ໃນຕອນເຊົ້າວັນທີ 11 ຕຸລາ 2024 ຢູ່ຫໍປະຊຸມແຫ່ງຊາດ, ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ພົບປະກັບ ທ່ານ ຊາງໝິງ ເລຂາທິການໃຫຍ່ ຂອງອົງການຮ່ວມມືຊຽງໄຮ (Shanghai Cooperation Organization – SCO).
ທ່ານ ສະເຫລີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບ ແລະ ຄວາມຂອບໃຈຕໍ່ ທ່ານ ຊາງໝິງ ທີ່ໄດ້ຕອບຮັບການເຊື້ອເຊີນ ມາເຂົ້າຮ່ວມກອງປະຊຸມສຸດຍອດອາຊີຕາເວັນອອກ ໃນນາມສັງເກດການ ເຊິ່ງເປັນການສະແດງໃຫ້ເຫັນເຖິງ ການສົ່ງເສີມການພົວພັນ ລະຫວ່າງ ອາຊຽນ ແລະ ອົງການຮ່ວມມືຊຽງໄຮ ກໍຄື ລະຫວ່າງ ສປປ ລາວ ແລະ ອົງການຮ່ວມມືຊຽງໄຮ ໂດຍສະເພາະ ການປຶກສາຫາລືແລກປ່ຽນຄໍາຄິດເຫັນຢ່າງກົງໄປກົງມາ ກ່ຽວກັບການສະໝັກເຂົ້າເປັນປະເທດຄູ່ຮ່ວມເຈລະຈາຂອງ SCO ແລະ ຂົງເຂດການຮ່ວມມືກັບອົງການດັ່ງກ່າວໃນອະນາຄົດ.
ໃນໂອກາດນີ້, ທ່ານ ຊາງໝິງ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ຊົມເຊີຍການເປັນປະທານອາຊຽນ ປີ 2024 ຂອງ ສປປ ລາວ, ພ້ອມທັງສະແດງຄວາມຍິນດີທີ່ ສປປ ລາວ ມີຄວາມສົນໃຈໃນການຮ່ວມມືກັບອົງການ SCO ແລະ ຈະສືບຕໍ່ສະເໜີໃຫ້ປະເທດສະມາຊິກ ຂອງອົງການຮ່ວມມືຊຽງໄຮ ພິຈາລະນາຕາມລະບຽບ-ຂັ້ນຕອນ.
