ວັນທີ 10 ພຶດສະພາ 2024, ແຂວງຈຳປາສັກ ຈັດພິທີເຊັນສັນຍາສໍາປະທານ (CA) ໂຄງການແຫຼ່ງທ່ອງທ່ຽວອຸທະຍານນໍ້າ ຕົກຕາດແຊ ທ້າວບາຈຽງ ເນື້ອທີ່ 14 ເຮັກຕາ, 247 ຕາແມັດ ບ້ານຫົວແຊ ເມືອງບາຈຽງຈະເລີນສຸກ, ແຂວງຈໍາປາສັກ ລະຫວ່າງ ອົງການປົກຄອງແຂວງຈຳປາສັກ ກັບ ບໍລິສັດ ຫົງຄໍາຂຸດຄົ້ນແຮ່- ຊາຍ ຈໍາກັດຜູ້ດຽວ.
ພິທີຈັດຂຶ້ນຢູ່ພະແນກແຜນການ ແລະ ການລົງທຶນແຂວງ ໂດຍການໃຫ້ກຽດເຂົ້າຮ່ວມຂອງ ທ່ານ ສາຍທອງ ໄຊຍະວົງ ຮອງເລຂາພັກແຂວງ ປະທານສະພາປະຊາຊົນ ແຂວງຈໍາປາສັກ, ທ່ານ ສົມບູນ ເຮືອງວົງສາ ຮອງເຈົ້າແຂວງຈໍາປາສັກ.
ສັນຍາສຳປະທານປະກອບດ້ວຍ 20 ມາດຕາ, ອາຍຸການລົງ ທຶນ 45 ປີ, ມູນຄ່າການ ລົງທຶນທັງໝົດ 3,546,460 ໂດລາສະຫະລັດ, ເນື້ອທີ່ດິນສໍາປະທານ 14 ເຮັກຕາ 247 ຕາແມັດ, ແບ່ງອອກເປັນ 3 ເຂດຄື:
ເຂດທີ 01: ເນື້ອທີ່ດິນສໍາປະທານ ພື້ນທີ່ເຂດອະນຸລັກ ພັດທະນາເປັນເຂດສີຂຽວ ເປັນຈຸດອະນຸລັກ ປ່າໄມ້ນາໆພັນ, ເຂດປ່າປ້ອງກັນ, ເຂດປູກປ່າໄມ້ທົດແທນ ແລະ ອື່ນໆ ມີເນື້ອທີ່ດິນ 64.854 ຕາແມັດ.
ເຂດທີ 02: ເນື້ອທີ່ດິນາສໍາປະທານ ພື້ນທີ່ດິນບໍລິເວນນໍ້າຕົກຕາດ, ບໍລິເວນນໍ້າຫ້ວຍຍາງ: ມີເນື້ອທີ່ດິນທັງໝົດ ຈຳນວນ 30.179 ຕາແມັດ.
ເຂດທີ 03: ເນື້ອທີ່ດິນສໍາປະທານ ພື້ນທີ່ພັດທະນາທ່ອງທ່ຽວ. ມີເນື້ອທີ່ດິນທັງໝົດ ຈໍານວນ 44,967 ຕາແມັດ
ທີ່ມາ: ເກດສະໜາ
