ໄຂກອງປະຊຸມໃຫຍ່ຜູ້ແທນອົງຄະນະພັກເມືອງປາກແຊງ ຄັ້ງທີ VII

ກອງປະຊຸມໃຫຍ່ ຜູ້ແທນອົງຄະນະພັກເມືອງປາກແຊງ ແຂວງຫຼວງພະບາງ ຄັ້ງທີ VII ໄຂຂື້ນໃນຕອນເຊົ້າຂອງວັນທີ່ 13 ກຸມພາ 2025 ນີ້ ທີ່ສະໂມສອນຫຼັງໃໝ່ຂອງເມືອງ. ມີ ສະຫາຍ ຄໍາຂັນ ຈັນທະວີສຸກ ກຳມະການສູນກາງພັກ ເລຂາຄະນະບໍລິ ຫານງານພັກແຂວງຫຼວງພະບາງ ພ້ອມດ້ວຍຜູ້ແທນຮັບເຊີນ ແລະຜູ້ແທນສົມບູນ ຈຳນວນ 112 ສະຫາຍ ຍີງ 7 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກໃນທົ່ວເມືອງຫຼາຍກວ່າ 1,400 ສະຫາຍ ເຂົ້າຮ່ວມ.

ສະຫາຍ ດວງເພັດ ຢວນໄຊສົມແພງ ຮັກສາການແທນເລຂາພັກເມືອງປາກແຊງ ໄດ້ຂື້ນກ່າວໄຂກອງປະຊຸມວ່າ: ກອງປະຊຸມໃຫຍ່ ຄັ້ງນີ້ ມີໜ້າທີ່ຄົ້ນຄວ້າ ແລະຮັບຮອງເອົາລາຍງານການເມືອງ ແລະແຜນພັດທະນາເສດຖະກິດ-ສັງຄົມ ຂອງເມືອງ ໄລຍະ 2025-2029 ແລະບົດສໍາຫຼວດການນຳພາລວມຂອງຄະນະພັກ ພ້ອມ ກັນນັ້ນ ຈະໄດ້ເລືອກຕັ້ງເອົາຄະນະບໍລິຫານງານພັກເມືອງຊຸດໃໝ່ ເພື່ອສືບຕໍ່ນຳພາຊີ້ນຳ ພາລະກິດໃນການປົກປັກຮັກສາ ແລະສ້າງສາພັດທະນາເມືອງປາກແຊງ ໃຫ້ກ້າວຂຶ້ນຢ່າງຕໍ່ເນື່ອງສູ່ຈຸດໝາຍທີ່ວາງໄວ້. ຈຶ່ງຮຽກຮ້ອງຜູ້ແທນທຸກສະຫາຍ ຈົ່ງສຸ່ມສະຕິປັນຍາເຊີດຊູຄວາມເປັນເຈົ້າການ ແລະຄວາມຮັບຜິດຊອບທາງດ້ານການເມືອງໃຫ້ສູງ, ເຂົ້າໃນການຄົ້ນຄວ້າຕົກລົງບັນຫາສຳຄັນ ໃຫ້ເລິກເຊິ່ງຖືກຕ້ອງ ເຮັດໃຫ້ກອງປະຊຸມໃຫຍ່ຄັ້ງນີ້ ດຳເນີນໄປດ້ວຍດີ ແລະມີຜົນສຳເລັດ ຢ່າງຈົບງາມ.

ຈາກນັ້ນ ສະຫາຍ ທອງສີງ ໄຊຍະສຸກ ຮອງເລຂາພັກເມືອງ ໄດ້ຂື້ນຜ່ານຮ່າງບົດລາຍງານການເມືອງ ເຊີ່ງຜ່ານມາອົງຄະນະພັກເມືອງ ໄດ້ຕັ້ງໜ້າສຶກສາອົບຮົມການເມືອງ-ແນວຄິດ, ເຊື່ອມຊຶມບັນດາເອກະສານສຳຄັນ ຂອງພັກ ດ້ວຍຫຼາຍຮູບການ ຢ່າງເປັນປົກກະຕິ ອັນໄດ້ເຮັດໃຫ້ ສະມາຊິກພັກ, ພະນັກງານ, ປະຊາຊົນບັນດາເຜົ່າ ໄດ້ຮັບຮູ້ ແລະເຂົ້າໃຈຕໍ່ແນວທາງປ່ຽນແປງໃໝ່ຢ່າງມີຫຼັກການຂອງພັກແຕ່ລະໄລຍະ; ການກໍ່ສ້າງພັກ ໄດ້ປະຕິບັດຕາມກົດລະບຽບຂອງພັກຢ່າງເຂັ້ມງວດ, ຮັບເອົາຜູ້ມີມາດຖານເງື່ອນໄຂເຂົ້າພັກ, ເດັດດ່ຽວເອົາຜູ້ເຊື່ອມຄຸນປ່ຽນທາດ ອອກຈາກການຈັດຕັ້ງພັກ ອັນໄດ້ເຮັດໃຫ້ການຈັດຕັ້ງພັກ ແລະຖັນແຖວສະມາຊິກພັກ ມີການເຕີບໃຫຍ່ຂະຫຍາຍຕົວ, ມີຄວາມປອດໃສ ເຂັ້ມແຂງ ໜັກແໜ້ນ, ຈໍານວນໜ່ວຍພັກ ໄດ້ເພີ່ມຂຶ້ນ 1 ໜ່ວຍພັກ, ສະມາຊິກພັກເພີ່ມຂຶ້ນ 151 ສະຫາຍ, ມີສະມາຊິກພັກແຂງກວມ 87%, ໜ່ວຍພັກປອດໃສ, ເຂັ້ມແຂງ ແລະໜັກແໜ້ນ ກວມ 96,66%; ຄະນະພັກແຕ່ລະຂັ້ນໄດ້ຍຶດໝັ້ນ ປະຕິບັດແບບແຜນວິທີນໍາພາ ເປັນແບບຢ່າງນໍາໜ້າຂອງສະມາຊິກພັກ ແລະການຈັດຕັ້ງພັກ; ເອົາໃຈໃສ່ຕໍ່ວຽກງານບໍາລຸງ-ກໍ່ສ້າງພະນັກງານ ດ້ວຍຫຼາຍຮູບການ ເປັນຕົ້ນ ສົ່ງລົງກໍ່ສ້າງຮາກຖານການເມືອງ, ສົ່ງໄປຍົກລະດັບ ດ້ານທິດສະດີການເມືອງ, ດ້ານວິຊາສະເພາະ ຢູ່ພາຍໃນ ແລະຕ່າງປະເທດ ທັງໄລຍະສັ້ນ ແລະໄລຍະຍາວທັງໝົດ 109 ສະຫາຍ, ຍິງ 28 ສະຫາຍ ຕາມແຜນກໍານົດສ້າງແຕ່ລະໄລຍະ ຕາມທິດຫັນເປັນໜຸ່ມ, ຜ່ານຝຶກຝົນຫຼໍ່ຫຼອມ ແລະທົດສອບໃນຂະບວນການວຽກງານຕົວຈິງ ໄດ້ມີການຈັດວາງ, ຊັບຊ້ອນ ໃຫ້ເໝາະສົມກັບຄວາມຮູ້-ຄວາມສາມາດ ແລະປະສົບການຕົວຈິງ ຕິດພັນກັບການປະຕິບັດນະໂຍບາຍ ຕາມລະບຽບການຢ່າງເໝາະສົມ. ວຽກງານກວດກາ ໄດ້ຮັບການປັບປຸງເຂັ້ມແຂງກວ່າເກົ່າ, ສາມາດແກ້ໄຂປະກົດການຫຍໍ້ທໍ້, ຄໍາຮ້ອງ-ຄໍາສະເໜີ ຂອງບຸກຄົນ ແລະການຈັດຕັ້ງ ທີ່ສວຍໂອກາດລະເມີດລະບຽບກົດໝາຍ ຫຼຸດລົງເປັນກ້າວໆ.

ກອງປະຊຸມໃຫຍ່ຄັ້ງນີ້ ດຳເນີນພາຍໃຕ້ຄໍາຂວັນ “ປັບປຸງການນໍາພາ ຂອງຄະນະໜ່ວຍພັກໃຫ້ເຂັ້ມແຂງ, ໜັກແໜ້ນ, ສ້າງເງື່ອນໄຂໃຫ້ເມືອງປາກແຊງ ເປັນເມືອງພົ້ນທຸກ, ຊຸກຍູ້ການລ້ຽງສັດໃຫຍ່, ປູກພືດອຸດສາຫະກໍາ ເປັນສິນຄ້າຕາມທິດສີຂຽວ ແລະ ຍືນຍົງ”, ເຊີ່ງພາຍຫຼັງສໍາເລັດການຜ່ານຮ່າງບົດລາຍງານການເມືອງທັງສອງພາກ ຜູ້ເຂົ້າຮ່ວມ ໄດ້ຮັບຟັງການຜ່ານແຜນພັດທະນາເສດຖະກິດ-ສັງຄົມ, ການປະກອບຄຳເຫັນຈາກຕົວແບບແຕ່ລະດ້ານ, ທັງຈະໄດ້ຮັບຟັງການຜ່ານບົດສຳຫຼວດການນຳພາລວມ ຂອງຄະນະບໍລິຫານງານພັກເມືອງ ສະໄໝທີ່ VI, ທັງຈະໄດ້ປ່ອນບັດຄັດເລືອກເອົາ ຄະນະບໍລິຫານງານພັກເມືອງຊຸດທີ່ VII ໂດຍຈະດໍາເນີນເປັນເວລາ 1 ວັນເຄີ່ງຈະສໍາເລັດ.

ຂ່າວ: ອາພຸດເດດ ບຸບຜາ, ພາບ: ທະນູສີນ ອິດທິພົນ