ວັນທີ 1 ສິງຫາ 2024, ທ່ານ ອາລຸນໄຊ ສູນນະລາດ ກຳມະການສູນກາງພັກ ເລຂາພັກແຂວງ ເຈົ້າແຂວງຈຳປາສັກ ໄດ້ເຄື່ອນໄຫວນຳພາ – ຊີ້ນໍາ, ລົງຊຸກຍູ້ວຽກງານຮອບດ້ານ ຢູ່ເມືອງໂພນທອງ. ກ່ອນອື່ນໄດ້ຈັດກອງປະຊຸມພົບປະໂອ້ລົມຄະນະພັກ - ອົງການປົກຄອງເມືອງຂຶ້ນ ຢູ່ສະໂມສອນເມືອງ. ມີທ່ານ ສາຍທອງ ໄຊຍະວົງ ຮອງເລຂາພັກແຂວງ ປະທານສະພາປະຊາຊົນແຂວງ ຜູ້ຊີ້ນໍາວຽກງານຮອບດ້ານຢູ່ເມືອງໂພນທອງ, ທ່ານ ສຸພາບ ທໍາມະຮັກສາ ກໍາມະການພັກແຂວງ ເລຂາພັກເມືອງ ເຈົ້າເມືອງໆໂພນທອງ, ບັນດາທ່ານການນໍາພະແນກການກົມກອງອ້ອມຂ້າງແຂວງ, ການນໍາເມືອງ, ການນໍາຫ້ອງການຕ່າງໆພາຍໃນເມືອງ ແລະ ພະນັກງານວິຊາການທີ່ກ່ຽວຂ້ອງ ເຂົ້າຮ່ວມ.
ໃນກອງປະຊຸມ, ທ່ານ ສຸພາບ ທໍາມະຮັກສາ ກໍາມະການພັກແຂວງ ເລຂາພັກເມືອງ ເຈົ້າເມືອງໆໂພນທອງ ໄດ້ກ່າວຕ້ອນຮັບ ແລະ ລາຍງານສະພາບລວມໂດຍຫຍໍ້ ກ່ຽວກັບການຈັດຕັ້ງປະຕິບັດວຽກງານຮອບດ້ານ ຢູ່ພາຍໃນເມືອງໃນໄລຍະຜ່ານມາ ໂດຍຍົກໃຫ້ເຫັນທີ່ຕັ້ງ, ຈຸດພິເສດຂອງເມືອງ, ການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງ, ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ, ວຽກງານຂົງເຂດປ້ອງກັນຊາດ - ປ້ອງກັນຄວາມສະຫງົບ, ວຽກງານເສດຖະກິດ, ວຽກງານຂົງເຂດການເມືອງ - ອົງການຈັດຕັ້ງມະຫາຊົນ, ວຽກງານຂົງເຂດວັດທະນະທໍາ - ສັງຄົມ ເຊິ່່ງມີທັງຜົນງານດ້ານດີ, ດ້ານອ່ອນ, ຂໍ້ຄົງຄ້າງ ແລະ ບາງບົດຮຽນທີ່ຖອດຖອນໄດ້ ເພື່ອສືບຕໍ່ປັບປຸງແກ້ໄຂ ໃຫ້ດີຂຶ້ນໃນຕໍ່ໜ້າ.
ຕໍ່ມາ, ທ່ານ ອາລຸນໄຊ ສູນນະລາດກຳມະການສູນກາງພັກ ເລຂາພັກແຂວງ ເຈົ້າແຂວງຈຳປາສັກ ກໍມີຄໍາເຫັນໂອ້ລົມ ໂດຍເນັ້ນໃຫ້ຄະນະພັກ - ອົງການປົກຄອງເມືອງ ເອົາໃຈໃສ່ຍົກສູງການນໍາພາວຽກງານດ້ານການເມືອງ - ແນວຄິດ, ສ້າງຄວາມເປັນແບບຢ່າງໃນການນໍາພາ - ຊີ້ນໍາ, ລົງໃກ້ຊິດຕິດແທດກັບມະຫາຊົນ ແລະ ທ້ອງຖິ່ນຮາກຖານ ຕິດພັນກັບການແກ້ໄຂບັນຫາຕົວຈິງ ເພື່ອສ້າງໃຫ້ສະມາຊິກພັກ, ພະນັກງານ ໃນທຸກຂົງເຂດວຽກງານ, ທຸກການຈັດຕັ້ງ ແລະ ພໍ່ແມ່ປະຊາຊົນ ມີຄວາມເຊື່ອໝັ້ນຕໍ່ການນໍາພາ - ຊີ້ນໍາຂອງພັກ; ສືບຕໍ່ເພີ່ມທະວີຄວາມສາມັກຄີ ຕິດພັນກັບຄວາມເປັນເອກະພາບ ພາຍໃນຄະນະພັກແຕ່ລະຂັ້ນ ໃຫ້ເປັນປຶກແຜ່ນແໜ້ນໜາ ໂດຍສະເພາະແມ່ນການກໍານົດທິດທາງໃນການເຄື່ອນໄຫວວຽກງານຕ່າງໆ ແລະ ການກໍານົດຈັດວາງບຸກຄະລາກອນ ກະກຽມໃຫ້ແກ່ກອງປະຊຸມໃຫຍ່ ຂອງອົງຄະນະພັກເມືອງ, ຄວາມເປັນເອກະພາບທາງດ້ານເສດຖະກິດ ຕ້ອງລະອຽດຈະແຈ້ງ, ເປີດເຜີຍ, ສາມາດກວດສອບໄດ້ ແລະ ມີຄວາມເປັນເອກະພາບໃນການຈັດວາງງົບປະມານ ເພື່ອເປັນການກະກຽມໃຫ້ແກ່ການດໍາເນີນກອງປະຊຸມໃຫຍ່ ຂອງອົງຄະນະພັກເມືອງ; ສືບຕໍ່ອອກແຮງແຂ່ງຂັນຍູ້ແຮງການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ແຜນພັດທະນາເສດຖະກິດ - ສັງຄົມ ທ້າຍສະໄໝ. ນອກນີ້ ກໍໃຫ້ເອົາໃຈໃສ່ປັບປຸງກົງຈັກການຈັດຕັ້ງ ໃຫ້ມີຄວາມໜັກແໜ້ນເຂັ້ມແຂງ ໂດຍສະເພາະໃນໄລຍະກະກຽມກອງປະຊຸມໃຫຍ່ 3 ຂັ້ນຂອງພັກ, ເອົາໃຈໃສ່ການແກ້ໄຂບັນຫາປາກົດການຫຍໍ້ທໍ້ທີ່ເກີດຂຶ້ນໃນສັງຄົມ ດ້ວຍການບັງຄັບໃຊ້ກົດໝາຍຢ່າງເຂັ້ມງວດ. ມີສະຕິລະວັງຕົວຕໍ່ກົນອຸບາຍມ້າງເພທໍາລາຍຂອງສັດຕູ ໂດຍສະເພາະໃນຖັນແຖວສະມາຊິກພັກ - ພະນັກງານ, ທະຫານ, ຕຳຫຼວດ ຕິດພັນກັບການແກ້ໄຂບັນຫາຕົວຈິງ.
ໂອກາດນີ້, ຄະນະພັກ - ອົງການປົກຄອງແຂວງຈໍາປາສັກ ຍັງໄດ້ມອບເງິນ 300 ລ້ານ ໃຫ້ແກ່ຄະນະພັກ - ອົງການປົກຄອງເມືອງໂພນທອງ ເພື່ອປະກອບສ່ວນໃນການຈັດຕັ້ງປະຕິບັດແຜນພັດທະນາເສດຖະກິດ - ສັງຄົມຂອງເມືອງ ໃຫ້ມີຜົນສໍາເລັດໃໝ່ໃຫຍ່ຫຼວງກວ່າເກົ່າ. ໃນວັນດຽວກັນ, ທ່ານເຈົ້າແຂວງ ພ້ອມດ້ວຍການນໍາແຂວງ ໂດຍການນໍາໜ້າພາທາງຂອງການນໍາເມືອງ ກໍໄດ້ເຄື່ອນໄຫວຢ້ຽມຢາມຕິດຕາມກວດກາພື້ນຖານໂຄງລ່າງພາຍໃນເມືອງໂພນທອງ ຄື: ເຄື່ອນໄຫວຢ້ຽມຢາມຕິດຕາມກວດກາໂຄງການກໍ່ສ້າງຄູກັນເຈື່ອນແຄມຂອງ, ການກໍ່ສ້າງທາງເບຕົງ ຈາກສາມແຍກບ້ານໂພນສະຫວັນ ຫາ ຄ້າຍຄຸມຂັງພູຄອກຊ້າງ ທີ່ບໍ່ທັນສໍາເລັດ ແລະ ເຄື່ອນໄຫວເບິ່ງສະຖານທີ່ ທີ່ຈະກໍ່ສ້າງຂົວຂ້າມຫ້ວຍ ເຊື່ອມຕໍ່ ລະຫວ່າງ ບ້ານໂນນສະຫວ່າງ ຫາ ບ້ານຊາດ - ບ້ານຈານ ແລະ ບ້ານໂພນ ຕື່ມອີກ.
ຂ່າວ-ພາບ: ທູນທອງໃຈ
