ໂອກາດຄໍາຂອງປັນຍາປະດິດໃນການເຊື່ອມຕໍ່ດ້ານເຕັກໂນໂລຊີລະຫວ່າງຈີນ-ອາຊຽນ
ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ 15 ຂອງຈີນ ໄດ້ຜ່ານການຄົ້ນຄວ້າປະກອບຄໍາເຫັນຢູ່ກອງປະຊຸມຄົບຄະນະ ຄັ້ງທີ 4 ຂອງຄະນະກໍາມະການສູນກາງພັກຄອມມູນິດຈີນ ຄັ້ງທີ 20 ທີ່ຈັດຂຶ້ນເມື່ອບໍ່ດົນມານີ້, ເຊິ່ງໜຶ່ງໃນຫຼາຍຂໍ້ສະເໜີທີ່ສູນກາງພັກຄອມມູນິດຈີນມີຕໍ່ແຜນພັດທະນານີ້ ແມ່ນການຍົກລະດັບການເພິ່ງພາອາໄສຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງໃນດ້ານວິທະຍາສາດເຕັກໂນໂລຊີໃຫ້ສູງຂຶ້ນຢ່າງໃຫຍ່ຫຼວງ, ໃນນັ້ນ ລວມທັງການນໍາໃຊ້ AI ເຂົ້າໃນທຸກຂົງເຂດວຽກງານ ແລະ ການແບ່ງ ປັນບົດຮຽນທີ່ດີຂອງຈີນໃຫ້ແກ່ໂລກ, ເຊິ່ງລວມທັງປະເທດສະມາຊິກອາຊຽນ.
ຈີນ ແລະ ອາຊຽນ ໄດ້ຮ່ວມມືກັນຢ່າງຕໍ່ເນື່ອງໃນດ້ານ AI ເພາະເປັນເຕັກໂນໂລຊີ ໃໝ່ ແລະ ສໍາຄັນໃນການຂັບເຄື່ອນການພັດທະນາເສດຖະກິດ-ສັງຄົມ. ເຊິ່ງຫຼ້າສຸດໃນວັນທີ 18 ກັນຍາ 2025, ສອງຝ່າຍໄດ້ຮ່ວມກັນສ້າງສູນຮ່ວມມືການນຳໃຊ້ AI ຈີນ-ອາຊຽນ ຢູ່ນະຄອນໜານໜິງເຂດປົກຄອງຕົນເອງເຜົ່າຈ້ວງກວາງຊີຂອງຈີນ. ມາຮອດປັດຈຸບັນ, ສູນດັ່ງກ່າວ ໄດ້ສ້າງຕັ້ງສູນຢູ່ຕ່າງປະເທດໃນປະເທດລາວ, ອຳນວຍຄວາມສະດວກໃນການເຊັນສັນຍາໂຄງການ AI ພາຍໃນປະເທດ 61 ໂຄງການ, ບັນລຸຂໍ້ຕົກລົງຮ່ວມມືກັບບໍລິສັດຕ່າງປະເທດ 22 ແຫ່ງ, ເປີດເຜີຍເຕັກໂນໂລຊີການແປພາສາຫຼາຍພາສາ ແລະ ວິທີແກ້ໄຂການໄຫຼວຽນຂໍ້ມູນຂ້າມຊາຍແດນ ແລະ ໄດ້ເຊັນໂຄງການຮ່ວມມືດ້ານອຸດສາຫະກຳທີ່ກວມເອົາການຂົນສົ່ງດ້ວຍລະບົບອັດສະລິຍະ, ກະສິກຳ ແລະ ຂົງເຂດອື່ນໆ.
ຈີນ ແລະ ອາຊຽນຍັງໄດ້ຮ່ວມກັນຊຸກຍູ້ການສ້າງດ່ານອັດສະລິຍະ ເຊັ່ນ: ການສ້າງດ່ານອັດສະລິຍະບໍ່ຫານ ເຮັດໃຫ້ເວລາກວດກາເພື່ອປ່ອຍຜ່ານລົດບັນທຸກສິນຄ້າຫຼຸດລົງຢ່າງຫຼວງຫຼາຍ, ຈາກ 8-10 ນາທີໃນເມື່ອກ່ອນ ຫຼຸດລົງເຫຼືອແຕ່ 4 ນາທີໃນປັດຈຸບັນ ເຊິ່ງໄດ້ຍົກສູງປະສິດທິພາບຂອງການຜ່ານດ່ານຢ່າງຫຼວງຫຼາຍ ແລະ ໄດ້ຊຸກຍູ້ການອໍານວຍຄວາມສະດວກສະບາຍທາງດ້ານການຄ້າໃນພາກພື້ນຢ່າງແຂງແຮງ ແລະ ອື່ນໆ.
ຈີນເປັນຜູ້ນຳລະດັບໂລກໃນການພັດທະນາ AI. ປະສົບການອັນກວ້າງຂວາງຂອງຈີນໃນການສ້າງລະບົບນິເວດ AI, ການຂະຫຍາຍຂະໜາດຂອງການໃຊ້ງານ ແລະ ການຄຸ້ມຄອງການປ່ຽນຜ່ານດິຈິຕອນ ເຮັດໃຫ້ຈີນມີຕຳແໜ່ງທີ່ພິເສດໃນການຊ່ວຍເຫຼືອບັນດາເສດຖະກິດທີ່ກຳລັງພັດທະນາໃນການນໍາເອົາ AI ໄປນໍາໃຊ້ຢ່າງມີຄວາມຮັບຜິດຊອບ. ເສດຖະກິດກຳລັງພັດທະນາໃນເຂດໂລກໃຕ້ ຕ່າງຫັນໜ້າສູ່ຈີນເພື່ອຂໍຄຳແນະນຳໃນການນຳໃຊ້ AI ເຂົ້າໃນການເພີ່ມຜົນຜະລິດໃນຂະນະທີ່ຍັງສາມາດຮັກສາຄວາມປອງດອງທາງສັງຄົມ.
ໃນໄລຍະສອງສາມປີມານີ້, ເສດຖະກິດຂອງຫຼາຍປະເທດສະມາຊິກອາຊຽນ ພົບກັບຄວາມຫຍຸ້ງຍາກລໍາບາກຍ້ອນການຢຸດສະງັກຂອງຕ່ອງໂສ້ການສະໜອງ ແລະ ການຫຼຸດລົງຂອງການຄ້າໂລກ. ທຸລະກິດຫຼາຍແຫ່ງປິດຕົວລົງ ຫຼື ຫຼຸດຂະໜາດການດຳເນີນທຸລະກິດ ເຊິ່ງນຳໄປສູ່ການເລີກຈ້າງງານຂະໜາດໃຫຍ່. ຄົນງານຈຳນວນຫຼາຍທີ່ຖືກເລີກຈ້າງງານຍັງບໍ່ສາມາດຫາງານໃໝ່ຍ້ອນທັກສະຂອງພວກເຂົາບໍ່ກົງກັບຄວາມຕ້ອງການໃໝ່ຂອງອຸດສາຫະກຳ.
ສິ່ງດັ່ງກ່າວຄືຈຸດທີ່ຈີນ ແລະ ອາຊຽນ ສາມາດສ້າງການຮ່ວມມືກັນທີ່ເລິກເຊິ່ງກວ່າເກົ່າໃນໂຄງການການຝຶກອົບຮົມທັກສະໃໝ່ ແລະ ການສຶກສາທີ່ຂັບເຄື່ອນໂດຍ AI. ປະ ສົບການຂອງຈີນໃນຂົງເຂດເຫຼົ່ານີ້ ສາມາດນຳມາໃຊ້ເພື່ອຊ່ວຍໃຫ້ເສດຖະກິດອາຊຽນໃນການພັດທະນາຄວາມສາມາດພາຍໃນປະເທດຂອງຕົນສຳລັບການປ່ຽນແປງກຳລັງແຮງງານ. ໂດຍການຮ່ວມມືກັບລັດຖະບານປະເທດສະມາຊິກອາຊຽນ ແລະ ສະຖາບັນການສຶກສາ, ພາກສ່ວນທີ່ກ່ຽວຂ້ອງຂອງລັດຖະບານຈີນ ແລະ ບໍລິສັດເອກະຊົນສາມາດຊ່ວຍພັດທະນາຮູບແບບການຮຽນຮູ້ AI ທີ່ຖືກອອກແບບໂດຍສະເພາະເພື່ອຕອບສະໜອງຄວາມຕ້ອງການຂອງທ້ອງຖິ່ນ. ການເຄື່ອນໄຫວດັ່ງກ່າວ ຈະບໍ່ພຽງແຕ່ເພີ່ມຜົນຜະລິດໃນລະດັບພາກພື້ນ ເທົ່ານັ້ນ, ຍັງຈະເສີມສ້າງການເຊື່ອມໂຍງທາງດ້ານເສດຖະກິດລະຫວ່າງຈີນ-ອາ ຊຽນ ອີກດ້ວຍ.
ໂອກາດການພັດທະນາອັນໃໝ່ໆ ລະຫວ່າງຈີນ-ອາຊຽນ ຈະເກີດຂຶ້ນຢ່າງຫຼວງຫຼາຍ ເມື່ອແຜນພັດທະນາ 5 ປີ ຄັ້ງທີ 15 ຂອງຈີນເປັນຮູບຮ່າງທີ່ຊັດເຈນ ກໍຄື ພາຍຫຼັງຖືກຮັບຮອງຢ່າງເປັນທາງການ ເຊິ່ງຈະເຮັດໃຫ້ AI ຍິ່ງຈະມີບົດບາດພົ້ນເດັ່ນຂຶ້ນ ເນື່ອງຈາກແຜນພັດທະນາດັ່ງກ່າວມີເປົ້າໝາຍເພື່ອນໍາເອົາກົດລະບຽບໃໝ່ ແລະ ວິທີເຮັດວຽກໃໝ່ກ່ຽວກັບ AI ມານໍາໃຊ້ ແລະ ຈະເຮັດໃຫ້ບົດຮຽນຂອງຈີນໃນດ້ານນີ້ເປັນສິ່ງທີ່ປະເມີນຄ່າບໍ່ໄດ້ສໍາລັບອາຊຽນ ແລະ ຈະກາຍເປັນໂອກາດຄໍາຂອງປັນຍາປະດິດໃນການເຮັດໜ້າທີ່ເຊື່ອມຕໍ່ດ້ານເຕັກໂນໂລຊີລະຫວ່າງຈີນ-ອາຊຽນ ໃຫ້ນັບມື້ດີຂຶ້ນກວ່າເກົ່າ.
ໃນນີ້, ເວົ້າສະເພາະປະເທດລາວ ທີ່ໄດ້ຮ່ວມມືກັບຈີນເພື່ອບຸກເບີກເສັ້ນທາງໃໝ່ຂອງການຮ່ວມມືດ້ານ AI ໂດຍໄດ້ຮ່ວມກັນລົງນາມໃນສັນຍາວ່າດ້ວຍການຮ່ວມກັນສ້າງສູນຮ່ວມມືການປະດິດສ້າງໃໝ່ດ້ານ AI ຢູ່ນະຄອນຫຼວງວຽງຈັນ ໄດ້ກາຍເປັນເວທີການຮ່ວມມືປະດິດສ້າງໃໝ່ດ້ານປັນຍາປະດິດແຫ່ງທຳອິດລະຫວ່າງຈີນກັບອາຊຽນ ເພື່ອຍົກລະດັບຄວາມສາມາດພື້ນຖານຂອງລາວໃຫ້ສູງຂຶ້ນຢ່າງເປັນລະບົບໃນຍຸກ AI. ນອກຈາກນີ້ ລາວຍັງໄດ້ຮ່ວມມືກັບຈີນກ່ຽວກັບ AI ໃນຫຼາຍຂົງເຂດ ແລະ ຈະກາຍເປັນແຮງຂັບເຄື່ອນສໍາຄັນໃນການຜັນຂະຫຍາຍນະໂຍບາຍ “ໜຶ່ງແລວທາງໜຶ່ງເສັ້ນທາງ” ກໍຄືໃນການຮ່ວມມືກັນຫັນເປັນ ດິຈິຕອນລະຫວ່າງລາວ ແລະ ຈີນ, ທັງເປັນໂອກາດຂະຫຍາຍການຮ່ວມມືດ້ານ AI ກັບບັນ ດາປະເທດສະມາຊິກອາຊຽນ ຕື່ມອີກ.
ປັດຈຸບັນ, ຫຼາຍປະເທດໃນອາຊຽນ ກໍຄື ທົ່ວໂລກ ຕ່າງໃຫ້ຄວາມສໍາຄັນຢ່າງກວ້າງ ຂວາງກ່ຽວກັບການນໍາໃຊ້ AI ເຂົ້າໃນການພັດທະນາເສດຖະກິດ-ສັງຄົມຂອງປະເທດ, ສະນັ້ນ ແຜນພັດທະນາ 5 ປີ ຄັ້ງທີ 15 ຂອງຈີນ ທີ່ຈະເນັ້ນໃສ່ການເປີດກວ້າງການເປີດປະຕູສູ່ພາຍນອກໃນລະດັບສູງຢ່າງບໍ່ຢຸດຢັ້ງ, ພ້ອມທັງຈະພັດທະນາດ້ານວິທະຍາສາດເຕັກໂນໂລຊີ ແລະ ແບ່ງປັນບົດຮຽນໃນດ້ານນີ້ໃຫ້ພາຍນອກຫຼາຍຂຶ້ນກວ່າເກົ່າໃຫ້ແກ່ໂລກ ຈະກາຍ ເປັນໂອກາດຄໍາຂອງ AI ໃນການເຊື່ອມຕໍ່ດ້ານເຕັກໂນໂລຊີ ລະຫວ່າງຈີນ-ອາຊຽນ, ທັງສອດຄ່ອງກັບເປົ້າໝາຍສ້າງຄວາມຈະເລີນຮຸ່ງເຮືອງຮ່ວມກັນ ແລະ ສ້າງຜົນປະໂຫຍດເຊິ່ງກັນ ແລະ ກັນລະຫວ່າງຈີນ-ອາຊຽນ ກໍຄື ຈະຊ່ວຍເສີມສ້າງສາຍພົວພັນຄູ່ຮ່ວມຍຸດທະສາດຮອບດ້ານລະຫວ່າງຈີນ-ອາຊຽນ ແລະ ປະກອບສ່ວນເຂົ້າໃນການຊຸກຍູ້ການສ້າງປະຊາຄົມຮ່ວມຊາຕາກຳລະຫວ່າງ ຈີນ-ອາຊຽນ ໃຫ້ນັບມື້ແໜ້ນແຟ້ນກວ່າເກົ່າ.