ວັນທີ 24 ກັນຍາ 2025 ທີ່ສຳນັກງານນາຍົກລັດຖະມົນຕີ, ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ສີ ຫ້າວ, ຮອງເຈົ້າແຂວງ ຢູນໜານ, ສປ ຈີນ ພ້ອມດ້ວຍຄະນະ ໃນໂອກາດເດີນທາງມາເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງວັນທີ 23-26 ກັນຍາ 2025.
ໃນໂອກາດດັ່ງກ່າວ, ທ່ານ ຮອງນາຍົກລັດຖະມົນຕີ ໄດ້ກ່າວສະແດງຄວາມຍິນດີຕ້ອນຮັບ ຕໍ່ການມາຢ້ຽມຢາມ ແລະ ເຮັດວຽກຢູ່ ສປປ ລາວ ຂອງທ່ານ ຮອງເຈົ້າແຂວງຢູນໜານ ພ້ອມດ້ວຍຄະນະ ໃນຄັ້ງນີ້, ພ້ອມທັງ ສະແດງຄວາມຊົມເຊີຍຕໍ່ກັບການໄດ້ຮັບການແຕ່ງຕັ້ງດຳລົງຕຳແໜ່ງ ຮອງເຈົ້າແຂວງຢູນໜານ ໃນເດືອນກຸມພາທີ່ຜ່ານມາ. ນອກຈາກນັ້ນ, ຍັງຕີລາຄາສູງ ຕໍ່ສາຍພົວພັນ ແລະ ການຮ່ວມມື ລາວ-ຈີນ ໂດຍສະເພາະ ການເປັນຄູ່ຮ່ວມຍຸດທະສາດຮອບດ້ານ, ໝັ້ນຄົງ, ຍາວນານ ຕາມທິດ 4 ດີ ແລະ ການເປັນຄູ້ຮ່ວມຊະຕາກໍາ ລາວ-ຈີນ, ຈີນ-ລາວ ເວົ້າລວມ, ເວົ້້າສະເພາະ ແມ່ນການພົວພັນຮ່ວມມື ລະຫວ່າງ ສປປ ລາວ ກັບ ແຂວງຢຸູນໜານ ໃນຂະແໜງການຕ່າງໆ ເປັນຕົ້ນ ການພັດທະນາໂຄງລ່າງພື້ນຖານຂະໜາດໃຫຍ່, ການສະໜັບສະໜູນຊ່ວຍເຫຼືອພັດທະນາຊັບພະຍາກອນມະນຸດ ແລະ ອື່ນໆ ຊຶ່ງໄດ້ນຳເອົາຜົນປະໂຫຍດຕົວຈິງ ມາສູ່ປະຊາຊົນສອງຊາດ ລາວ-ຈີນ ຢ່າງຫຼວງຫຼາຍ. ນອກນີ້, ຍັງໄດ້ສະເໜີໃຫ້ພາກສ່ວນກ່ຽວຂ້ອງຂອງ ສປປ ລາວ ແລະ ແຂວງຢຸນໜານຮ່ວມ ສືບຕໍ່ຊຸກຍູ້ການຈັດຕັ້ງປະຕິບັດໂຄງການທີ່ລັດຖະບານທັງສອງຝ່າຍ ໄດ້ຕົກລົງແລ້ວ ໃຫ້ສຳເລັດຕາມແຜນການ ເປັນຕົ້ນ ຮ່ວມກັນວາງແຜນ ແລະ ນຳໃຊ້ໂຄງການທາງລົດໄຟ ລາວ-ຈີນ ໃຫ້ເກີດປະໂຫຍດສູງສຸດ; ຍົກລະດັບດ່ານຊາຍແດນຕ່າງໆ ໃຫ້ມີຄວມສະດວກໃນການເຂົ້າ-ອອກຂອງຄົນ ແລະ ສິນຄ້າ; ຊ່ວຍຊຸກຍູ້ພິຈາລະນາອະນຸມັດໃຫ້ໂຄງການກໍ່ສ້າງທາງດ່ວນ ແຕ່ບໍ່ເຕັນ ຫາ ນະຄອນຫຼວງວຽງຈັນ ແນໃສ່ໃຫ້ສາມາດເປີດນຳໃຊ້ໃນປີ 2030; ສືບຕໍ່ປະຕິບັດແຜນພັດທະນາ ທີ່ປິ່ນອ້ອມທາງລົດໄຟ; ການປະຕິບັດໂຄງການຊ່ວຍເຫຼືອລ້າ; ຊຸກຍູ້ສົ່ງເສີມໃຫ້ນັກທຸລະກິດ-ນັກລົງທຶນ, ປະຊາຊົນຈີນ ກໍຄື ປະຊາຊົນແຂວງຢູນໜານ ເຂົ້າມາລົງທຶນ ແລະ ທ່ອງທ່ຽວ ສປປ ລາວ ໃຫ້ນັບມື້ຫຼາຍຂຶ້ນ.
ຂ່າວ ແລະ ພາບ: ກົມປະຊາສໍາພັນ ຫສນຍ.