ວັນທີ 25 ຕຸລາ 2024, ທີ່ສໍານັກງານຫ້ອງວ່າການແຂວງຈໍາປາສັກ, ທ່ານ ອາ ລຸນໄຊ ສູນນະລາດ ເຈົ້າແຂວງຈໍາປາສັກ ໄດ້ຕ້ອນຮັບການເຂົ້າຢ້ຽມພົບປະຂອງ ທ່ານ ນາງ ຟາງ ຫົງ (Ms FANG Hong) ເອກອັກຄະລັດຖະທູດ ສປ ຈີນ ປະຈໍາ ສປປ ລາວ ພ້ອມຄະນະ ໃນໂອກາດມາເຄື່ອນໄຫວຢ້ຽມຍາມ ແລະ ທັດສະນະໂຄງການຮ່ວມມືຢູ່ທ້ອງຖິ່ນ.
ໃນໂອກາດນີ້, ທ່ານ ອາລຸນໄຊ ສູນນະລາດ ໄດ້ກ່າວຕ້ອນຮັບ ແລະ ຕີລາຄາສູງຕໍ່ການພົບປະຢ້ຽມຢາມອັນມີຄວາມໝາຍໃນຄັ້ງນີ້, ພ້ອມທັງລາຍງານເຖິງຈຸດພິເສດ, ທີ່ຕັ້ງ, ທ່າແຮງບົ່ມຊ້ອນແລະ ຍຸດທະສາດຂອງແຂວງ, ສະພາບການທ່ອງທ່ຽວ, ການຜະລິດກະສິກໍາ, ການຂົນສົ່ງ ໂຣຈິສຕິກ ແລະ ພະລັງງານສະອາດ. ນອກນັ້ນ, ທ່ານເຈົ້າແຂວງ ຍັງໄດ້ສະແດງຄວາມຂອບໃຈຢ່າງຫຍິ່ງ ຕໍ່ການສະໜັບສະໜູນຊ່ວຍເຫຼືອ ຂອງ ສປ ຈີນໃນໄລຍະຜ່ານ ກໍຄືສອງຝ່າຍໄດ້ຕັ້ງໜ້າຈັດຕັ້ງປະຕິບັດແຜນແມ່ບົດໃນການສ້າງຄູ່ຮ່ວມຊາຕາກຳ ຈີນ – ລາວ, ປັບປຸງ ແລະ ເພີ່ມທະວີຄວາມສາມັກຍົກລະ ດັບກົນໄກການຮ່ວມມື; ພ້ອມນິ້, ກໍໄດ້ອວຍພອນໃຫ້ແກ່ສາຍພົວພັນລາວ – ຈີນ, ຈີນ – ລາວ ຈົ່ງໝັ້ນຄົງທະນົງແກ່ນ; ພິເສດ ຂໍໃຫ້ທ່ານເອກອັກຄະລັດຖະທູດ ພ້ອມຄະນະ ຈົ່ງປະສົບຜົນສໍາເລັດ ໃນການປະຕິບັດໜ້າທີ່ ສືບຕໍ່ເສີມຂະຫຍາຍສາຍພົວ ພັນ ມິດຕະພາບອັນເປັນມູນເຊື້ອ ແລະ ການເປັນຄູ່ຮ່ວມຊາຕາກໍາ ລາວ – ຈີນ, ຈີນ – ລາວ ໃຫ້ຈະເລີນງອກງາມຍິ່ງໆຂຶ້ນ.
ທ່ານ ນາງ ຟາງ ຫົງ ໄດ້ສະແດງຄວາມຂອບໃຈ ຕໍ່ກັບການຕ້ອນຮັບອັນອົບອຸ່ນ ຂອງ ທ່ານເຈົ້າແຂວງ ພ້ອມຄະນະ, ພ້ອມທັງສະແດງຄວາມຊົມເຊີຍຕໍ່ໝາກຜົນ ຜົນງານຂອງແຂວງຈໍາປາສັກ ພາຍໃຕ້ການນໍາພາ - ຊີ້ນໍາ ຂອງຄະນະພັກ – ຄະນະນໍາແຂວງ, ພ້ອມກັນນັ້ນ, ທ່ານເອກອັກຄະລັດຖະທູດ ກໍໄດ້ແຈ້ງໃຫ້ຮູ້ເຖິງການເຄື່ອນ ໄຫວ ເຮັດວຽກຂອງຄະນະໃນຄັ້ງນີ້ ເພື່ອປະຕິບັດແຜນແມ່ບົດຄູ່ຮ່ວມຊາຕາກໍາ ລາວ – ຈີນ, ຈີນ – ລາວ ກໍຄືຢູ່ໃນທ້ອງຖິ່ນ; ສືບຕໍ່ຊ່ວຍເຫຼືອດ້ານການສືກສາ, ການສ້າງບຸກຄະລາກອນໃຫ້ແກ່ຈໍາປາສັກ. ພິເສດ, ສະຖານເອກອັກຄະລັດຖະທູດ ສປ ຈີນ ຍັງໄດ້ມອບເງິນຈໍານວນ 10.000 ໂດລາສະຫະລັດ ໃຫ້ແກ່ແຂວງຈໍາປາສັກ ເພື່ອຊ່ວຍຜູ້ດ້ອຍໂອກາດທາງດ້ານການສຶກສາ ພາຍໃນແຂວງດັ່ງກ່າວ.
ຂ່າວ-ພາບ: ພູທິບສະຫວັນ
