ພິທີປະກາດຮັບຮອງເອົາ ທາດກະເດົາທຶກ ບ້ານນາໂຄກ ເມືອງຄົງເຊໂດນ ແຂວງສາລະວັນ ເປັນມໍລະດົກແຫ່ງຊາດລະດັບທ້ອງຖິ່ນທາງດ້ານວັດທະນະທໍາ ຈັດຂຶ້ນໃນວັນທີ 17 ມີນາ 2025 ທີ່ເມືອງຄົງເຊໂດນ ໂດຍມີ ທ່ານ ສົມໃຈ ອຸ່ນຈິດ ຮອງເຈົ້າແຂວງໆສາລະວັນ.
ທ່ານ ສີສຸກ ມະຫາວົງ ຫົວໜ້າຈຸດສຸມນາເມັກ ໄດ້ຜ່ານປະຫວັດຄວາມເປັນມາ ທາດກະເດົາທຶກ ໂດຍຫຍໍ້, ເຊິ່ງເປັນເລື່ອງລາວເລົ່າຂານກັນມາແຕ່ດົນນານ ຂອງຜູ້ເຖົ້າຜູ້ແກ່, ການເຄົາລົບເຊື່ອຖືຕາມຮີດຄອງປະເພນີທີ່ບັນພະບູລຸດ ໄດ້ນໍາພາປະຕິບັດສືບທອດກັນມາຢ່າງຕໍ່ເນື່ອງຈົນເຖິງປັດຈຸບັນ ແລະ ບາງເນື້ອໃນຂໍ້ມູນໄດ້ກ່າວວ່າ: ຜູ້ທີ່ສ້າງທາດກະເດົາທຶກ ແລະ ທາດຫົງທອງບໍ່ແມ່ນຄົນດຽວກັນ ເນື່ອງຈາກຜູ້ທີ່ສ້າງທາດຫົງທອງເປັນຜູ້ຍິງຊື່ວ່າ: ນາງ ຫົງທອງ ໄດ້ເປັນຜູ້ນໍາພາສ້າງທາດ, ທັງສອງທາດໄດ້ສ້າງຂຶ້ນໃນໄລຍະດຽວກັນ ເພື່ອແຂ່ງຂັນກັນ ໃນລະຫວ່າງສະຕະວັດທີ XVII ແລະ ເອີ້ນວ່າທາດຜູ້-ທາດແມ່.
ທາດກະເດົາທຶກ ຫ່າງຈາກທາດຫົງທອງໄປທາງທິດຕາເວັນອອກ ປະມານ 111 ແມັດ, ເຊິ່ງຢູ່ໃນເຂດພື້ນທີ່ດຽວກັນຕ່າງແຕ່ມີລັກສະນະສະຫລຽງກັນພຽງເລັກໜ້ອຍເທົ່ານັ້ນ ແລະ ສະຖານທີ່ສູງກວ່າທາດຫົງທອງເລັກໜ້ອຍ ທາດມີລັກສະນະເປັນຮູບສີ່ຫລ່ຽມແຈສາກ, ຂະໜາດຂອງທາດ 5,20 ແມັດ x 5,20 ແມັດ, ສູງປະມານ 4,40 ແມັດ, ວັດສະດຸທີ່ນໍາມາສ້າງແມ່ນກໍ່ດ້ວຍດິນຈີ່ ທີ່ເອົາມາຈາກໜອງໄຟໄໝ້. ທາດຫົງທອງ ແລະ ທາດກະເດົາທຶກ ຍັງຄົງຮັກສາເອກະລັກສະເພາະຂອງແຕ່ລະທາດ ມີຄວາມສົມບູນ ທາງດ້ານຮູບຊົງສິລະປະຢ່າງໂດດ.
ສໍາລັບການກະກຽມຂຶ້ນທະບຽນ ທາດກະເດົາທຶກ ເປັນມໍລະດົກແຫ່ງຊາດລະດັບທ້ອງຖິ່ນ, ເຊິ່ງໄດ້ມີການປະສານສົມທົບກັນກັບຂະແໜງການທີ່ກ່ຽວຂ້ອງ ເຄື່ອນ ໄຫວສຳຫລວດ ແລະ ເກັບກຳຂໍ້ມູນ, ໄດ້ຂຶ້ນບັນຊີທາດກະເດົາທຶກທັງ 2 ທາດ ແລະ ພື້ນທີ່, ປັກຫລັກໝາຍຂອບເຂດທີ່ດິນ, ມີເນື້ອທີ່ເຂດມໍລະດົກສະຖານທັງໝົດ 72.063 ຕາແມັດ ພ້ອມທັງອອກໃບຕາດິນຖາວອນ ແລະ ກຳນົດອອກເປັນ 2 ເຂດຄື: ເຂດອະນຸລັກ ກໍານົດເອົາໃຈກາງທີ່ຕັ້ງຂອງມໍລະດົກ ທີ່ຕ້ອງຮັກສາສະພາບເດີມໄວ້ ໃນພື້ນທີ່ 27.720 ຕາແມັດ, ເຂດ 2 ແມ່ນເຂດພັດທະນາ ສາມາດດຳເນີນກິດຈະການຈໍານວນໜຶ່ງ, ປຸກສ້າງເພື່ອສົ່ງເສີມຄຸນຄ່າເຂດ 1 ຂອງພື້ນທີ່ ຮອງຮັບໃຫ້ແກ່ການພັດທະນາ.
ຂ່າວ-ພາບ: ວິໄລວອນ ສິດທິໄຊ
