້ຊີວິດ” ໂອກາດສະເຫລີມສະຫລອງ ວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ ຄົບຮອບ 69 ປີ (20 ກໍລະກົດ 1955-20 ກໍລະກົດ 2024).
ທ່ານ ນາງ ສິນທະມາລາ ລານາວັນ ຄະນະບໍລິຫານງານ, ຫົວໜ້າກົມໂຄສະນາ-ວັດທະນະທຳ ສູນກາງສະຫະພັນແມ່ຍິງລາວ ໄດ້ກ່າວວ່າ: ການຈັດຂະບວນການຮັບບໍລິຈາກເລືອດ ຖືວ່າເປັນກິດຈະກຳໜຶ່ງ ທີ່ມີຄວາມສຳຄັນ ເພື່ອເປັນການສະເຫລີມສະຫລອງ ວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ ແລະ ເປັນການປະກອບສວ່ນຊຸກຍູ້ຕໍ່ວຽກງານມະນຸດສະທຳຂອງປະເທດ ໂດຍສະເພາະແມ່ນການບໍລິຈາກເລືອດ ເພື່ອຊ່ວຍຊີວິດຂອງເພື່ອນມະນຸດດ້ວຍກັນ, ເປັນການປະກອບສ່ວນຫລຸດຜ່ອນອັດຕາການຕາຍຂອງແມ່ ແລະ ອັດຕາການຕາຍຂອງເດັກ ເຊິ່ງເຫັນວ່າ ຢູ່ ສປປ ລາວ ອັດຕາການເສຍຊີວິດຂອງແມ່ຍິງຖືພາເກີດລູກ ຍັງມີຕົວເລກທີ່ສູງສົມຄວນ ເຊິ່ງມີຫລາຍກໍລະນີ ເປັນຕົ້ນ ມີອາການເລືອດໄຫລ ເຊິ່ງຈຳເປັນຕ້ອງໄດ້ໃສ່ເລືອດ. ການມີເລືອດສໍາຮອງ ຢູ່ໃນສະຖາບັນເລືອດແຫ່ງຊາດ, ສູນເລືອດແຂວງ ແລະ ບັນດາໜ່ວຍເກັບຮັກສາເລືອດຂັ້ນເມືອງ ແມ່ນມີຄວາມຈຳເປັນ ເພື່ອຕອບສະໜອງເລືອດທີ່ປອດໄພໃຫ້ແກ່ຄົນເຈັບເຫລົ່ານັ້ນໃຫ້ທັນເວລາ.
ທ່ານ ນາງ ສິນທະມາລາ ລານາວັນ ຍັງໄດ້ສະແດງຄວາມຮູ້ບຸນຄຸນ ແລະ ຍ້ອງຍໍຊົມເຊີຍ ການນໍາຂອງຄະນະສະຫະພັນແມ່ຍິງລາວທຸກຂັ້ນ ນັບແຕ່ສູນກາງຮອດທ້ອງຖິ່ນ ພ້ອມດ້ວຍອົງການຈັດຕັ້ງມະຫາຊົນ ທີ່ຈັດກິດຈະກຳຕ່າງໆ ເພື່ອເປັນການປູກຈິດສຳນຶກໃຫ້ແກ່ແມ່ຍິງລາວຮຸ່ນປັດຈຸບັນສືບຕໍ່ມູນ ເຊື້ອອັນດີງາມໃນຄວາມຮັກຊາດ, ຮັກບ້ານເກີດເມືອງນອນ ແລະ ຍອມເສຍສະລະສິດຜົນປະໂຫຍດສ່ວນຕົວຂອງຕົນ ເພື່ອປະເທດຊາດ, ດັ່ງຄຳຂວັນທີ່ໄດ້ລະບຸ“ 69 ປີ ມີໄຊ ໃຫ້ເລືອດ ໃຫ້ຊີວິດ”. ພ້ອມນີ້, ຍັງໄດ້ເຊີນຊວນທຸກທ່ານ ທີ່ມີເງື່ອນໄຂໃນການບໍລິຈາກເລືອດ ຈົ່ງໄດ້ປະກອບສວນຢ່າງແຂງແຮງໃນການເຂົ້າຮ່ວມຂະບວນການບໍລິຈາກເລືອດ ເພື່ອໃຫ້ມີເລືອດພຽງພໍ, ປອດໄພ ແລະ ຕອບສະໜອງໃຫ້ໄດ້ທັນເວລາ, ຈະບໍລິຈາກເລືອດໃນມື້ນີ້ ຫລື ໃນໂອກາດອື່ນໆ ຢ່າງຕໍ່ເນື່ອງ.
ຂ່າວ: ກິດຕາ
ພາບ: ສຳນານ
