ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ຫຼວງນໍ້າທາ ເລັ່ງປັບປຸງຄຸນນະພາບການສຶກສາໃຫ້ດີຂຶ້ນ
ພິທີເຊັນບົດບັນທຶກຄວາມເຂົ້າໃຈໂຄງການສົ່ງເສີມທາງເລືອກຊຸມຊົນ ໃນການພັດທະນາການສຶກສາ ລະຫວ່າງກະຊວງສຶກສາທິການ ແລະ ກິລາ ຕາງໜ້າໂດຍພະແນກສຶກສາທິການ ແລະ ກິລາແຂວງຫຼວງນໍ້າທາ ຮ່ວມກັບສະມາຄົມພັດທະນາຊຸມຊົນບ້ານເຮົາ ຂຶ້ນໃນວັນທີ 11 ມິຖຸນາຜ່ານມາ ທີ່ພະແນກສຶກສາທິການ ແລະ ກິລາ ແຂວງຫລວງນໍ້າທາ.
ທ່ານນາງ ບົວລະເພັດ ຈຸນທະວົງ ຜູ້ອໍານວຍການສະມາຄົມພັດທະນາຊຸມຊົນບ້ານເຮົາ ກ່າວວ່າ: ໂຄງການສົ່ງເສີມທາງເລືອກຂອງຊຸມຊົນໃນການພັດທະນາການສຶກສາ ເພື່ອປະກອບສ່ວນເຂົ້າໃນການຈັດຕັ້ງປະຕິບັດແຜນພັດທະນາ ເສດຖະກິດ-ສັງຄົມແຫ່ງຊາດ (2021-2025) ຂອງຂະແໜງການສຶກສາ ແນໃສ່ປັບປຸງຄຸນນະພາບການສຶກສາ ແລະ ສົ່ງເສີມໃຫ້ເດັກນ້ອຍສາມາດເຂົ້າເຖິງການສຶກສາທີ່ມີຄຸນນະພາບ, ມີອາຄານຮຽນທີ່ໄດ້ມາດຕະຖານ, ສະອາດ, ສະດວກ ແລະ ປອດໄພຫຼາຍຂຶ້ນ.
ສໍາລັບຢູ່ແຂວງຫຼວງນໍ້າທາມີ 1 ເມືອງ ຄື: ເມືອງສິງ ມີ 4 ບ້ານ, ໃນນັ້ນມີບ້ານຈຽງໄຈ, ຕີນທາດ, ມໍນະ ແລະ ບ້ານສີລິເຮືອງ ຈະໄດ້ກໍ່ສ້າງອາຄານຮຽນຈຳນວນ 4 ຫຼັງ ເລີ່ມແຕ່ວັນທີ 27 ພຶດສະພາ 2024 ເຖິງວັນທີ 31 ມີນາ 2025 ມີອາຍຸສັນຍາ 1 ປີ ໂດຍໄດ້ ຮັບການສະໜັບສະໜູນທຶນຈາກມູນນິທິນິປອນ ປະເທດຍີ່ປຸ່ນ ມູນຄ່າ 4 ແສນກວ່າໂດລາ ສ້າງຕັ້ງກອງທຶນສະໜັບສະໜູນໂຮງຮຽນ ສະໜອງອຸປະກອນຮັບໃຊ້ທີ່ຈຳເປັນໃຫ້ແກ່ 4 ໂຮງຮຽນ ແລະ ອຳນວຍຄວາມສະດວກສຳລັບຈັດການຮຽນ-ການສອນຂອງນັກຮຽນ ແລະ ຄູ-ອາຈານໃນທຸກລະດັບການສຶກສາ ທັງເປັນສະຖານທີ່ປະຕິບັດຫຼັກສູດການສຶກສາແຫ່ງຊາດໃນຂອບເຂດທົ່ວປະເທດ ເພື່ອເປັນການຕອບສະໜອງຄວາມຈຳເປັນ, ສະມາຄົມພັດທະນາຊຸມຊົນບ້ານເຮົາ ຈຶ່ງສົມທົບກັບພາກສ່ວນທີ່ກ່ຽວຂ້ອງຊອກຫາແຫຼ່ງທຶນໃນການກໍ່ສ້າງອາຄານຮຽນຕາມມາດຕະຖານ ຊຶ່ງເປັນໂຄງການທີ່ຖືເອົາການປັບປຸງຄຸນນະພາບການສຶກສາ ແລະ ສະໜອງອາຄານຮຽນເປັນບຸລິມະສິດໜຶ່ງ ໃນການປັບປຸງສິ່ງອໍານວຍຄວາມສະດວກທີ່ຈຳເປັນພາຍໃນໂຮງຮຽນ ທັງເປັນການປັບປຸງສະພາບແວດລ້ອມຂອງໂຮງຮຽນໃຫ້ສວຍງາມ ແລະ ເປັນມິດຕໍ່ນັກຮຽນ ແລະ ອາຈານສອນໃຫ້ດີຂຶ້ນເທື່ອລະກ້າວ, ໂຄງການສົ່ງເສີມທາງເລືອກຂອງຊຸມຊົນໃນການພັດທະນາການສຶກສາໃຫ້ດີຂຶ້ນ.
Cr: ມຸນຕີ