ວັນທີ 29 ກໍລະກົດ 2024 ຄະນະກຳມະການຄຸ້ມຄອງໄພພິບັດ ຂັ້ນເມືອງຍົມມະລາດ ແຂວງຄໍາມ່ວນ ໂດຍມີທ່ານ ໜູທອງ ໄຊຍະລາດ ຄະນະປະຈຳພັກເມືອງ ປະທານແນວລາວ ສ້າງຊາດເມືອງ, ທ່ານ ນ້ຳໃຈ ອຸດສາ ຮອງເຈົ້າເມືອງ ພ້ອມດ້ວຍຄະນະ ໄດ້ລົງຕິດຕາມສະພາບຜົນກະທົບຈາກລົມພາຍຸໝູນເຂດຮ້ອນ ທີ່ກຸ່ມບ້ານນາບໍ່ຊຽງດາວ ແລະ ກຸ່ມບ້ານໄຮ່.
ເມືອງຍົມມະລາດໄດ້ຮັບຜົນກະທົບຈາກພະຍຸໝູນເຂດຮ້ອນ ຈາກຝົນຕົກໜັກຕິດຕໍ່ກັນຫຼາຍວັນ ເຊິ່ງໄດ້ເຮັດໃຫ້ຫຼາຍຈຸດຂອງເມືອງ ຖືກນໍ້າຖ້ວມຂັງ ແລະ ໄຫຼເຂົ້າຖ້ວມເນື້ອທີ່ທຳການຜະລິດຂອງປະຊາຊົນໃນແຕ່ລະເຂດເປັນຕົ້ນແມ່ນ: ກຸ່ມບ້ານນາບໍ່ຊຽງດາວ ແລະ ກຸ່ມບ້ານໄຮ່. ນໍ້າໄດ້ໄຫຼເຂົ້າຖ້ວມເນື້ອທີ່ນາປີ ແລະ ເສັ້ນທາງຄົມມະນາຄົມລະຫວ່າງບ້ານຕໍ່ບ້ານໄດ້ຮັບຜົນກະທົບ ໂດຍສະເພາະທາງເຂົ້າບ້ານທົ່ງກອງ ໄດ້ຖືກຕັດຂາດບໍ່ສາມາດສັນຈອນໄປມາໄດ້.
ປັດຈຸບັນ ລະດັບນໍ້າເຊບັ້ງໄຟ ແມ່ນຍັງມີທ່າອ່ຽງເພີ່ມຂຶ້ນໃກ້ຮອດເຂດເຕືອນໄພ. ຜ່ານການລົງຕິດຕາມກວດກາ ແລະ ໄດ້ປະ ເມີນເບື້ອງຕົ້ນ ເຫັນວ່າທົ່ວເມືອງຍົມມະລາດ ຖືກນໍ້າຖ້ວມນາປີ ຫຼາຍພໍສົມຄວນ ( ສ່ວນລາຍລະອຽດທາງຂະແໜງການທີ່ກ່ຽວຂ້ອງຍັງເກັບກຳຂໍ້ມູນ )
ທີ່ມາ: khammouane News
