ເມືອງ ອຸທຸມພອນ (ເຊໂນ) ແຂວງສະຫວັນນະເຂດ ໄດ້ສຶກສາອົບຮົມກຸ່ມຄົນທີ່ມົ້ວສຸມສິ່ງເສບຕິດ. ທ່ານ ພັນໂທ ສວນ ໄຊຍະລິນ ຮອງຫົວໜ້າກອງບັນຊາການ ປກສ ເມືອງ ໄດ້ເປັນກຽດເຜີຍແຜ່ຄໍາແນະນໍາຂອງຫົວໜ້າອົງການໄອຍະການ ປະຊາຊົນ ສຸງສຸດ ກ່ຽວກັບການຕິດຕາມກວດກາການດໍາເນີນຄະດີຕໍ່ກັບການປູກ, ຜະລິດ, ປຸງແຕ່ງ, ຄ້າຂາຍ, ຈໍາໜ່າຍ, ຂົນສົ່ງ, ມີໄວ້ໃນຄອບຄອງ, ນໍາເຂົ້າ, ສົ່ງອອກ, ເສບ ທີ່ໃຫ້ສານເສບຕິດເຊັ່ນ: ໃບກະທ້ອມ, ນໍ້າກະທ້ອມ ຫຼື ສານລະເຫີຍທີ່ມີສານເສບຕິດອື່ນໆເປັນຕົ້ນ: ປຸ່ມເປົ້າອັດແກັສສານໄນຕຼັດອອກໄຊ, ຢາສູບໄຟຟ້າ-ຊີຊ່າ ( ບາລາກູ ), ພ້ອມນີ້ ກໍໄດ້ເຜີຍແຜ່ແຈ້ງການຂອງກະຊວງປ້ອງກັນຄວາມສະຫງົບ ແລະ ແຈ້ງການຂອງທ່ານເຈົ້າແຂວງສະຫວັນນະເຂດຕື່ມອີກ
ຕໍ່ກັບບັນຫາການອະນຸຍາດໃຫ້ບໍລິການເປີດ-ປິດ ສະຖານທີ່ຮ້ານບັນເທິງ, ຮ້ານກິນດື່ມພາຍໃນເມືອງອຸທຸມພອນ ທ່ານ ຄໍາຜັ້ນ ສຸນີນຸວົງສາ ວ່າການຫົວໜ້າຫ້ອງການ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວເມືອງ ຍັງຍົກໃຫ້ເຫັນເຖິງແຈ້ງການຂອງທ່ານຫົວໜ້າພະແນກ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງໃນການຈັດຕັ້ງປະຕິບັດຕາມລະບຽບການ ໃນການຄຸ້ມຄອງການບໍລິການ ຮ້ານເທັກ-ບາຣ, ຮ້ານຄາຣາໂອເກະ, ຮ້ານກິນດື່ມ ແລະ ຮ້ານບັນເທີງພາຍໃນແຂວງ, ສໍາລັບຮ້ານເທັກ-ບາຣ, ຮ້ານຄາຣາໂອເກະ ແລະ ຮ້ານບັນເທີງປິດບໍລິການແສງ, ສີ, ສຽງໃນເວລາ 23:30 ໂມງ ຮອດ 24:00 ໂມງ ຕ້ອງປິດສະຖານທີ່ບໍລິການ, ຮ້ານກິນດື່ມ ແມ່ນປິດບໍລິການດ້ານສຽງໃນເວລາ 22:00 ໂມງ, ຫ້າມຜູ້ມາໃຊ້ບໍລິການທີ່ມີອາຍຸຕໍ່າກວ່າ 18 ປີ ເຂົ້າໃຊ້ບໍລິການໃນຮ້ານບັນເທີງ, ຫ້າມນໍາໃຊ້ສະຖານທີ່ເປັນບ່ອນມົ້ວສຸມ ແລະ ສິ່ງທີ່ຜິດກົດໝາຍ, ຖ້າຫາກໃນກໍລະນີຝ່າຝືນຈົນຮອດສາມຄັ້ງ ຈະຖືກຍຸບເລິກການບໍລິການດໍາເນີນທຸລະກິດ ພ້ອມທັງຖອນໃບອະນຸຍາດດໍາເນີນທຸລະກິດຖາວອນ ແລະ ປັບໃໝເປັນເງິນ 10 ລ້ານກີບ
ທ່ານ ພັນໂທ ສົມສັກ ຈັນທະລາສອນ ຫົວໜ້າກອງບັນຊາການ ປກສ ເມືອງ ໄດ້ເນັ້ນວ່າ: ບັນດາກຸ່ມມົ້ວສຸມສິ່ງເສບຕິດທີ່ນໍາມາສຶກສາອົບຮົມຄັ້ງນີ້ ກໍເພື່ອຢາກໃຫ້ລູກຫຼານຂອງພວກເຮົາຮູ້ເຖິງລະບຽບກົດໝາຍບ້ານເມືອງ, ຮູ້ເຖິງຜົນຮ້າຍຂອງສິ່ງເສບຕິດ ມັນມີຜົນເສຍແນວໃດຕໍ່ຮ່າງກາຍຂອງຄົນເຮົາ, ມີການກິນດື່ມ ມົ້ວສຸມກາຍໂມງ ກາຍເວລາ ແລະ ວຽກງານອື່ນໆ. ສໍາລັບກຸ່ມທີ່ມົ້ວສຸມສິ່ງເສບຕິດຖືກເຈົ້າໜ້າທີ່ກັກໂຕນໍາມາສຶກສາອົບຮົມຄັ້ງນີ້, ມີທັງໝົດ 70 ຄົນ, ຍິງ 28 ຄົນ, ພ້ອມດ້ວຍຍານພາຫະນະລົດຈັກ 33 ຄັນ, ລົດໃຫຍ່ 7 ຄັນ. ໃນນີ້ ຜູ້ມາໃຊ້ບໍລິການທີ່ມີອາຍຸຕໍ່າກວ່າ 18 ປີ ມີ 5 ຄົນ, ຍິງ 3 ຄົນ, ນອກນີ້ ທາງເຈົ້າໜ້າທີ່ ຍັງໄດ້ກວດສານເສບຕິດ 1 ຂີດ, ມີ 39 ຄົນ ຍິງ 8 ຄົນ,ກວດສານເສບຕິດ 2 ຂີດ,ມີ 31 ຄົນ ຍິງ 20 ຄົນ
ພິທີສຶກສາອົບຮົມໄດ້ຈັດຂຶ້ນໃນວັນທີ 5 ຕຸລາຜ່ານມາ ທີ່ສະໂມສອນກອງບັນຊາການ ປກສ ເມືອງ,ໂດຍການເຂົ້າຮ່ວມຂອງທ່ານ ພັນໂທ ສົມສັກ ຈັນທະລາສອນ, ມີບັນດາຄະນະກອງບັນຊາການ ປກສ ເມືອງ, ພໍ່ແມ່ຜູ້ປົກຄອງ ແລະ ກຸ່ມມົ້ວສຸມ ເຂົ້າຮ່ວມຮັບຟັງ.
ຂ່າວ: ສະຫວັນນະເຂດ
