ວັນທີ 12 ຕຸລານີ້, ຈີນ ແລະ ລາວໄດ້ອອກຖະແຫຼງການຮ່ວມ ໂດຍມີເນື້ອໃນລະບຸວ່າ: ທັງສອງປະເທດຈະເພີ່ມທະວີການຮ່ວມມືແບບຕ່າງຝ່າຍຕ່າງໄດ້ຮັບຜົນປະໂຫຍດທີ່ມີຄຸນນະພາບສູງກວ່າເກົ່າ. ຈີນສະແດງຄວາມຊົມເຊີຍຕໍ່ຝ່າຍລາວທີ່ມີຄວາມສົນໃຈຕໍ່ເຮືອບິນທຸລະກິດຂອງຈີນ ແລະ ເຈດຈຳນົງແຫ່ງການຮ່ວມມື, ຊົມເຊີຍວິສາຫະກິດການບິນພົນລະເຮືອນຂອງຝ່າຍລາວທີ່ນຳເຂົ້າເຮືອບິນທຸລະກິດຂອງຈີນ, ຍິນດີສືບຕໍ່ຊຸກຍູ້ການຮ່ວມມືກັບຝ່າຍລາວໃນການສະໜັບສະໜູນດ້ານເຕັກນິກບໍລິຫານເຮືອບິນທຸລະກິດຂອງຈີນ ແລະ ການສ້າງເຄືອຂ່າຍບໍລິການລູກຄ້າ. ສິ່ງນີ້ບໍ່ພຽງແຕ່ໄດ້ສະໜອງການສະໜັບສະໜູນດ້ານນະໂຍບາຍໃຫ້ແກ່ປະເທດລາວ ແລະ ປະເທດອື່ນໆໃນອາຊີຕາເວັນອອກສຽງໃຕ້ເພື່ອນຳເຂົ້າເຮືອບິນທີ່ໃຊ້ໃນການບິນທາງທຸລະກິດຂອງຈີນເທົ່ານັ້ນ ແຕ່ຍັງໄດ້ສະໜອງສິ່ງຮັບປະກັນທີ່ເຂັ້ມແຂງໃຫ້ແກ່ການຂະຫຍາຍຕະຫຼາດຢູ່ປະເທດອາຊີຕາເວັນອອກສຽງໃຕ້ສຳລັບເຮືອບິນທຸລະກິດຂອງຈີນອີກດ້ວຍ.
ປັດຈຸບັນນີ້, ເຮືອບິນທຸລະກິດຂອງຈີນໄດ້ນຳສະເໜີເຮືອບິນ 3 ລຸ້ນ ຄື ARJ 21, C919 ແລະ C929, ໃນນັ້ນ ARJ 21 ແລະ C919 ໄດ້ຖືກນຳໃຊ້ເຂົ້າໃນການເຄື່ອນໄຫວທຸລະກິດແລ້ວ ແລະ ຍັງໄດ້ຮັບໃບສັ່ງຊື້ຈາກຕ່າງປະເທດອີກ. ເຮືອບິນໂດຍສານຂະໜາດໃຫຍ່ C919 ໄດ້ບິນທົດລອງເປັນຄັ້ງທຳອິດໃນປີ 2017, ແລະ ເລີ່ມປະຕິບັດການບິນທາງທຸລະກິດໃນເດືອນພຶດສະພາປີ 2023. ປັດຈຸບັນນີ້, ເຮືອບິນ C919 ຈຳນວນ 10 ລຳໄດ້ສົ່ງມອບໃຫ້ແກ່ລູກຄ້າແລ້ວ.ສ່ວນເຮືອບິນ ARJ 21ເປັນເຮືອບິນໂດຍສານສາຍຍ່ອຍ ທີ່ຈີນຄົ້ນຄວ້າຜະລິດຕາມມາດຕະຖານສາກົນ ແລະ ມີຊັບສິນທາງປັນຍາຂອງຕົນ. ໃນເດືອນທັນວາປີ 2022, ບໍລິສັດການບິນ TransNusa ຂອງອິນໂດເນເຊຍກາຍເປັນລູກຄ້າຕ່າງປະເທດຜູ້ທຳອິດຂອງເຮືອບິນອາຍພົ່ນ ARJ 21 ທີ່ຈີນຄົ້ນຄວ້າຜະລິດເອງ ແລະ ມີຊັບສິນທາງປັນຍາຂອງຕົນຢ່າງເຕັມສ່ວນ.
ຄັນຊັ້ນ, ເປັນຫຍັງເຮືອບິນທຸລະກິດຂອງຈີນໄດ້ຮັບຄວາມນິຍົມຊົມຊອບຈາກປະເທດອາຊີຕາເວັນອອກສຽງໃຕ້ ເຊິ່ງລວມທັງປະເທດລາວ? ກ່ອນອື່ນໝົດ, ໃນດ້ານລາຄາ, ARJ 21 ແລະ C919 ແມ່ນມີສະມັດຖະພາບສູງ ແຕ່ລາຄາບໍ່ແພງ, ສາມາດປະຢັດຕົ້ນທຶນໃຫ້ແກ່ບໍລິສັດການບິນ, ເຊິ່ງເປັນແຮງຈູງໃຈທີ່ແຂງແຮງພໍສົມຄວນ. ອີກຢ່າງໜຶ່ງ, ເຮືອບິນທຸລະກິດຂອງຈີນໄດ້ນຳໃຊ້ເຕັກໂນໂລຊີທີ່ດີເດັ່ນ, ໂດຍໄດ້ນຳໃຊ້ເຕັກນິກການບິນທີ່ກ້າວໜ້າ ຕົວຢ່າງວ່າ: ວັດສະດຸປະສົມ, ເຕັກນິກຄວບຄຸມເຮືອບິນດ້ວຍສັນຍານເອເລັກໂຕຣນິກ ແລະອື່ນໆ ເຊິ່ງເຮັດໃຫ້ເຮືອບິນມີປະສິດທິພາບການນຳໃຊ້ນ້ຳມັນເຊື້ອໄຟ ແລະປະສິດທິພາບອະນຸລັກສິ່ງແວດລ້ອມທີ່ດີເດັ່ນ.
ໃນເດືອນກຸມພາປີ 2024ນີ້, ຢູ່ງານວາງສະແດງການບິນສິງກະໂປ, ເຮືອບິນ ARJ 21 ແລະ C919 ທີ່ຜະລິດຈາກປະເທດຈີນໄດ້ສາທິດການບິນເປັນຄັ້ງທຳອິດຢູ່ປະເທດອາຊີຕາເວັນອອກສຽງໃຕ້. ຫຼັງຈາກນັ້ນກໍໄດ້ສາທິດການບິນຢ່າງໜ້າປະທັບໃຈຢູ່ກຳປູເຈຍ, ອິນໂດເນເຊຍ, ລາວ, ມາເລເຊຍ ແລະ ຫວຽດນາມຕາມລຳດັບ. ການສາທິດການບິນເຫຼົ່ານີ້ ເຮັດໃຫ້ບໍລິສັດການບິນ ແລະ ປະຊາຊົນໃນປະເທດອາຊີຕາເວັນອອກສຽງໃຕ້ໄດ້ຮັບຮູ້ເຖິງປະສິດທິພາບທີ່ດີເດັ່ນຂອງເຮືອບິນທຸລະກິດທີ່ຜະລິດຈາກຈີນ ເຊິ່ງໄດ້ສ້າງພື້ນຖານທີ່ໜັກແໜ້ນໃຫ້ແກ່ການບຸກເບີກຕະຫຼາດຢູ່ປະເທດອາຊີຕາເວັນອອກສຽງໃຕ້. ຜູ້ອຳນວຍການໃຫຍ່ບໍລິສັດການບິນລາວເຄີຍກ່າວວ່າ, ການອອກແບບຂອງເຮືອບິນທຸລະກິດທີ່ຜະລິດໂດຍຈີນແມ່ນສອດຄ່ອງກັບມາດຕະຖານສາກົນ, ສິ່ງອຳນວຍຄວາມສະດວກ ແລະ ການບໍລິການຢູ່ເທິງເຮືອບິນແມ່ນສະດວກສະບາຍ ແລະ ມີຄວາມປອດໄພ. ການຕີລາຄາໃນລະດັບສູງຄືແນວນີ້ເປັນການຢືນຢັນໃນລະດັບສູງຕໍ່ເຮືອບິນທຸລະກິດຂອງຈີນ.
ປະເທດລາວເປັນລູກຄ້າທີ່ນິຍົມເຮືອບິນຫຼາຍລຸ້ນທີ່ຜະລິດຈາກຈີນ, ໃນນັ້ນມີ ເຮືອບິນໂດຍສານສາຍຍ່ອຍ “ຊິ່ນໂຈ່ວ 600”, ເຮລີກົບແຕຂົນສົ່ງລຸ້ນ Z-9A ແລະອື່ນໆ. ເຮືອບິນເຫຼົ່ານີ້ໄດ້ປະຕິບັດການບິນໃນປະເທດລາວເລື້ອຍໆ, ກາຍເປັນພາບທີ່ສາມາດພົບເຫັນເປັນປະຈຳຢູ່ເທິງທ້ອງຟ້າປະເທດລາວ ທັງໄດ້ປະກອບສ່ວນຢ່າງຫຼວງຫຼາຍເຂົ້າໃນການຂົນສົ່ງທາງອາກາດ ກໍຄືການອົບຮົມນັກບິນຂອງລາວ.
ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ມີຈຸດປະສົງເພື່ອຊຸກຍູ້ການເຊື່ອມໂຍງເຊື່ອມຈອດກັນ ແລະ ການພັດທະນາເສດຖະກິດຂອງປະເທດລຽບຕາມ “ໜຶ່ງແລວໜຶ່ງເສັ້ນທາງ”, ສ່ວນການຂົນສົ່ງທາງອາກາດເປັນຮູບແບບຄົມມະນາຄົມທີ່ມີປະສິດທິພາບສູງ ແລະ ສະດວກວ່ອງໄວ, ມີບົດບາດສຳຄັນເປັນຢ່າງຍິ່ງຕໍ່ການເພີ່ມທະວີການໄປມາຫາສູ່ດ້ານທຸລະກິດການຄ້າ ແລະ ບຸລະຫວາງປະຊາຊົນໃນພາກພື້ນ. ເຊື້ອໝັ້ນວ່າພາຍໃຕ້ຄວາມພະຍາຍາມຮ່ວມກັນຂອງສອງຝ່າຍ, ເຮືອບິນທຸລະກິດທີ່ຜະລິດຈາກຈີນຈະເປັ່ງສີສັນຢ່າງສະຫວ່າງສະໄຫວໃນພາກພື້ນອາຊີຕາເວັນອອກສຽງໃຕ້ ເຊິ່ງບໍ່ພຽງແຕ່ຈະສ້າງພະລັງຂັບເຄື່ອນອັນໃໝ່ໃຫ້ແກ່ການພັດທະນາອຸດສາຫະກຳການຜະລິດດ້ານການບິນຂອງຈີນເທົ່ານັ້ນ ແຕ່ຍັງຈະສ້າງໂອກາດການພັດທະນາອັນໃໝ່ໃຫ້ແກ່ຂະແໜງການຂົນສົ່ງທາງອາກາດຂອງພາກພື້ນອາຊີຕາເວັນອອກສຽງໃຕ້ອີກດ້ວຍ.
