ໃນໂອກາດມາເຄື່ອນໄຫວເຮັດວຽກຢູ່ແຂວງອຸດົມໄຊໃນຕອນແລງວັນທີ 29 ພະຈິກ ນີ້ ທ່ານ ຟັງຫົງ ເອກອັກຄະລັດຖະທູດແຫ່ງ ສປ ຈີນ ປະຈຳ ສປປ ລາວ ພ້ອມຄະນະ ໄດ້ເຂົ້າຢ້ຽມຂໍ່ານັບ ທ່ານ ບຸນຄົງ ຫລ້າຈຽມພອນ, ກຳມະການສໍາຮອງສູນກາງພັກ, ເລຂາພັກແຂວງ, ເຈົ້າແຂວງອຸດົມໄຊ ພ້ອມດ້ວຍການນຳພະແນກການຈຳນວນຫນຶ່ງ ທີ່ຫ້ອງຮັບແຂກຫ້ອງວ່າການແຂວງ.
ຈຸດປະສົງການມາຢ້ຽມຂໍ່ານັບໃນຄັ້ງນີ້ ແມ່ນມາສະເຫນີຕົວພາຍຫລັງທີ່ໄດ້ຮັບການແຕ່ງຕັ້ງເປັນທ່ານທູດຜູ້ໃຫມ່. ໃນພິທີພົບປະ ທ່ານເຈົ້າແຂວງໄດ້ກ່າວຕ້ອນຮັບ ແລະ ຍ້ອງຍໍຊົມເຊີຍໃນການດຳລົງຕໍາແຫນ່ງໃຫມ່ຂອງທ່ານທູດຈີນ. ການມາເຄື່ອນໄຫວວຽກທາງການໃນຄັ້ງນີ້ ຖືເປັນນິມິດຫມາຍສຳຄັນຕໍ່ການພົວພັນຮ່ວມມືຂອງສອງຊາດ ລາວ-ຈີນ ເວົ້າລວມເວົ້າສະເພາະແມ່ນດ້ານການຄ້າ, ການລົງທຶນ, ການທ່ອງທ່ຽວຂອງບັນດານັກທຸລະກິດຂອງຈີນຢູ່ແຂວງອຸດົມໄຊ. ເຊິ່ງທັງສອງໄດ້ຕີລາຄາສູງຕໍ່ການພົວພັນຮ່ວມມືຊ່ວຍເຫລືອເຊິ່ງກັນ ແລະ ກັນໃນໄລຍະຜ່ານມາ ເປັນຕົ້ນແມ່ນການຮ່ວມມືລະຫວ່າງແຂວງອຸດົມໄຊ ກັບ ບັນດາແຂວງໃກ້ຄຽງຂອງຈີນ. ຂະນະດຽວກັນທ່ານ ບຸນຄົງ ຫລ້າຈຽມພອນ ເຈົ້າແຂວງອຸດົມໄຊ ກໍໄດ້ລາຍງານສະພາບຈຸດພິເສດ ໂດຍສະເພາະແມ່ນທ່າແຮງດ້ານການພັດທະນາຂອງແຂວງອຸດົມໄຊ ໃຫ້ ທ່ານເອກອັກຄະລັດຖະທູດ ແຫ່ງ ສປ ຈີນ ພ້ອມຄະນະຮັບຊາບ ລວມເຖິງການພົວພັນຮ່ວມມືລະຫວ່າງແຂວງອຸດົມໄຊ ກັບ ບັນດາແຂວງໃກ້ຄຽງຂອງຈີນ. ປັດຈຸບັນແຂວງອຸດົມໄຊໄດ້ມີການພົວພັນຮ່ວມມືກັບ 2 ແຂວງ ແລະ 1 ກິ່ງແຂວງຂອງຈີນ ເພື່ອຍາດແຍ່ງເອົາການລົງທຶນຂອງນັກທຸລະກິດຈີນ ມາລົງທຶນຢູ່ແຂວງອຸດົມໄຊ ແລະ ພາຍໃນແຂວງອຸດົມໄຊ ຍັງມີນັກທຸລະກິດຂອງຈີນມາລົງທຶນດ້ານຕ່າງໆຫລາຍກວ່າ 300 ຫົວຫນ່ວຍທຸລະກິດ, ນອກຈາກນີ້ ທາງລັດຖະບານຈີນ ຍັງໃຫ້ການຊ່ວຍເຫລືອພັດທະນາບຸກຄະລາກອນຂອງບັນດາພະແນກການ ລວມທັງທຶນໃຫ້ແກ່ລູກຫລານຂອງປະຊາຊົນ ແຂວງອຸດົມໄຊ ໄດ້ໄປສຶກສາຕໍ່ຢູ່ຫລາຍແຂວງຂອງ ສປ ຈີນ ແລະ ມາໃນວັນທີ 30 ພະຈິກ 2024 ທ່ານເອກອັກຄະລັດຖະທູດແຫ່ງ ສປ ຈິີນ ປະຈໍາ ສປປ ລາວ ພ້ອມຄະນະ ແລະ ການນຳແຂວງອຸດົມໄຊ ກໍໄດ້ເຂົ້າວາງພວງມາລາຢູ່ສຸສານ ລະນຶກເຖິງວິລະກຳຈີນຢູ່ລາວ ທີ່ບ້ານທ້ຽວ ເມືອງໄຊ ແຂວງອຸດົມໄຊ ເພື່ອລະນຶກເຖິງດວງວິນຍານຂອງນັກວິລະກຳ ສປ ຈີນ ທີ່ເສຍສະຫລະຊີວິດຊ່ວຍເຫລືອກໍ່ສ້າງເສັ້ນທາງຢູ່ແຂວງອຸດົມໄຊ ຕື່ມອີກ.
