ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ວັນທີ 30 ກັນຍາ 2022,​ ໄດ້ມີພິທີເປີດງານວາງສະແດງ ແລະ ຈໍາໜ່າຍສິນຄ້າກະສິກໍາປຸງແຕ່ງ 9 ແຂວງ ຕົວແບບ​ ຄື: ແຂວງອຸດົມໄຊ,​ ໄຊຍະບູລີ,​ຫຼວງພະບາງ,​ ບໍລິຄໍາໄຊ,​ ຄໍາມ່ວນ, ສະຫວັນນະເຂດ,​ ສາລະວັນ,​ ເຊກອງ ແລະ​ ແຂວງຈໍາປາສັກເຈຫ້າພາບ.​ ງານຈັດຂຶ້ນ ຢູ່​ສູນການຄ້າ ແຟຣັນຊິບມໍ ນະຄອນປາກເຊ ແຂວງຈໍາປາສັກ ໂດຍການເຂົ້າຮ່ວມຂອງ​ ທ່ານ ປອ.ວິໄລວົງ ບຸດດາຄຳ ເຈົ້າແຂວງຈໍາປາສັກ,​ ທ່ານ ນາງ ຈັນສຸກ ແສງພະຈັນ ຮອງລັດຖະມົນຕີກະຊວງ ອຸດສາຫະກໍາ ແລະ ການຄ້າ,,ມີ​ບັນດາການນໍາ​ແຂວງຈໍາປາສັກ, ຫົວໜ້າພະແນກ, ຮອງຫົວໜ້າພະແນກອຸດສາຫະກໍາ ແລະ ການຄ້າ 9 ແຂວງ ແລະ ບັນດາທ່ານການນໍາພະແນກການອ້ອມຂ້າງແຂວງ,​, ເຈົ້ານະຄອນ, ເຈົ້າເມືອງ,ການນໍາຫ້ອງການອຸດສາຫະກໍາ ແລະ​ ການຄ້າ​ 9​ ເມືອງ, 1 ນະຄອນ, ນັກທຸລະກິດ, ຜູ້ປະກອບການດ້ານກະສິກໍາປຸງແຕ່ງ ໃນ​ 9​ ແຂວງ​ ເຂົ້າຮ່ວມ.​
ໃນພິທີ​ ທ່ານ​ ປອ.​ບຸນຍະເດດ​ ທອງ​ສະຫວັນ​ ກໍາມະການ​ພັກ​ແຂວງ​ ຫົວໜ້າ​ພະແນກ​ອຸດສາຫະ​ກໍາ​ ແລະ​ ການຄ້າແຂວງຈໍາສັກ​ ໄດ້ຕາງໜ້າໃຫ້ຄະນະກໍາມະການຈັດງານ​ ລາຍງານວ່າ: ການຈັດງານຄັ້ງນີ້ໂດຍປະຕິບັດຕາມໜັງສືສະເໜີຂອງກົມສົ່ງເສີມການຄ້າ ກະຊວງອຸດສາຫະກໍາ ແລະ ການຄ້າ ເຊີ່ງໄດ້ຮັບການສະໜັບສະໜູນດ້ານງົບປະມານທັງໝົດ ຈາກໂຄງການປະເມີນການພັດທະນາສິນຄ້າຫົວໜ່ວຍທຸລະກິດຂະໜາດນ້ອຍ ແລະ ກາງ ເພື່ອສົ່ງອອກ ແລະ ເຂົ້າເຖິງຕະຫຼາດ ສປ ຈີນ ສົກປີ 2022 ບົນພື້ນຖານສັນຍາຮ່ວມມືໂຄງການກອງທຶນພິເສດແມ່ນໍ້າຂອງ – ແມ່ນໍ້າລ້ານຊ້າງ ລະຫວ່າງ ສປປ ລາວ ແລະ ສປ ຈີນ ລົງວັນທີ 2 ສິງຫາ 2022 ເຊິ່ງພະແນກອຸດສາຫະກໍາ -​ ການຄ້າແຂວງ ແລະ ກົມສົ່ງເສີມການຄ້າ ໄດ້ປະສານສົມທົບກັນ ເພື່ອວາງແຜນໃນການຈັດຕັ້ງປະຕິບັດງານ​ ແຕ່ຕົ້ນເດືອນສິງຫາ 2022​ ຜ່ານມາ ໃນການກະກຽມຈັດງານວາງສະແດງ ແລະ ຈໍາໜ່າຍສິນຄ້າໃນຄັ້ງນີ້.​
ຫົວໜ້າ​ພະແນກ​ອຸດສາຫະ​ກໍາ​ ແລະ​ ການຄ້າ​ແຂວງ​ຈໍາປາສັກ​ ລາຍງານຕື່ມວ່າ: ງານວາງສະແດງ ແລະ​ ຈໍາໜ່າຍສິນຄ້າຄັ້ງນີ້ ມີຫ້ອງວາງສະແດງສິນຄ້າເຂົ້າຮ່ວມ ທັງໝົດ 40 ຫ້ອງ ມີ 46 ຫົວໜ່ວຍ,​ ໃນນັ້ນ​ ຫ້ອງວາງສະແດງສິນຄ້າຕົວແບບຂອງໂຄງການ ຈາກ 9 ແຂວງ​ 1 ຫ້ອງໃຫຍ່​ ກວມເອົາ 6 ຫ້ອງ,​ ມີ 9 ຫົວໜ໋ວຍ; ຫ້ອງວາງສະແດງສິນຄ້າ ຜະລິດຕະພັນທີ່ພົ້ນເດັ່ນ ຂອງ 4 ແຂວງພາກໃຕ້​: ຈໍາປາສັກ, ສາລະວັນ, ເຊກອງ, ອັດຕະປື 4 ຫ້ອງ, ມີ 4 ຫົວໜ່ວຍ; ຫ້ອງວາງສະແດງ ແລະ ຈໍາໜ່າຍສິນຄ້າ ວິສາຫະກິດພາຍໃນແຂວງຈໍາປາສັກ ມີ 30 ຫ້ອງ ໃນນັ້ນ,​ ສິນຄ້າໂອດອບ​ ມີ 33 ຫົວໜ່ວຍ ຈາກ 9 ເມືອງ 1 ນະຄອນ ມີ.​8ຫ້ອງ; ສິນຄ້າຫັດຖະກໍາ ມີ​ 6 ຫົວໜ່ວຍ; ສິນຄ້າກະສິກໍາ ແລະ ອຸດສາຫະກໍາ ປຸງແຕ່ງ ມີ​ 17 ຫົວໜ່ວຍ.​ ສິນຄ້າທີ່ນໍາມາວາງສະແດງ ແລະ ຈໍາໜ່າຍ ແມ່ນປະເພດຜະລິດຕະພັນສິນຄ້າກະສິກໍາ – ອຸດສາຫະກໍາປຸ່ງແຕ່ງ,​ ກາເຟ,​ ຊາ, ເຂົ້າ, ພືດຜັກ, ມັນຕົ້ນ,​ ພາສຕິກ-ທໍ່ພີອີ, ເຄື່ອງຫັດຖະກໍາຈັກສານໄມ້ປ່ອງ,​ ຫວາຍ, ຜ້າຝ້າຍ, ຝ້າໃໝ, ສິນຄ້າໂອດ໊ອບ ພ້ອມທັງສິນຄ້າອື່ນໆ ທີ່ເປັນທ່າແຮງຂອງແຂວງ ແລະ ສິນຄ້າຈາກ 9 ແຂວງ ທີ່ເຂົ້າຮ່ວມໂຄງການ.
ຕໍ່ມາ,​ ທ່ານ​ ໄຊສົມບັດ ນໍລະສິງ ຫົວໜ້າ​ກົມສົ່ງເສີມການຄ້າ ກໍໄດ້ລາຍງານກ່ຽວກັບໂຄງການ ແລະ​ ກ່າວເປີດງານຢ່າງເປັນທາງການ,​ ບາງຕອນທ່ານກ່າວວ່າ: ຈຸດປະສົງ ແລະ ເປົ້າໝາຍ ກໍເພື່ອແນ່ໃສ່ການໂຄສະນາຜະລິດຕະພັນສິນຄ້າກະສິກໍາປຸງແຕ່ງ​ ເພື່ອສົ່ງອອກ ແລະ ເຂົ້າເຖິງຕະຫຼາດພາຍໃນ ແລະ ຕ່າງປະເທດ ຂອງຜະລິດຕະພັນລາວເປັນຫຼັກ​ທັງເປັນການສົ່ງເສີມສິນຄ້າລາວເຂົ້າສູ່ຕະຫຼາດພາຍໃນ ແລະ ສາກົນ​ ເພື່ອກະຕຸ້ນການຕະຫຼາດ ຢູ່ພາຍໃນປະເທດໃຫ້ມີການຂະຫຍາຍຕົວເພີ່ມຂຶ້ນ,​ ເຮັດໃຫ້ຜູ້ຜະລິດ ແລະ ຜູ້ປະກອບການເຂົ້າໃຈກ່ຽວກັບສະພາບການປ່ຽນແປງຕະຫຼາດທັງພາຍໃນ ແລະ​ ຕ່າງປະເທດ​ ເພື່ອສາມາດປັບໂຕໃຫ້ເຂົ້າກັບສະພາບການປົກກະຕິແບບໃໝ່ໃນປັດຈຸບັນ (New normal). ເຮັດໃຫ້ຫົວໜ່ວຍທຸລະກິດ ໄດ້ແລກປ່ຽນບົດຮຽນເຊີ່ງກັນ ແລະ ກັນ ທັງດ້ານການປຸງແຕ່ງ ຕະຫຼອດຮອດການຈັບຄູ່ທຸລະກິດ (Business Matching) ລະຫວ່າງ ຜູ້ປຸງແຕ່ງ ແລະ ຜູ້ປະກອບການທຸລະກິດກະສິກໍາ, ຫັດຖະກໍາ ໃຫ້ມີມູນຄ່າທີ່ສູງຂື້ນ.
ຈາກນັ້ນ ກໍມີການຕັດແຖບຜ້າເປີດງານ ໂດຍການໃຫ້ກຽດຕັດແຖບຜ້າເປີດງານຂອງ​ ທ່ານ ປອ.ວິໄລວົງ ບຸດດາຄໍາ​ ເຈົ້າແຂວງຈໍາປາສັກ,​ ທ່ານ ນາງ ຈັນສຸກ ແສງພະຈັນ ຮອງລັດຖະມົນຕີກະຊວງ ອຸດສາຫະກໍາ ແລະ ການຄ້າ.​ ມີການນໍາ​ ແລະ​ ແຂກ​ ເຂົ້າຮ່ວມ.​ ຕອນ​ທ້າຍ​ ຄະນະຮັບຜິດຊອບຈັດງານ ກໍໄດ້ນໍາພາແຂກ​ ແລະ​ ການນໍາ​ ທ່ຽວຊົມຫ້ອງວາງສະແດງຕົວແບບ,​ ທ່ຽວຊົນ 4 ຫ້ອງສິນຄ້າທ່າແຮງ 4 ແຂວງ ແລະ ມອບຂອງທີ່ລະນຶກ ໃຫ້ກັບການນໍາຕ່າງໜ້າບັນດາແຂວງ​ ຕື່ມອີກ.
ຂຽນ:ປະພິດ ສີສົມບູນ