ເພື່ອເປັນກນພັດທະນາສີມື ໃນການສ້າງເງື່ອນໄຂໃຫ້ກັບແຮງງານສະໜອງເຂົ້າສູ່ຕຳແໜ່ງງານເຂົ້າສູ່ຕະຫຼາດແຮງງານພາຍໃນແລະຕ່າງປະເທດຢ່າງມີຂອບເຂດ ແລະ ມີປະສິດທິພາບດີຂື້ນ. ໃນວັນທີ 16 ສິງຫາ 2024 ທີ່ິວິທະຍາໄລ ເສນຮິວ ວຽງຈັນ. ໄດ້ມີພິທີເຊັນບົດບັນທຶກຄວາມເຂົ້າໃຈ ວ່າດ້ວຍການຮ່ວມມືໃນການຝຶກອົບຮົມສີມືແຮງງານ ແລະ ການສ້າງວຽກເຮັດງານທຳໃຫ້ແກ່ຜູ້ທີ່ຜ່ານການຝຶກ ລະຫວ່າງ ສະມາຄົມ ທຸລະກິດບໍລິການຈັດຫາງານລາວ ກັບ ວິທະຍາໄລ ເສນຮິວ ວຽງຈັນ ໂດຍຕາງໜ້າເຊັນໂດຍ ທ່ານ ບຸນທ່ຽງ ລັດຕະນະວົງ ປະທານສະມາຄົມ ແລະ ທ່ານ David Bant ຜູ້ອຳນວຍການວິທະຍາໄລ ເສນຮິວ ວຽງຈັນ ເປັນຜູ້ຮ່ວມລົງນາມ ໂດຍມີຜູ້ເຂົ້າຮ່ວມ ເປັນສັກຂີພິຍານໂດຍ ຄະນະບໍລິຫານງານສະມາຄົມ, ປະທານຜູ້ຮ່ວມກໍ່ຕັ້ງ ແລະ ທີ່ປຶກສາ ວິທະຍາໄລ ເສນຮິວ ວຽງຈັນ ພ້ອມຄະນະທັງສອງຝ່າຍເຂົ້າຮ່ວມ.
ທ່ານ ບຸນທ່ຽງ ລັດຕະນະວົງ ໃນນາມຕາງໜ້າສະມາຄົມທຸລະກິດບໍລິການຈັດຫາງານລາວ ໄດ້ກ່າວສະແດງຄວາມຍິນດີ ແລະ ພາກພູມໃຈ ຕໍ່ກັບການຮ່ວມມື ສະມາຄົມທຸລະກິດບໍລິການຈັດຫາງານລາວ ກັບ ວິທະຍາໄລ ເສນຮິວ ວຽງຈັນ ທີ່ເປັນວິທະຍາໄລແຫ່ງໜຶ່ງທີ່ມີຄຸນນະພາບ , ມາດຕະຖານສູງ ພ້ອມທັງມີຜູ້ບໍລິຫານທີ່ມີວິໃສທັດທີ່ກວ້າງໃກ ແລະ ມີທີມງານຄູອາຈານທີ່ເປັນມືອາຊີບໃນການສ້າງສີມືແຮງງານທີ່ຕອບໂຈດຕະຫລາດແຮງງານທັງພາຍໃນ ແລະ ຕ່າງປະເທດ. ສະມາຄົມທຸລະກິດບໍລິການຈັດຫາງານລາວ ພ້ອມທີ່ຈະຜັນຂະຫຍາຍທິດທາງນະໂຍບາຍຂອງລັດ ກໍຄື ກະຊວງແຮງງານ ແລະ ສະຫວັດດີການສັງຄົມ ໂດຍສະເພາະແມ່ນການແກ້ໄຂບັນຫາການຂາດແຄນພາຍໃນ ໂດຍໄດ້ກຳນົດເປັນແຜນງານ ແລະ ເປັນພັນທະທີ່ສະມາຊິກແຕ່ລະບໍລິສັດຈະຕ້ອງບຸກທະລຸໃຫ້ໄດ້.
ການຮ່ວມມືດັ່ງກ່າວ, ແມ່ນແຜນງານຂອງ ສະມາຄົມທຸລະກິດບໍລິການຈັດຫາງານລາວ ຮວ່ມກັບ ວິທະຍາໄລ, ສະຖາບັນ ແລະ ບັນດາສູນຝຶກອົບຮົມຕ່າງໆເພື່ອສ້າງສີມືແຮງງານກໍ່ຄືການສ້າງໂອກາດໃຫ້ແກ່ໄວໜຸ່ມ-ຊາວໜຸ່ມໃຫ້ມີສີມື ແລະ ມີອາຊີບທີ່ດີ ພ້ອມທັງເປັນການສ້າງກຳລັງແຮງງານຕອບສະໜອງແກ່ພາກທຸລະກິດໃຫ້ໄດ້ຫລາຍເທົ່າທີ່ຈະຫລາຍໄດ້”. ໂດຍເນັ້ນໃສ່ຂະແໜງການຝຶກດ້ານບໍລິການທີ່ຕິດພັນກັບການບໍລິການທ່ອງທ່ຽວ ເຊັ່ນ: ດ້ານການບໍລິການອາຫານ, ການໂຮງແຮມ, ພາສາຕ່າງປະເທດ ແລະ ອື່ນໆ. ທ່ານ ນາງ ປາດຖະໜາ ປັນຍາທິບ ປະທານຜູ້ຮ່ວມກໍ່ຕັ້ງ ແລະ ທີ່ປຶກສາ ຂອງວິທະຍາໄລ ເສນຮິວ ວຽງຈັນ ໄດ້ກ່າວວ່າ: “ວິທະຍາໄລ ເສນຮິວ ວຽງຈັນ ເປັນອີກທຸລະກິດໜຶ່ງທີ່ເປັນທຸລະກິດດ້ານການພັດທະນາຊັບພະຍາກອນມະນຸດ ເຊິ່ງຕົນເອງແມ່ນເຮັດທຸລະກິດໃນຂົງເຂດການສຶກສາ ໂດຍເປັນຜູ້ກໍ່ຕັ້ງໂຮງຮຽນນານາຊາດ ປັນຍາທິບ, ຍ້ອນໃຈມັກ ແລະ ເຫັນໄດ້ເຖິງຄວາມສຳຄັນຂອງການພັດທະນາຊັບພະຍາກອນມະນຸດ ຢາກສ້າງສີມື ສ້າງໂອກາດໃຫ້ແກ່ໄວໜຸ່ມລາວ ໃຫ້ມີຄວາມເປັນມືອາຊີບ ມີລາຍໄດ້-ມີສະຫວັດດີການທີ່ດີ ຈຶ່ງຕັດສິນໃຈລົງທຶນໃສ່ການສ້າງວິທະຍາໄລ ເສນຮິວວຽງຈັນຂຶ້ນ”
ທ່ານ ບຸນທ່ຽງ ລັດຕະນະວົງ ຍັງໄດ້ກ່າວຕື່ມອີກວ່າ: “ ການຈັດຫາງານໄປຕ່າງປະເທດກໍ່ມີຄວາມສໍາຄັນໃນການນໍາເອົາເງິນຕາເຂົ້າມາປະເທດ ໃນສະພາບທີ່ປະເທດເຮົາພວມຕ້ອງການເງິນຕາຕ່າງປະເທດເພື່ອສ້າງຄວາມເຂັ້ມແຂງ ແກ້ໄຂບັນຫາສະພາບເສດຖະກິດໃນປະຈຸບັນ ແຮງງານລາວຈຳນວນບໍ່ໜ້ອຍເດີນທາງໄປເຮັດວຽກຢູ່ຕ່າງປະເທດທັງ ຖືືກຕ້ອງກົດໝາຍ ແລະ ບໍ່ຖືກກົດໝາຍ, ອີກຈຳນວນໜຶ່ງແມ່ນວ່າງງານດ້ວຍຄວາມສະຫມັກໃຈກໍ່ມີ. ສະນັ້ນການຈັດຫາງານພາຍໃນ ແມ່ນມີຄວາມສໍາຄັນຫຼາຍ ຕໍ່ການພັດທະນາເສດຖະກິດຂອງຊາດ ໃນການດຶງດູດການລົງທຶນທັງພາຍໃນ ແລະ ຕ່າງປະເທດຢ່າງແຂງແຮງ. ເພື່ອຕອບສະໜອງກຳລັງແຮງງານໃຫ້ພຽງພໍ ທັງປະລິມານ ແລະ ຄຸນນະພາບ ເຂົ້າສູ່ຕຳແໜ່ງງານໃຫ້ພຽງພໍກັບຫົວໜວ່ຍທຸລະກິດ.
(ຂ່າວສານຮສສ)
