ໃນວັນທີ 17 ພຶດສະພາ 2025, ທ່ານ ພອນສະຫວັນ ໄຊສົມພັນ ເລຂາພັກເມືອງຫົງສາ ພ້ອມດ້ວຍຮອງເຈົ້າເມືອງ ແລະ ຂະແໜງການທີ່ກ່ຽວຂ້ອງ, ໄດ້ລົງກວດກາເບິ່ງຈຸດທີ່ຕັ້ງຂອງຜັງບ້ານຈັດສັນໃໝ່ ໃຫ້ປະຊາຊົນບ້ານຄົກແອກ ທີ່ຖືກຜົນກະທົບຈາກເຂື່ອນໄຟຟ້ານ້ຳຂອງຈຸດຫຼວງພະບາງ, ໂດຍມີຕາງຫນ້າບໍລິສັດພອນສະຫວັນພັດທະນາຈຳກັດຜູ້ດຽວ (PVD), ວິຊາການສຳຫຼວດອອກແບບບໍລິສັດ psgc, ອົງການປົກຄອງບ້ານຄົກແອກ ພ້ອມດ້ວຍປະຊາຊົນທີ່ຈະໄດ້ຍົກຍ້າຍເຂົ້າຮ່ວມ.
ການລົງກວດກາໃນຄັ້ງນີ້ ແມ່ນໄດ້ສຳຫຼວດເບິ່ງຈຸດທີ່ຕັ້ງຂອງຜັງບ້ານທີ່ຈະຍົກຍ້າຍ ເນື່ອງຈາກໄດ້ຮັບຜົນກະທົບຈາກການສ້າງເຂື່ອນໄຟຟ້ານ້ຳຂອງຈຸດຫຼວງພະບາງ ຕາມຂໍ້ມູນເບື້ອງຕົ້ນແມ່ນມີ ຈຳນວນ 13 ຄອບຄົວ, ນອກຈາກນີ້ຍັງຈະໄດ້ປະເມີນລະດັບຄວາມສ່ຽງຕື່ມໃນການຍົກຍ້າຍອີກຕາມຂັ້ນຕອນ, ຕາມການລົງພື້ນທີ່ຕົວຈິງ, ຕາມຫຼັກວິຊາການດ້ານການສຳຫຼວດອອກແບບ ແລະ ການພົບປະໂອ້ລົມປະຊາຊົນທີ່ຖືກຜົນກະທົບ ແມ່ນໄດ້ມີຄວາມເອກະພາບກັນໃນການກຳນົດຈຸດຂະຫຍາຍຜັງບ້ານໃຫມ່ທີ່ ມີຄວາມເຫມາະສົມໃນການພັດທະນາໃນຕໍ່ຫນ້າໃຫ້ຄອບຄົວທີ່ຖືກຍົກຍ້າຍ, ປະຊາຊົນແມ່ນມີຄວາມເຫັນດີເຫັນພ້ອມໃນການຍົກຍ້າຍໄປບ່ອນໃຫມ່ທີ່ທາງຂັ້ນເທິງຈັດສັນໃຫ້ ເພື່ອເຮັດໃຫ້ພື້ນຖານໂຄງລ່າງກໍຄືການດຳລົງຊີວິດດີຂຶ້ນກວ່າເກົ່າ, ສ່ວນການຊົດເຊີຍຜົນເສຍຫາຍຕ່າງໆ ແມ່ນຈະໄດ້ປະຕິບັດຕາມລະບຽບການທີ່ວາງອອກ, ນອກຈາກນີ້ຍັງໄດ້ກຳນົດຈຸດຖິ້ມຂີ້ເຫຍື້ອ, ສ່ວນການກໍ່ສ້າງພື້ນຖານໂຄງລ່າງຂອງເຂດຈັດສັນຜັງບ້ານໃຫມ່ນີ້ທາງບໍລິສັດຜູ້ພັດທະນາໂຄງການຈະນຳໄປອອກແບບລະອຽດ ແລ້ວຈຶ່ງເອກະພາບກັນກັບທຸກພາກສ່ວນທີ່ກ່ຽວຂ້ອງເພື່ອໃຫ້ຖືກຕ້ອງຕາມມາດຖານເຕັກນິກທີ່ວາງໄວ້.
ຂ່າວ-ພາບ: ຖວທ ຫົງສາ
