ໃນ 2 ເດືອນທຳອິດຂອງປີນີ້, ຍອດມູນຄ່າຂາຍຍ່ອຍຂອງເຄື່ອງອຸປະໂພກ-ບໍລິໂພກໃນສັງຄົມຈີນ ບັນລຸເຖິງ 8.373,1 ຕື້ຢວນ, ຈັງຫວະການເພີ່ມຂຶ້ນແມ່ນສູງກວ່າການຄາດຄະເນໄວ້. ເມື່ອບໍ່ດົນມານີ້, ທະນາຄານເຢຍລະມັນທີ່ເປັນທະນາຄານທຸລະກິດໃຫຍ່ທີ່ສຸດຂອງເຢຍລະມັນ ໄດ້ຕີລາຄາວ່າ: “ຜູ້ບໍລິໂພກຂອງຈີນມີຄວາມໝັ້ນໃຈເພີ່ມຂຶ້ນຢ່າງຫຼວງຫຼາຍ.”
ຄວາມໝັ້ນໃຈນີ້ແມ່ນມາແຕ່ໃສ? ໃນດ້ານໜຶ່ງ ແມ່ນຍ້ອນວ່າ ນັບແຕ່ປີກາຍເປັນຕົ້ນມາ ໂດຍລວມເສດຖະກິດຈີນໄດ້ຮັກສາຄວາມໝັ້ນທ່ຽງ ແລະ ກ້າວໄປໃນທິດທາງທີ່ດີຂຶ້ນ, ລາຍຮັບຂອງພົນລະເມືອງຈີນເພີ່ມຂຶ້ນຢ່າງບໍ່ຢຸດຢັ້ງ ເຊິ່ງໄດ້ສະໜອງພື້ນຖານດ້ານລາຍຮັບໃຫ້ແກ່ການເຕີບໂຕຂອງການບໍລິໂພກ; ໃນອີກດ້ານໜຶ່ງ, ນັບແຕ່ເດືອນກັນຍາປີ 2024 ເປັນຕົ້ນມາ, ລັດຖະບານຈີນໄດ້ວາງນະໂຍບາຍໃໝ່ຕ່າງໆ, ໃນກອງປະຊຸມສອງສະພາທົ່ວປະເທດປີນີ້ ໄດ້ຈັດເອົາການຊຸກຍູ້ການບໍລິໂພກຢ່າງແຂງແຮງເປັນອັນດັບໜຶ່ງໃນ 10 ໜ້າທີ່ສຳຄັນ, ເມື່ອບໍ່ດົນມານີ້ ຍັງໄດ້ເຜີຍແຜ່ “ແຜນດຳເນີນ ງານສະເພາະກິດເພື່ອຊຸກຍູ້ການບໍລິໂພກ”, ມາດຕະການເຫຼົ່ານີ້ ໄດ້ເສີມຂະຫຍາຍບົດບາດສຳຄັນໃນການຊຸກຍູ້ການເປີດກວ້າງການບໍລິໂພກ.
ເມື່ອຜູ້ບໍລິໂພກນັບມື້ນັບຫຼາຍຂຶ້ນຍິນດີໃຊ້ຈ່າຍ ຖືເປັນຂ່າວດີສຳລັບວິສາຫະກິດຕ່າງປະເທດທີ່ພັດທະນາທຸລະກິດຢ່າງເລິກເຊິ່ງຢູ່ຈີນ. ນັບແຕ່ຕົ້ນປີນີ້ເປັນຕົ້ນມາ, ອົງການທຶນຕ່າງປະເທດຈຳນວນບໍ່ໜ້ອຍຕ່າງສະແດງຄວາມໝັ້ນໃຈຕໍ່ອະນາຄົດຂອງຕະຫຼາດການບໍລິໂພກຂອງຈີນ. ປັດຈຸບັນ, ໂຄງການລົງທຶນຂອງຕ່າງປະ ເທດຂະໜາດໃຫຍ່ຈຳນວນໜຶ່ງ ໄດ້ລົງມືປະຕິບັດຕົວຈິງຢູ່ຈີນຢ່າງຕິດຕໍ່ກັນ ໂດດຍມູນຄ່າການລົງທຶນຕາມແຜນມີເຖິງ 33 ຕື້ໂດລາ, ວິສາຫະກິດລົດຂ້າມຊາດຕ່າງໆ ເຊັ່ນ: ເທັສລາ, ເລັກຊາສ ແລະອື່ນໆພາກັນປະກາດຈະເພີ່ມການລົງທຶນຢູ່ຕະຫຼາດຈີນ; ບໍລິສັດຜະລິດຢາ Eli Lilly ສັນຍາວ່າຈະເພີ່ມການລົງທຶນຢ່າງຕໍ່ເນື່ອງ ແລະ ຈະເພີ່ມກຳລັງການຜະລິດຢູ່ຈີນ; ປີນີ້ແມັກໂດນັນມີແຜນຈະເປີດຮ້ານໃໝ່ອີກ 1.000 ຮ້ານ; ຈາກແຜນລົງທຶນເຫຼົ່ານີ້ເຮັດໃຫ້ສາມາດສັງເກດເຫັນໄດ້ຢ່າງງ່າຍວ່າ: ຕະຫຼາດການບໍລິໂພກອັນໃຫຍ່ຫຼວງຂອງຈີນ ຍັງຄົງເປັນແຮງດຶງດູດໃຈທີ່ແຂງແຮງທີ່ສຸດຕໍ່ທຶນຕ່າງປະເທດ.
ທີ່ມາ: CMG
