ກອງປະຊຸມສຸດຍອດບຣິກສຄັ້ງທີ 16 ໄດ້ສິ້ນສຸດລົງແລ້ວ ໂດຍໄດ້ກຳນົດເອົາ13 ປະເທດຄູ່ເຈລະຈາບຣິກສໃນກອງປະຊຸມ ເຊິ່ງລວມທັງ 4 ປະເທດສະມາຊິກອາຊຽນ ຄື: ອິນໂດເນເຊຍ, ມາເລເຊຍ, ໄທ ແລະ ຫວຽດນາມ.
ໃນຊຸມປີຜ່ານມາ, ຄຽງຄູ່ກັບອາຊຽນ ແລະ ກົນໄກການຮ່ວມມືບຣິກສມີອິດທິພົນນັບມື້ນັບສູງຂຶ້ນ, ສອງຝ່າຍໄດ້ດຳເນີນການຮ່ວມມືແບບຕ່າງຝ່າຍຕ່າງໄດ້ຮັບຜົນປະໂຫຍດໃນຫຼາຍຂົງເຂດ ແລະ ຫຼາຍລະດັບ ໂດຍໄດ້ສ່ອງແສງໃຫ້ເຫັນເຖິງຄວາມສາມາດບົ່ມຊ້ອນດ້ານການຮ່ວມມືອັນມະຫາສານ. ຫຼາຍປະເທດສະມາຊິກອາຊຽນກໍໄດ້ສະແດງຄວາມປາຖະໜາທີ່ຈະເຂົ້າຮ່ວມກົນໄກການຮ່ວມມືບຣິກສຕາມໆ ກັນ.
ສະມາຊິກກົນໄກການຮ່ວມມືບຣິກສສ່ວນຫຼາຍມາຈາກທະວີບອາຊີ, ເອີຣົບ, ອາເມຣິກາ, ອາຟຣິກາ ແລະ ພາກພື້ນຕາເວັນອອກກາງ, ມີປະຊາກອນທັງໝົດປະມານ 3,5 ຕື້ຄົນ ເຊິ່ງກວມເອົາ 40% ຂຶ້ນໄປຂອງປະຊາກອນທົ່ວໂລກ, ມີຕະຫຼາດຂະໜາດໃຫຍ່ພິເສດ, ຍອດມູນຄ່າການຄ້າໄດ້ກວມ 25% ຂອງການຄ້າທົ່ວໂລກ. ນອກນີ້, ປະເທດສະມາຊິກບຣິກສຍັງໄດ້ຮ່ວມກັນຊຸກຍູ້ການພັດທະນາເສດຖະກິດ ແລະ ການຮ່ວມມືພາກພື້ນ ໂດຍຜ່ານຈາກກົນໄກການຮ່ວມມືບຣິກສຕ່າງໆ ເຊັ່ນ: ທະນາຄານພັດທະນາໃໝ່ບຣິກສເປັນຕົ້ນ ເຊິ່ງໄດ້ກາຍເປັນທ່ວງທ່າພັດທະນາທີ່ດີງາມ. ທັງໝົດເຫຼົ່ານີ້ກໍໄດ້ດຶງດູດບັນດາປະເທດສະມາຊິກອາຊຽນ ທີ່ພວມຢູ່ໃນໄລຍະພັດທະນາ ແລະ ມີຄວາມຕ້ອງການອັນແຮງກ້າດ້ານການພັດທະນາ.
ສອງ, ພາຍໃຕ້ສະພາບການສາກົນປັ່ນປ່ວນສັບສົນທີ່ລັດທິຝ່າຍດຽວ ແລະ ລັດທິປົກປ້ອງການຄ້າຟື້ນຕົວຄືນ, ປະເທດສະມາຊິກກົນໄກການຮ່ວມມືບຣິກສ ທີ່ມີຖານະສະເໝີພາບກັນບົນພື້ນຖານຫຼັກ 5 ປະການຢູ່ຮ່ວມກັນໂດຍສັນຕິ ໄດ້ຮັກສາການພົວພັນທີ່ແໜ້ນແຟ້ນ ແລະ ໝັ້ນຄົງ. ໂດຍຜ່ານຈາກການເຂົ້າຮ່ວມກົນໄກການຮ່ວມມືບຣິກສ, ປະເທດສະມາຊິກອາຊຽນສາມາດປົກປ້ອງຜົນປະໂຫຍດດ້ານການພັດທະນາຂອງຕົນຢ່າງບັງເກີດຜົນ ແລະ ສາມາສ້າງຕັ້ງສາຍພົວພັນຄູ່ຮ່ວມມືທີ່ໝັ້ນຄົງ ໃນສະພາບແວດລ້ອມການເມືອງ ແລະ ເສດຖະກິດສາກົນ ທີ່ປ່ຽນແປງເລື້ອຍໆ.
ສາມ, ປະເທດສະມາຊິກອາຊຽນສ່ວນຫຼາຍເປັນປະເທດພວມພັດທະນາ, ໃນຂະນະທີ່ສະແຫວງຫາການພັດທະນາຂອງຕົນແລ້ວ, ກໍຢາກສ້າງສະພາບແວດລ້ອມພາຍນອກທີ່ດີເຊັ່ນດຽວກັນ ແລະ ປະກອບຄວາມເຫັນຂອງຕົນໃນວຽກງານສາກົນ. ໃນຖານະເປັນກຸ່ມທີ່ປະກອບດ້ວຍປະເທດພວມພັດທະນາເປັນຕົ້ນຕໍ, ກົນໄກການຮ່ວມມືບຣິກສກໍສາມາດສ້າງເວທີໃຫ້ແກ່ປະເທດສະມາຊິກອາຊຽນ ໃນການສະແດງຜົນສຳເລັດດ້ານການພັດທະນາຂອງຕົນ ແລະ ເຂົ້າຮ່ວມການຕັດສິນວຽກງານສາກົນ. ການຮ່ວມມືລະຫວ່າງສອງຝ່າຍມີຜົນດີຊ່ວຍໃຫ້ທຸກປະເທດມີສິດມີສຽງຢ່າງສະເໝີພາບກັນໃນອະນາຄົດ.
ໃນຖານະເປັນປະເທດສະມາຊິກອາຊຽນ, ລາວກໍໄດ້ສະແດງຄວາມປາຖະໜາທີ່ຈະເຂົ້າຮ່ວມກົນໄກການຮ່ວມມືບຣິກສ. ຕາມຂ່າວແຈ້ງວ່າ: ໃນກອງປະຊຸມສຸດຍອດບຣິກຄັ້ງນີ້, ທ່ານທອງລຸນ ສີສຸລິດ ປະທານປະເທດແຫ່ງ ສປປ ລາວກ່າວວ່າ: “ບຣິກສພວມໄດ້ເສີມຂະຫຍາຍບົດບາດທີ່ຂາດບໍ່ໄດ້ ໃນການປ່ຽນແປງລະບຽບສາກົນ ແລະ ສ້າງຕັ້ງກົນໄກການຮ່ວມມືແບບຕ່າງຝ່າຍຕ່າງໄດ້ຮັບຜົນປະໂຫຍດລະຫວ່າງບັນດາປະເທດໃນເຂດໂລກໃຕ້. ພວກເຮົາຍິນດີຍົກລະດັບປະສານງານກັບປະເທດບຣິກສໃນບັນຫາທີ່ກວ້າງຂວາງ.” ຖ້າລາວເຂົ້າຮ່ວມການຮ່ວມມື “ບຣິກສໃຫຍ່” ຈະສາມາດເພີ່ມທະວີການຮ່ວມມືກັບປະເທດຕ່າງໆ ເຊິ່ງລວມທັງຈີນໃນຂອບເຂດກວ້າງຂວາງກວ່າເກົ່າ, ເລັ່ງພັດທະນາອຸດສາຫະກຳຂອງຕົນ, ຫຼຸດຄວາມໂຕນກັນດ້ານການພັດທະນາ ແລະ ບັນລຸເປົ້າໝາຍພັດທະນາຂອງປະເທດຕົນ.
ສະຫຼຸບແລ້ວເຫັນວ່າ, ອາຊຽນເຂົ້າຮ່ວມການຮ່ວມມື “ບຣິກສໃຫຍ່” ເປັນທາງເລືອກທີ່ຖືກຕ້ອງຕາມກະແສຂອງຍຸກສະໄໝ ເຊິ່ງບໍ່ພຽງແຕ່ມີຜົນດີຊ່ວຍຊຸກຍູ້ການພັດທະນາຂອງບັນດາປະເທດສະມາຊິກອາຊຽນເທົ່ານັ້ນ ຍັງຈະມີຜົນດີຊ່ວຍໃຫ້ກົນໄກກການຮ່ວມມືບຣິກສເພີ່ມອິດທິພົນຂອງຕົນໃນເວທີສາກົນອີກດ້ວຍ. ໃນອະນາຄົດ, ພວກເຮົາຫວັງວ່າ: ອາຊຽນ ແລະ ບຣິກສຈະສາມາດລົງເລິກການຮ່ວມມືໃນຫຼາຍຂົງເຂດກວ່າເກົ່າ, ຮ່ວມກັນປະກອບສ່ວນ ເພື່ອສ້າງໂລກທີ່ມີສັນຕິພາບ, ສະຖຽນລະພາບ ແລະ ຈະເລີນຮຸ່ງເຮືອງກວ່າເກົ່າ.
ທີ່ມາ: CMG
