ກອງປະຊຸມໃຫຍ່ ຜູ້ແທນອົງຄະນະພັກ ເມືອງໂພນໂຮງແຂວງວຽງຈັນ ຄັ້ງທີ VIII ໄຂຂຶ້ນ ໃນວັນທີ 10 ມີນາ 2025 ໂດຍການ ເຂົ້າຮ່ວມຂອງ ສະຫາຍ ຄຳພັນ ສິດທິດຳພາ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆວຽງຈັນ.
ສະຫາຍ ສົມປະສົງ ສຸວົງຄຳຈັນ ກຳມະການພັກແຂວງ, ເລຂາພັກເມືອງ, ເຈົ້າເມືອງໆໂພນໂຮງ ໄດ້ກ່າວວ່າ: ກອງປະຊຸມໃຫຍ່ຄັ້ງນີ້ ຈະໄດ້ສຸມໃສ່ຄົ້ນຄວ້າພິຈາລະນາຮັບຮອງເອົາຮ່າງລາຍງານການເມືອງ, ແຜນພັດທະນາເສດຖະກິດ-ສັງຄົມ 05 ປີ ແລະ ທິດທາງຄາດໝາຍສູ້ຊົນ ໃນຊຸມປີຕໍ່ໜ້າ ແລະ ຄົ້ນຄວ້າຮັບຮອງເອົາບົດສໍາຫລວດການນໍາພາລວມ ຂອງຄະນະພັກເມືອງໂພນໂຮງ ສະໄໝທີ VII. ພ້ອມນີ້, ຈະໄດ້ດໍາເນີນການປ່ອນບັດເລືອກຕັ້ງເອົາຄະນະບໍລິຫານງານພັກເມືອງຊຸດໃໝ່ ເພື່ອສືບຕໍ່ນໍາພາຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ VIII ໃຫ້ປະກົດຜົນເປັນຈິງ ແລະ ເລືອກເອົາຜູ້ແທນເພື່ອເປັນຕົວແທນຂອງອົງຄະນະພັກເມືອງ ໄປຮ່ວມກອງປະຊຸມໃຫຍ່ຜູ້ແທນອົງຄະນະພັກແຂວງ ຄັ້ງທີ VII ໃນຕໍ່ໜ້າ.
ນອກຈາກນີ້, ກອງປະຊຸມໃຫຍ່ຄັ້ງນີ້ຈະໄດ້ຮັບຟັງການໂອ້ລົມຈາກສະຫາຍ ຄໍາພັນ ສິດທິດຳພາ ກໍາມະການສູນກາງພັກ, ເລຂາພັກແຂວງ, ເຊິ່ງຈະເປັນທິດຊີ້ນໍາທາງດ້ານແນວຄິດ-ທິດສະດີ, ພຶດຕິກໍາຕົວຈິງ ໃຫ້ແກ່ຄະນະບໍລິຫານງານພັກເມືອງຊຸດໃໝ່ ແລະ ຜູ້ແທນກອງປະຊຸມ ໃນການປະຕິບັດໜ້າທີ່ວຽກງານ ກໍຄືການຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ຄັ້ງນີ້ ໃຫ້ປະກົດຜົນເປັນຈິງ.
