ເມືອງຫຼວງພະບາງ ຕິດອັນດັບ 1 ເມືອງທີ່ໜ້າທ່ອງທ່ຽວທີ່ສຸດ ໃນອາຊີ ຈາກທັງໝົດ 22 ເມືອງ

Dec 23, 2024

ເມື່ອບໍ່ດົນມານີ້ ທາງ Lonely Planet ເຊິ່ງເປັນ Website ທີ່ມີຊື່ສຽງລະດັບໂລກ ໃນດ້ານການໃຫ້ຂໍ້ມູນກ່ຽວກັບການທ່ອງທ່ຽວ ທີ່ຄອບຄຸມທຸກເລື່ອງຂອງການເດີນທາງ, ເປັນທີ່ຮູ້ຈັກໃນຖານະໜຶ່ງໃນແຫຼ່ງຂໍ້ມູນທ່ອງທ່ຽວ ທີ່ໄດ້ຮັບຄວາມໄວ້ວາງໃຈທີ່ສຸດ. ໄດ້ມີການເປີດເຜີຍລາຍຊື່ 22 ສະຖານທີ່ເມືອງທີ່ໜ້າໄປຢ້ຽມຢາມທີ່ສຸດໃນອາຊີ ເຊິ່ງຫຼວງພະບາງ ກໍຕິດໜຶ່ງໃນນັ້ນອີກດ້ວຍ.

ໂດຍທາງ Lonely Planet ໄດ້ກ່າວກ່ຽວກັບເມືອງຫຼວງພະບາງ ໃນບົດລາຍງານໄວ້ວ່າ:

– ເມືອງຫຼວງພະບາງ ເປັນເມືອງທີ່ຕັ້ງຢູ່ແຄມແມ່ນ້ຳຂອງ ແລະນ້ຳຄານ, ເປັນເມືອງທີ່ເຕັມໄປດ້ວຍກິ່ນອາຍທາງວັດທະນະທຳ ທັງຈາກສາສະນາພຸດ, ລາຊະວົງທ້ອງຖິ່ນ, ອິດທິພົນຈາກຝຣັ່ງ ແລະ ສະຖາປັດຕະຍະກຳທ້ອງຖິ່ນ.

– ນັກທ່ອງທ່ຽວສາມາດສຳພັດກັບກິ່ນອາຍຂອງວັດທະນະທຳ ເຊັ່ນ: ການເຮັດບຸນໃສ່ບາດຍາມເຊົ້າ, ການຢ້ຽມຊົມວັດ ແລະ ພິພິຕະພັນພະລາຊະວັງ.

– ມີກິດຈະກຳຫຼາກຫຼາຍແນະນຳ ເຊັ່ນ: ຊິມອາຫານລາວ, ເບິ່ງຕາເວັນຕົກແຄມແມ່ນ້ຳຂອງ, ຮຽນຮູ້ການຕ່ຳຜ້າທີ່ສູນສິລະປະພື້ນບ້ານ ແລະທ່ຽວຊົມນ້ຳຕົກຕາດກວາງຊີ.

ຈຸດປະສົງຂອງການຈັດອັນດັບໃນຄັ້ງນີ້ ຂອງທາງ Lonely Planet ກໍເພື່ອເປັນການກະຕຸ້ນໃຫ້ມີການທ່ອງທ່ຽວໃນທະວີບອາຊີ ທີ່ມີພື້ນທີ່ກວມເອົາ 1 ໃນ 3 ຂອງພື້ນທີ່ດິນໂລກ ໃຫ້ມີຄວາມຄຶກຄື້ນ ແລະເພື່ອເປັນການແນະນຳໃຫ້ນັກທ່ອງທ່ຽວ ມີປະສົບການທ່ອງທ່ຽວແບບໃໝ່ໆ ໂດຍເນັ້ນທີ່ວິຖີຊີວິດແບບຊຸມຊົນ ແລະສຳພັດວັດທະນະທຳ ທຳມະຊາດໃນພື້ນທີ່.

Luang Prabang, Laos: ເມືອງແຫ່ງຄວາມຊົງຈຳແຄມແມ່ນ້ຳຂອງ