ບັນດາທ່ານທີ່ມີບັນຫາກ່ຽວກັບແກ່ນຕາຂຸ້ນ ຈະໄດ້ຮັບການຜ່າຕັດແກ່ນຕາຂຸ້ນໂດຍບໍ່ເສຍຄ່າ, ເລີ່ມແຕ່ມື້ນີ້ ຈົນຮອດທ້າຍປີ 2024 ຢູ່ທີ່ໂຮງໝໍ ບໍລິເວນ 106 ກອງທັບ ເມືອງບາຈຽງ ແຂວງຈໍາປາສັກ.
ຖ້າວ່າຕາທ່ານເຫັນບໍ່ແຈ້ງຄ້າຍຄືໝອກຂາວ ແມ່ນອາດຈະເປັນພະຍາດແກ່ນຕາຂຸ້ນ ຊຶ່ງມູນນິທິ GX ສາມາດກວດແກ່ນຕາໃຫ້ທ່ານໄດ້ ແລະ ຖ້າທ່ານເປັນແກ່ນຕາຂຸ້ນ ຈະມີຊ່ຽວຊານຕາ ຈາກ ສປ ຈີນ ເຮັດການຜ່າຕັດໃນລົດຜ່າຕັດເຄື່ອນທີ່ໃຫ້ແກ່ທ່ານ, ໂດຍທ່ານສາມາດໂທລະສັບສອບຖາມໄດ້ ທີ່ເບີ 020 22113328.
ພະຍາດສາຍຕາຂຸ້ນ (ແກ່ນຕາຂຸ້ນ) ຈະມີອາການເປັນໄປຢ່າງຊ້າໆບໍ່ເຈັບປວດ ແລະ ເຮັດໃຫ້ສາຍຕາໃນການເບິ່ງເຫັນເລີ່ມຫຼຸດລົງ, ແກ່ນຕາຂຸ້ນ ຍັງເກີດຈາກສະພາບແກ່ນຕາມີການປ່ຽນແປງ ແລະ ຍັງເປັນສາເຫດເຮັດໃຫ້ຄົນຕາບອດໄດ້ຖ້າບໍ່ໄດ້ຮັບການປິ່ນປົວດ້ວຍວິທີຜ່າຕັດ ແລະ ໃສ່ແກ່ນຕາທຽມ, ສະນັ້ນ ຖ້າໄດ້ຮັບການຜ່າຕັດ, ປິ່ນປົວໃຫ້ຖືກວິທີກໍຈະຫາຍດີໄດ້.
ປັດໄຈທີ່ພາໃຫ້ເປັນພະຍາດແກ່ນຕາຂຸ່ນຄື: ເບົາຫວານ, ມີການອັກເສບຕາ, ມີຄອບຄົວທີ່ເປັນແກ່ນຕາຂຸ້ນ, ການໃກ້ຊິດກັບຄວັນໄຟຫຼາຍເກີນໄປ, ການສຳຜັດກັບແສງແດດທີ່ກ້າ ແລະ ບໍ່ໃສ່ແວ່ນປ້ອງກັນ ແລະ ອື່ນໆ.
ທີ່ມາ: ວຽງຈັນທາຍ
