ທີມນັກຮຽນຈາກໂຮງຮຽນນາໆຊາດລາວ ສາມາດຄວ້າລາງວັນໄດ້ 3 ຫຼຽນເງິນ ໃນການແຂ່ງຂັນເລກ Maths Olympiad ທີ່ນະຄອນພະນົມເປັນ ປະເທດກຳປູເຈຍ ເຊິ່ງຈັດຂຶ້ນໃນວັນທີ 22 ທັນວາ 2024 ຜ່ານມາ.
ໃນຜົນສຳເລັດອັນໂດດເດັ່ນນີ້ ໂຮງຮຽນນາໆຊາດລາວ (ISL) ສາມາດຍາດໄດ້ 3 ຫຼຽນເງິນ ຈາກການແຂ່ງຂັນເລກ the Angkor Math Competition (AMC) ຮອບທົ່ວໂລກ ທີ່ຈັດຂຶ້ນຢູ່ປະເທດກຳປູເຈຍ ສຳລັບການແຂ່ງຂັນໃນລາຍການນີ້ ມີນັກຮຽນເຂົ້າຮ່ວມຫຼາຍກ່ວາ 6.500 ນ້ອງ ທີ່ມາຈາກ 16 ປະເທດ ຫຼັງຈາກການແຂ່ງຂັນຮອບອອນໄລ ມີຈຳນວນນັກຮຽນປະມານ 3.000 ນ້ອງ ທີ່ໄດ້ເຂົ້າຮ່ວມການແຂ່ງຂັນຮອບສຸດທ້າຍໃນຮອບທົ່ວໂລກ ເຊິ່ງທີມໂຮງຮຽນນາໆຊາດລາວ ມີຄວາມພາກພູມໃຈຫຼາຍທີ່ໄດ້ເປັນຕົວແທນໃຫ້ແກ່ປະເທດລາວ.
ໃນປີນີ້ AMC ໄດ້ຮວບຮ່ວມເອົານັກຄະນິດສາດໄວໜຸ່ມ ທີ່ເກັ່ງທີ່ສຸດຈາກປະເທດທົ່ວໂລກ ມາຮ່ວມການແຂ່ງຂັນ ເຊິ່ງປະກອບມີປະເທດກຳປູເຈຍ ສະຫະລັດອາເມລິກາ ຈີນ ລາວ ເກົາຫຼີໃຕ້ ຄຣີກິສຖານປຮົງກົງ ໄທ ຟິລິບປິນ ເຕິກເມັນນິສຖານ ມົງໂກເລຍ ອາເຊີໄບຈານ ມຽນມາ ທາຈີກິສຖານ ຫວຽດນາມ ແລະ ປະເທດມາເລເຊຍ ເຖິງແມ່ນວ່າຈະມີການແຂ່ງຂັນທີ່ດຸເດືອດ ທີມຂອງໂຮງຮຽນນາໆຊາດລາວ (ISL) ໄດ້ສະແດງໃຫ້ເຫັນຖິງຄວາມສາມາດທາງດ້ານຄະນິດສາດ ການອຸທິດຕົນ ແລະ ຄວາມພະຍາຍາມ ເພື່ອໃຫ້ໄດ້ຮັບຫຼຽນເງິນ ການເປັນຕົວແທນຂອງປະເທດລາວ ແລະ ໄດ້ຮັບໄຊຊະນະໃນການແຂ່ງຂັນໃນຮອບທົ່ວໂລກ ເປັນຜົນສໍາເລັດທີ່ສັງໜ້າເກດໃນຂະໜາດນີ້ ສະແດງໃຫ້ເຫັນເຖິງຄຸນນະພາບຂອງນັກຮຽນ ແລະ ການຖືກຍອມຮັບຂອງປະເທດລາວ ໃນແວດວົງວິຊາການລະດັບສາກົນທີ່ເພີ່ມຂຶ້ນ.
ຄວາມສໍາເລັດນີ້ ບໍ່ພຽງແຕ່ເປັນໄຊຊະນະຂອງໂຮງຮຽນນາໆຊາດລາວ (ISL) ແຕ່ຍັງເປັນຄວາມພູມ ໃຈຂອງປະເທດຊາດ ນັກຮຽນ ISL ໄດ້ສືບຕໍ່ພິສູດວ່າ ດ້ວຍຄວາມພະຍາຍາມຢ່າງໜັກໜ່ວງ ແລະ ມີຄວາມມັກຮັກໃນການຮຽນຮູ້ ປະເທດລາວສາມາດຢືນຢູ່ຄຽງຂ້າງປະເທດ ມະຫາອຳນາດທາງວິຊາການໃນທົ່ວໂລກ ເຊິ່ງສະແດງໃຫ້ເຫັນເຖິງທ່າແຮງທີ່ບໍ່ມີຂີດຈຳກັດຂອງໄວໜຸ່ມພວກເຮົາ.
ນອກຈາກປະສົບຜົນສຳເລັດທາງດ້ານວິຊາການແລ້ວ ນັກຮຽນຍັງໄດ້ມີໂອກາດພົບປະແລກປ່ຽນວັດທະນະທຳ ຢ້ຽມຢາມປະເທດກຳປູເຈຍ ສິງກະໂປ ແລະ ປະເທດມາເລເຊຍ ໃນໄລຍະ 10 ມື້ ຂໍສະແດງຄວາມຂອບໃຈເປັນພິເສດໄປຍັງ ກະຊວງສຶກສາທິການ ໄວໜຸ່ມ ແລະ ກິລາ ຂອງປະເທດກຳປູເຈຍ ແລະ ທ່ານ Hang Chuon Naron ລັດຖະມົນຕີກະຊວງສຶກສາ ໄວໜຸ່ມ ແລະ ກິລາ ທີ່ໃຫ້ການຕ້ອນຮັບນັກຮຽນ ແລະ ມອບໂອກາດໃຫ້ພວກເຂົາໄດ້ສຳຜັດກັບການຕ້ອນຮັບຢ່າງອົບອຸ່ນ ໃນຮູບແບບຂອງປະເທດກຳປູເຈຍ ພ້ອມທັງໄດ້ພົບປະໝູ່ເພື່ອນຈາກຫຼາຍປະເທດໃນທົ່ວໂລກ.
ໃນອະນາຄົດຂ້າງໜ້າ ຄວາມສຳເລັດທີ່ສືບຕໍ່ຂອງນັກຮຽນລາວ ໃນເວທີລະດັບສາກົນ ແມ່ນເປັນການສ້າງແຮງກຳລັງໃຈໃຫ້ຄົນລຸ້ນຫຼັງ ຜົນສໍາເລັດຂອງທີມ ISL ບໍ່ພຽງແຕ່ເປັນໄຊຊະນະທາງວິຊາການ ແຕ່ເປັນສັນຍາລັກຂອງສິ່ງທີ່ເປັນໄປໄດ້ໃນເວລາທີ່ພອນສະຫວັນ ການອຸທິດຕົນ ແລະ ການສະໜັບສະໜູນມາຢູ່ຮ່ວມກັນ ມີການເພີ່ມຂຶ້ນໃນແງ່ດີສໍາລັບອະນາຄົດ ຂັບເຄື່ອນໂດຍຜົນສໍາເລັດຢ່າງຕໍ່ເນື່ອງຂອງທີມ ISL ແລະ ໂອກາດອັນໃຫຍ່ຫຼວງລໍຖ້າໄວໜຸ່ມ ທີ່ເປັນແຂນຂວາຂອງປະເທດຊາດ.
ທີ່ມາ: ວຽງຈັນໃໝ່
