ເສດຖະກິດ-ສັງຄົມຂອງແຂວງ, ອົງການປົກຄອງແຂວງອຸດົມໄຊ ໄດ້ສຸມໃສ່ການພັດທະນາພື້ນຖານໂຄງລ່າງຢ່າງຕັ້ງໜ້າ, ໂດຍສະເພາະແມ່ນການປັບປຸງ ແລະ ຍົກລະດັບເສັ້ນທາງຄົມມະນາຄົມພາຍໃນຕົວເມືອງ. ປັດຈຸບັນ ແຂວງໄດ້ເລັ່ງຈັດຕັ້ງປະຕິບັດໂຄງການຍົກລະດັບເສັ້ນທາງພາຍໃນເທສະບານແຂວງ (ເມືອງໄຊ) ດ້ວຍການປູຢາງອັດສະຟານ (Asphalt) ແລະ ບາງເສັ້ນປູດ້ວຍເບຕົງ ລວມທັງຫມົດ 14 ເສັ້ນ ເພື່ອແນໃສ່ແກ້ໄຂບັນຫາການສັນຈອນ, ສ້າງຄວາມສະດວກສະບາຍໃຫ້ແກ່ປະຊາຊົນ ແລະ ປັບປຸງທັດສະນີຍະພາບຂອງຕົວເມືອງໃຫ້ມີຄວາມສວຍງາມ, ສະອາດ ແລະ ເປັນລະບຽບຮຽບຮ້ອຍຂຶ້ນກວ່າເກົ່າ.
ໂຄງການຍົກລະດັບເສັ້ນທາງນີ້, ແມ່ນແນໃສ່ເສັ້ນທາງສາຍຫຼັກ ແລະ ເສັ້ນທາງເຊື່ອມຕໍ່ໃນເຂດຊຸມຊົນທີ່ມີຄວາມສຳຄັນພາຍໃນເທສະບານແຂວງ ຊຶ່ງປະຊາຊົນນຳໃຊ້ສັນຈອນໄປ-ມາ ດ້ວຍຄວາມສະດວກສະບາຍ. ການປັບປຸງຄັ້ງນີ້, ປະກອບມີ ການປູຢາງອັດສະຟານ (Asphalt). ເສັ້ນທາງສ່ວນໃຫຍ່ຈະໄດ້ຮັບການປູດ້ວຍຢາງອັດສະຟານ ຊຶ່ງເປັນມາດຕະຖານທີ່ຊ່ວຍໃຫ້ການເດີນທາງມີຄວາມລຽບ, ສະດວກ, ຫຼຸດຜ່ອນຝຸ່ນລະອອງໃນລະດູແລ້ງ ແລະ ຫຼຸດຜ່ອນການເກີດຂີ້ຕົມໃນລະດູຝົນ.
ສຳລັບບາງເສັ້ນທາງ ຫຼື ບາງຈຸດທີ່ມີລັກສະນະພິເສດ ເຊັ່ນ: ເປັນເສັ້ນທາງທີ່ຄ້ອຍຊັນ, ເປັນເຂດທີ່ນ້ຳຖ້ວມຂັງເລື້ອຍໆ ຫຼື ເປັນເສັ້ນທາງທີ່ຕ້ອງຮອງຮັບພາຫະນະໜັກ, ຈະໄດ້ຮັບການປູດ້ວຍເບຕົງເສີມເຫຼັກ ເພື່ອຄວາມແຂງແຮງ, ທົນທານ ແລະ ມີອາຍຸການນຳໃຊ້ທີ່ຍາວນານ. ການປັບປຸງລະບົບລະບາຍນ້ຳ. ນອກຈາກການປູໜ້າທາງແລ້ວ, ໂຄງການຍັງໄດ້ກໍ່ສ້າງ ແລະ ສ້ອມແປງຮ່ອງລະບາຍນ້ຳຕາມແຄມທາງ ເພື່ອຮັບປະກັນບໍ່ໃຫ້ມີນ້ຳຖ້ວມຂັງ ຊຶ່ງເປັນສາເຫດໜຶ່ງທີ່ເຮັດໃຫ້ເສັ້ນທາງເປ່ເພໄວ.
ທັງໝົດນີ້ ກໍເພື່ອຄວາມສະດວກໃນການສັນຈອນຂອງປະຊາຊົນ ໃຫ້ມີຄວາມປອດໄພ, ປະຢັດເວລາ ແລະ ຄ່າໃຊ້ຈ່າຍໃນການເດີນທາງ. ປັບປຸງທัດສະນິຍະພາບ ແລະ ຄຸນນະພາບຊີວິດຂອງຜູ້ຕຄົນ ຊ່ວຍເຮັດໃຫ້ຕົວເມືອງມີຄວາມສວຍງາມ, ສະອາດຕາ, ເປັນລະບຽບ, ຍົກລະດັບຄຸນນະພາບຊີວິດການເປັນຢູ່ຂອງປະຊາຊົນໃຫ້ດີຂຶ້ນ. ໂຄງການດັ່ງກ່າວນີ້, ຖືເປັນບາດກ້າວສຳຄັນໃນການພັດທະນາແຂວງອຸດົມໄຊ ໃຫ້ສອດຄ່ອງກັບທິດທາງການພັດທະນາຂອງພັກ-ລັດຖະບານ, ຄາດວ່າພາຍຫຼັງໂຄງການສຳເລັດ, ຈະສາມາດແກ້ໄຂບັນຫາການສັນຈອນທີ່ປະຊາຊົນພົບພໍ້ມາຫຼາຍປີ ແລະ ຈະເປັນການປະກອບສ່ວນອັນສຳຄັນເຂົ້າໃນການສ້າງສາແຂວງອຸດົມໄຊ ໃຫ້ກາຍເປັນເມືອງທີ່ໜ້າຢູ່, ທັນສະໄໝ ແລະ ເປັນທີ່ດຶງດູດຂອງນັກທ່ອງທ່ຽວ ແລະ ນັກລົງທຶນໃນອະນາຄົດ.
ພາບ-ຂ່າວ: ແສງອາທິດ
