ຈໍາພອນ ເປັນເມືອງໜຶ່ງຂອງແຂວງສະຫວັນນະເຂດ ທີ່ເປັນແຫຼ່ງອູ່ເຂົ້າອູ່ປາ ພ້ອມທັງມີວົງຈອນການທ່ອງທ່ຽວທາງທໍາມະຊາດ ແລະ ປະຫວັດສາດຫຼາຍແຫ່ງທີ່ມີຊື່ສຽງເປັນຕົ້ນວ່າ: ອ່າງເກັບນໍ້າຝາຍສຸຍ, ດົງລີງ, ວັດເກົ່າຕາແຫຼວ, ໜອງປາຝາ ນອກນັ້ນກໍຍັງມີ ວັດໜອງລໍາຈັນກໍຄືຫໍໄຕປີດົກທີ່ມີໜັງສືຜູກໃບລານທີ່ເກົ່າແກ່ມີອາຍຸຫຼາຍ100 ປີ ທີ່ສືບທອດຕໍ່ກັນມາຂອງຊາວພຸດທັງຫຼາຍ ດັ່ງທີ່ທ່ານ ດອກຜາງແດງ ໄຊຍະສັງ ຮອງນາຍບ້ານໜອງລໍາຈັນ ຄະນະຮັບຜິດຊອບ ແຫຼ່ງທ່ອງທ່ຽວ ວັດໜອງລໍາຈັນ ໄດ້ໃຫ້ຮູ້ວ່າ: ວັດໜອງລໍາຈັນ ຕັ້ງຢູ່ບ້ານໜອງລໍາຈັນ ເມືອງຈໍາພອນ ແຂວງສະຫວັນນະເຂດ ເປັນວັດໜຶ່ງທີ່ຊາວບ້ານ ແລະ ຊາວເມືອງຈຳພອນ ລວມທັງຊາວພຸດຊະນິກະຊົນທັງຫຼາຍ ໃຫ້ ການເຄົາລົບນົບໄຫວ້ບູຊາ ທ່ຽວຊົມ ເຊິ່ງພາຍໃນແຫຼ່ງທ່ອງທ່ຽວ ຫໍໄຕປີດົກແຫ່ງນີ້ ແມ່ນໄດ້ມີນັກທ່ອງທ່ຽວເຂົ້າມາໄຫວ້ສັກກາລະ ບູຊາເປັນຈໍານວນຫຼາຍ.
ໃນໄລຍະ 2-3 ປີຫຼັງນີ້ເຫັນວ່າຈຳນວນນັກທ່ອງທ່ຽວຍັງບໍ່ຫຼາຍເທົ່າທີ່ຄວນ ແຕ່ມາໃນປີນີ້ທາງເມືອງໄດ້ມີການເປີດງານປີທ່ອງທ່ຽວລາວ 2024 ຈຶ່ງເຫັນວ່າຈຳນວນນັກທ່ອງທ່ຽວແມ່ນເພີ່ມຂຶ້ນ ໂດຍສ່ວນໃຫຍ່ແມ່ນນັກທ່ອງທ່ຽວພາຍໃນ ແລະ ນັກທ່ອງທ່ຽວຕ່າງປະເທດຈຳນວນໜຶ່ງ ຈາກການ ເກັບກຳສະຖິຕິເຫັນວ່າປີນີ້ມີນັກທ່ອງທ່ຽວເຂົ້າມາທ່ຽວພາຍໃນວັດໜອງລຳຈັນ ຫໍໄຕປິດົກສູງເຖິງ 4,000 ກວ່າຄົນມີຄວາມປ່ຽນແປງຫຼາຍ ເມື່ອຈາກປີກ່ອນໆ, ມີນັກທ່ອງທ່ຽວເຂົ້າຫຼາຍແມ່ນໃນຊ່ວງລະດູແລ້ງເພາະວ່າເສັ້ນທາງການສັນຈອນໄປມາສະດວກສະບາຍ, ຖ້າເປັນລະດູຝົນນັກທ່ອງທ່ຽວທີ່ເຂົ້າມາທ່ຽວຊົມບໍ່ດົກໜາ ເພາະເສັ້ນທາງເພ້ເພຫຼາຍ, ກິດຈະກໍາຫຼັກໆໃນການຮັບຕ້ອນນັກທ່ອງທ່ຽວຂອງວັດໜອງລໍາຈັນແມ່ນມີເກືອປາພາຍໃນໜອງ, ຜູກແຂນ, ໄຫວ້ຫໍໄຕປີດົກໜັງສືຜູກໃບລານ, ສ່ວນຫຼາຍຫຼັກໆທີ່ມາວັດ ແຫ່ງນີ້ແມ່ນໄຫວ້ຫໍໄຕປີດົກໜັງສືຜູກໃບລານ, ຂໍພອນ, ສັກກະ ລະບູຊາ.
ທ່ານ ດອກຜາງແດງ ໄຊຍະສັງ ຮອງນາຍບ້ານໜອງລໍາຈັນ ໄດ້ຮຽກຮ້ອງມາຍັງສື່ມວນຊົນ ໃຫ້ຊ່ວຍເຜີຍແຜ່ຂໍ້ມູນຂ່າວສານຕ່າງໆ ໃຫ້ແຫຼ່ງທ່ອງທ່ຽວ ວັດໜອງລໍາຈັນແຫ່ງນີ້ອອກໄປໃຫ້ກວ້າງໄກ ເພື່ອໃຫ້ແຂກຕ່າງບ້ານຕ່າງເມືອງທີ່ຢູ່ທັງພາຍໃນ ແລະ ຕ່າງປະເທດ ໃຫ້ໄດ້ເຂົ້າມາທ່ອງທ່ຽວຫຼາຍຂຶ້ນກວ່າເກົ່າ ແລະ ຮຽກຮ້ອງຂໍຄວາມຊ່ວຍເຫຼືອຈາກພາກລັດ ແລະ ເອກະຊົນໃຫ້ການຊ່ວຍເຫຼືອສະຖານທີ່ຮັບແຂກ, ຮ້ານອາຫານທີ່ເປັນເອກະລັກພື້ນບ້ານ ແລະ ກິດຈະກໍາເຄື່ອງຕ້ອນຂອງຝາກທີ່ເປັນເຄື່ອງຫັດຖະກຳເອກະລັກຂອງຊາວບ້ານ ເພື່ອເປັນການກະຈາຍລາຍຮັບໃຫ້ກັບຊຸມຊົນ.
ທີ່ມາ: ວິທະຍຸແຂວງສະຫວັນນະເຂດ
