ວັນທີ 28 ມີນາ 2026, ພົຈວ ຄອນສະຫວັນ ສົມພາໄຊ ຮອງລັດຖະມົນຕີກະຊວງປ້ອງກັນຄວາມສະຫງົບ ຫຼື ປກສ ທັງເປັນຫົວໜ້າກົມໃຫຍ່ການເມືອງປ້ອງກັນຄວາມສະຫງົບ ພ້ອມດ້ວຍຄະນະ ໄດ້ລົງຢ້ຽມຢາມໃຫ້ກໍາລັງໃຈ ແລະ ມອບເງິນນະໂຍບາຍຊ່ວຍເຫຼືອບັນເທົາທຸກ ແລະ ໃຫ້ການຊ່ວຍເຫຼືອຄອບຄົວນາຍ ແລະ ພົນຕໍາຫຼວດ ສັງກັດກົມໃຫຍ່ການເມືອງປ້ອງກັນຄວາມສະຫງົບ ທີ່ໄດ້ຜົນກະທົບຈາກພະຍຸລະດູຮ້ອນພັດຜ່ານ ເຮັດໃຫ້ເກີດໝາກເຫັບໃຫຍ່ຕົກໃສ່ຫຼັງຄາເຮືອນໄດ້ຮັບຄວາມເສຍຫາຍໜັກ ໃນຄັ້ງວັນທີ 22 ມີນາ 2026.
ການມອບເງິນຊ່ວຍເຫຼືອໃນຄັ້ງນີ້, ຈຸດທີ 1 ມີ 4 ບ້ານ ຄື: ບ້ານໂພນສົມບູນ, ບ້ານຕາດທອງ, ບ້ານທົ່ງປົ່ງ ເມືອງສີໂຄດຕະບອງ ແລະ ບ້ານດົງຫຼວງ ເມືອງນາຊາຍທອງ. ໃນນັ້ນ, ມີຄອບຄົວນາຍ ແລະ ພົນຕໍາຫຼວດ ກົມໃຫຍ່ການເມືອງ ປກສ ຈຳນວນ 7 ຄອບຄົວ, ໂດຍມອບເງິນຊ່ວຍເຫຼືອໃຫ້ຄອບຄົວລະ 10.000.0000 ກີບ ແລະ ນໍ້າດື່ມຈໍານວນໜຶ່ງ.
ໃນໂອກາດນີ້, ພັທ ສຸກສະຫວັນ ແກ້ວບຸນພັນ ພະນັກງານກົມປ້ອງກັນກໍາລັງ ແລະ ຄອບຄົວ ທ່ານ ບຸນແຮງ ຫົງສາ ອະດີດພະນັກງານບໍານານ ກະຊວງ ປກສ ຊຶ່ງແມ່ນໝຶ່ງໃນຫຼາຍຄອບຄົວທີ່ໄດ້ຮັບຜົນກະທົບຈາກພະຍຸດັ່ງກ່າວ ໄດ້ສະແດງຄວາມຂອບໃຈ ມາຍັງການຈັດຕັ້ງ ກໍຄື ຮອງລັດຖະມົນຕີ ກະຊວງປ້ອງກັນຄວາມສະຫງົບ ພ້ອມດ້ວຍຄະນະ ທີ່ໄດ້ລົງມາຢ້ຽມຢາມຖາມຂ່າວ, ມອບການຊ່ວຍເຫຼືອ ແລະ ໃຫ້ກໍາລັງໃນຄັ້ງນີ້.