ປີນີ້ເປັນປີຄົບຮອບ 60 ປີ ແຫ່ງການສ້າງາຕັ້ງ ເຂດປົກຄອງຕົນເອງຊີ່ຈ້າງຈີນ. ກ່ອນໜ້ານີ້ 27 ປີ, ຄື ໃນມື້ໜຶ່ງຂອງຕົ້ນລະດູຮ້ອນ ປີ 1998, ທ່ານ ສີຈິ້ນຜິງ ຮອງເລຂາພັກແຂວງຟູຈ້ຽນໃນເວລານັ້ນ ໄດ້ເດີນທາງໄປເຂດປົກຄອງຕົນເອງຊີ່ຈ້າງ ທາງພາກຕາເວັນຕົກສຽງໃຕ້ຂອງຈີນ, ຈາກສະໜາມບິນກົງກາ ນະຄອນລາຊາ ຮອດຕາແສງປ່າຢີ່ ນະຄອນລິນຈື່ ເຂດຊີ່ຈ້າງ, ທ່ານ ສີຈິ້ນຜິງ ໄດ້ເດີນທາງດ້ວຍຄວາມລຳບາກເປັນເວລາໜຶ່ງມື້ຈຶ່ງໄປຮອດບ້ານປ່າຈີ ບ້ານເຜົ່າຕິເບດແຫ່ງໜຶ່ງຂອງນະຄອນລິນຈື່, ຕອນນັ້ນ, ແຂວງຟູຈ້ຽນ ເປັນແຂວງທີ່ຈັບຄູ່ຊ່ວຍເຫຼືອການພັດທະນາເຂດລິນຈື່, ສ່ວນການເດີນທາງເທື່ອນີ້ແມ່ນເພື່ອສຳຫຼວດຊອກຮູ້ສະພາບຕົວຈິງກ່ຽວກັບຊີວິດການເປັນຢູ່ຂອງປະຊາຊົນຊີ່ຈ້າງໃນປັດຈຸບັນເປັນຄືແນວໃດ?
ທ່ານ ສີຈິ້ນຜິງ ຍ່າງເຂົ້າໄປໃນບ້ານປ່າຈີ ໄດ້ຢ້ຽມຢາມເຮືອນຂອງຊື້ເຢິນຜິງໂຊ້ ຊາວບ້ານບ້ານປ່າຈີ ເພື່ອໂອ້ລົມສົນທະນາກັບຊາວບ້ານທັງຫຼາຍ, ເພິ່ນເວົ້າວ່າ: “ຫວັງວ່າພວກສະຫາຍຈະສືບຕໍ່ມີການພັດທະນາ.” “ວຽກຂອງເຂດລິນຈື່ ກໍແມ່ນວຽກຂອງແຂວງຟູ້ຈ້ຽນພວກຂ້າພະເຈົ້າເຊັ່ນກັນ.”
ພາຍຫຼັງກັບຈາກຊີ່ຈ້າງ ເມືອຮອດແຂວງຟູຈ້ຽນແລ້ວ, ທ່ານ ສີຈິ້ນຜິງ ຍັງສືບຕໍ່ເອົາໃຈໃສ່ວຽກງານຊ່ວຍເຫຼືອການພັດທະນາຊີ່ຈ້າງ. ແຕ່ລະໂຄງການ, ວຽກງານແຕ່ລະວຽກ, ເພິ່ນໄດ້ຕິດຕາມສອບຖາມຢ່າງລະອຽດ.
ມີເທື່ອໜຶ່ງ, ພະນັກງານແຂວງຟູຈ້ຽນໄດ້ຮ່າງແຜນການຊ່ວຍເຫຼືອຊີ່ຈ້າງຫຼາຍໂຄງການແລ້ວຍື່ນໃຫ້ທ່ານ ສີຈິ້ນຜິງ ເພື່ອນຳໄປພິຈາລະນາອະນຸມັດ. ເມື່ອເຫັນບາງໂຄງການບໍ່ຕິດແທດຕົວຈິງ, ເພິ່ນຈຶ່ງເວົ້າຢ່າງເຄັ່ງຄັດວ່າ: “ພວກສະຫາຍຕ້ອງວາງແຜນພັດທະນາຫຼາຍໂຄງການ ເພື່ອປັບປຸງ ແລະ ຍົກສູງລະດັບຊີວິດການເປັນຢູ່ຂອງປະຊາຊົນ, ອັນອື່ນບໍ່ຕ້ອງເວົ້າຫຼາຍ, ກ່ອນອື່ນໝົດຂໍແຕ່ບອກມາເບິ່ງດຸວ່າ, ຈະປັບປຸງເງື່ອນໄຂດ້ານສາທາລະນະສຸກ, ເງື່ອນໄຂທີ່ຢູ່ອາໄສຂອງປະຊາຊົນໃຫ້ດີຂຶ້ນຄືແນວໃດ, ຈະແຍກເຂດລ້ຽງສັດກັບເຂດທີ່ຢູ່ອາໄສອອກຈາກກັນຄືແນວໃດ?…”
ທ່ານ ສີຈິ້ນຜິງ ມີຄວາມຫ່ວງໃຍເຖິງປະຊາຊົນເຂດຊີ່ຈ້າງມາໂດຍຕະຫຼອດ ໃນລະດູຮ້ອນ ປີ 2011, ທ່ານ ສີຈິ້ນຜິງ ຮອງປະທານປະເທດຈີນໃນເວລານັ້ນໄດ້ເດີນທາງໄປຢ້ຽມຢາມບ້ານປ່າຈີອີກຄັ້ງ.
ການປ່ຽນແປງໃນໄລຍະ 10 ກວ່າປີຜ່ານມາຂອງບ້ານແຫ່ງນີ້, ທ່ານ ສີຈິ້ນຜິງ ເຫັນໄດ້ຢ່າງຈະແຈ້ງ, ເພິ່ນຍັງໄດ້ມີວິໄສທັດຕໍ່ເສັ້ນທາງການສ້າງຄວາມຮັ່ງມີສຳລັບຊາວບ້ານ: “ເສັ້ນທາງການສ້າງຄວາມຮັ່ງມີກໍຢູ່ໃຕ້ຕີນເຮົານັ້ນເອງ ຄື ຕ້ອງໃຊ້ສະໝອງ ເປັນຄົນສະຫຼາດ. ຄົນສະຫຼາດ, ຄວາມຈິງແລ້ວກໍແມ່ນຕ້ອງເລືອກເສັ້ນທາງການພັດທະນາໃຫ້ຖືກຕ້ອງ.” “ເຈົ້າມີ ຂ້ອຍມີ ທຸກຄົນມີ, ຮັ່ງມີຮ່ວມກັນຈຶ່ງຈະມີຄຸນປະໂຫຍດ.”
ທ້າວ ເກີຊ່າງວ້າງຈິວ ຜູ້ນຳໜ້າສ້າງຄວາມຮັ່ງມີ ທີ່ເປັນສະມາຊິກພັກຄອມມູນິດຈີນມາໄດ້ 10 ກວ່າປີ ໄດ້ຈົດຈຳຄຳຊີ້ນຳຂອງທ່ານສີຈິ້ນຜິງໄວ້ໃນໃຈ. ລາວໄດ້ນຳໜ້າເຕົ້າໂຮມລົດຂົນສົ່ງ, ລົດຈົກ ຂອງຊາວບ້ານເຂົ້າກັນ, ຫັນສະພາບທີ່ຊາວບ້ານຕ່າງຄົນຕ່າງເຮັດໃນເມື່ອກ່ອນ ກາຍມາເປັນຂະບວນລົດທີ່ສາມາດຮັບເໝົາສຳລັບໂຄງການຕ່າງໆໄດ້.
ປີ 2014, ຕະຫຼາດວັດສະດຸກໍ່ສ້າງຂະໜາດໃຫຍ່ພຽງແຫ່ງດຽວ ຂອງນະຄອນລິນຈື່ເຂດຊີ່ຈ້າງ ໄດ້ສ້າງສຳເລັດ ແລະ ເປີດບໍລິການຢ່າງເປັນທາງການຢູ່ບ້ານປ່າຈີ, ເຊິ່ງໄດ້ກາຍເປັນ “ຂຸມຊັບ” ລວມໝູ່ຂອງບ້ານນີ້. ປີ 2019, ເຂດນິຄົມຈໍລະຈອນສິນຄ້າທີ່ທັນສະໄໝແຫ່ງໜຶ່ງໄດ້ສ້າງສຳເລັດຢູ່ບ້ານປ່າຈີ, ກາຍເປັນຈຸດເພີ່ມລາຍຮັບໃໝ່ສຳລັບເສດຖະກິດລວມໝູ່ຂອງບ້ານດັ່ງກ່າວ.
ນະໂຍບາຍທີ່ດີຂອງພັກ ແລະ ລັດຖະບານໄດ້ຮັບການຈັດຕັ້ງປະຕິບັດໃຫ້ເປັນຮູບປະທຳຢູ່ເຂດຊີ່ຈ້າງທີ່ຕັ້ງຢູ່ເທິງພູພຽງແດນຫິມະ ຊາວບ້ານທັງຫຼາຍພາກັນສຸມຄວາມພະຍາຍາມເຂົ້າໃນການພັດທະນາດ້ວຍນ້ຳໃຈກ້າບຸກກ້າເຮັດ, ອັນເຮັດໃຫ້ບ້ານປ່າຈີເກີດມີການປ່ຽນແປງໃໝ່.
ປີ 2011, ເສດຖະກິດລວມໝູ່ຂອງບ້ານປ່າຈີເກືອບບໍ່ມີເລີຍ, ການສ້າງຄວາມຮັ່ງມີຂຶ້ນຈຶ່ງໄດ້ກາຍເປັນຄວາມປາດຖະໜາໃຫຍ່ທີ່ສຸດຂອງຊາວບ້ານໃນຕອນນັ້ນ. ທຸກມື້ນີ້ຫຼັງຈາກເວລາຜ່ານໄປ 10 ກວ່າປີ, ລາຍຮັບລວມໝູ່ຂອງບ້ານປ່າຈີໄດ້ຮັກສາຢູ່ໃນລະດັບຫຼາຍກວ່າ 9.000.000 ຢວນເປັນເວລາຫຼາຍປີຕິດຕໍ່ກັນ, ລາຍຮັບສະເລ່ຍຂອງຊາວບ້ານບັນລຸເກືອບ 60.000 ຢວນຕໍ່ຄົນຕໍ່ປີ.
ເມື່ອຍ່າງທຽວຕາມບ້ານປ່າຈີ ທ່ານຈະໄດ້ເຫັນເຮືອນຊານແບບດັ້ງເດີມຂອງເຜົ່າຕິເບດ ແລະ ເຮືອນວິນລາແບບເອີຮົບທີ່ສ້າງໃໝ່ ໄດ້ສະຫຼັບສັບຊ້ອນຢັ່ງຢາຍໄປທົ່ວ. ຊາວບ້ານທີ່ດຳລົງຊີວິດຢູ່ທີ່ແຫ່ງນີ້ໄດ້ຊົມໃຊ້ຊີວິດດ້ວຍເງື່ອນໄຂທີ່ດີຕ່າງໆເຊັ່ນ: ອັດຕາການເຂົ້າເຖິງການສຶກສາພາກບັງຄັບຂອງເດັກໃນໄວຮຽນ, ອັດຕາເຂົ້າເຖິງລະບົບປະກັນສຸຂະພາບຂັ້ນພື້ນຖານ ແລະ ລະບົບປະກັນໄພບຳນານຂັ້ນພື້ນຖານ ລ້ວນແຕ່ໄດ້ບັນລຸເຖິງ 100%.
ເມື່ອຫວນຄືນຫຼັງໃນປີ 1998, ເດີນທາງຈາກນະຄອນລາຊາຮອດນະຄອນລິນຈື່, ທ່ານສີຈິ້ນຜິງ ໄດ້ຂີ່ລົດດົນໝົດມື້ຈຶ່ງຈະໄປຮອດ.
ມາເຖິງປີ 2021, ທ່ານ ສີຈິ້ນຜິງ ໄປເຄື່ອນໄຫວຢ້ຽມຢາມເຂດຊີ່ຈ້າງອີກຄັ້ງໜຶ່ງ, ເພິ່ນໄດ້ຂີ່ລົດໄຟຄວາມໄວສູງຂະບວນຟູຊິ້ງ, ການເດີນທາງໃນໄລຍະທາງດຽວກັນ ແຕ່ໃຊ້ເວລາພຽງ 3 ຊົ່ວໂມງປາຍເທົ່ານັ້ນ. ໄລຍະຢູ່ເທິງລົດໄຟ, ເພິ່ນເວົ້າດ້ວຍຄວາມປິຕິຊົມຊື່ນວ່າ: “ໄດ້ເຫັນທິວທັດອັນສວຍສົດງົດງາມຕະການຕາຂອງພູພຽງແດນຫິມະ ແລະ ສະພາບແບບຟ້າໃໝ່ທີ່ມີຊີວິດຊີວາ, ຮູ້ສຶກດີໃຈຫຼາຍ!”
ບ້ານກາລາມີພົນລະເມືອງທີ່ດຳລົງຊີວິດເປັນປະຈຳຢູ່ໃນບ້ານພຽງ 149 ຄົນເທົ່ານັ້ນ, ໃນໄລຍະລະດູການດອກຄາຍບານປີນີ້, ບ້ານກາລາໄດ້ຕ້ອນຮັບນັກທ່ອງທ່ຽວຫຼາຍກວ່າ 110.000 ເທື່ອຄົນ, ສ້າງລາຍຮັບຈາກການທ່ອງທ່ຽວໃຫ້ກັບທົ່ວບ້ານບັນລຸຫຼາຍກວ່າ 3.700.000 ຢວນ.
ໃນການເຄື່ອນໄຫວຢ້ຽມຢາມເຂດຊີ່ຈ້າງຄັ້ງນັ້ນ, ທ່ານ ສີຈິ້ນຜິງ ຍັງໄດ້ເດີນທາງໄປຢ້ຽມຢາມບ້ານກາລາທີ່ຫ່າງຈາກບ້ານປ່າຈີບໍ່ໄກປານໃດ, ຊາວບ້ານທ່ານໜຶ່ງໄດ້ບອກກັບທ່ານ ສີຈິ້ນຜິງ ວ່າ: “ປັດຈຸບັນ, ນະໂຍບາຍຂອງພັກດີຫຼາຍ, ຊີວິດການເປັນຢູ່ຂອງຂ້ອຍກໍນັບມື້ນັບດີຂຶ້ນແລ້ວ.” ທ່ານ ສີຈິ້ນຜິງ ຮູ້ສຶກປະຕິຊົມຊື່ນເປັນຢ່າງຍິ່ງ, ເພິ່ນໄດ້ໃຫ້ກຳລັງໃຈແກ່ຊາວບ້ານທັງຫຼາຍວ່າ: “ການມີຊີວິດທີ່ຢູ່ດີມີສຸກກໍຍ້ອນໄດ້ຮັບຜົນປະໂຫຍດຈາກນະໂຍບາຍທີ່ດີຂອງພັກ-ລັດ, ຍັງເປັນຜົນທີ່ສ້າງຂຶ້ນດ້ວຍສອງຝາມືຢ່າງດຸໝັ່ນ ຂອງພວກສະຫາຍເອງ.”
ໃນລະດຸຮ້ອນປີນີ້, ທ່ານ ສີຈິ້ນຜິງ ໄດ້ຕອບຈົດໝາຍຂອງຊາວບ້ານບ້ານກາລາ, ເນື້ອໃນບາງຕອນຂອງຈົດໝາຍໄດ້ຂຽນວ່າ: “ເມື່ອໄດ້ຮູ້ວ່າ ຫຼາຍປີມານີ້, ທາງບ້ານໄດ້ມີການປ່ຽນແປງໃໝ່ອີກແລ້ວ, ລາຍຮັບຂອງປະຊາຊົນໄດ້ເພີ່ມຂຶ້ນ, ຂ້າພະເຈົ້າຮູ້ສຶກດີໃຈນຳພວກສະຫາຍຫຼາຍ.” ນອກນີ້, ເພິ່ນຍັງໄດ້ຝາກຄວາມຫວັງໄວ້ນຳຊາວບ້ານທັງຫຼາຍ ຈົ່ງສ້າງຊີວິດການເປັນຢູ່ທີ່ດີມີຄວາມສຸກໃຫ້ຫຼາຍກວ່າເກົ່າ ພາຍໃຕ້ການຊີ້ນຳຈາກນະໂຍບາຍທີ່ດີຂອງພັກ ກ່ຽວກັບການພັດທະນາເຂດຊາຍແດນໃຫ້ຈະເລີນ ແລະ ສ້າງຄວາມຮັ່ງມີໃຫ້ປະຊາຊົນ.