ໃນຕອນບ່າຍຂອງວັນທີ 04 ກັນຍາ 2023, ທີ່ ນະຄອນຫຼວງຈາກາກຕາ ທ່ານ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມສຸດຍອດພາກທຸລະກິດ ແລະ ການລົງທຶນອາຊຽນ ຫຼື (ASEAN Business & Investment Summit-ABIS) ປະຈໍາປີ 2023 ຈັດໂດຍສະພາທີ່ປຶກສາທຸລະກິດອາຊຽນ ຫຼື ASEAN-BAC, ເຊິ່ງເປັນການດໍາເນີນກອງປະຊຸມ ພາຍໃຕ້ຄໍາຂວັນ “ຄວາມເປັນແກນກາງຂອງອາຊຽນ: ການສ້າງນະວັດຕະກໍາ ເພື່ອກ້າວໄປສູ່ຄວາມເຂັ້ມແຂງຮອບດ້ານ”. ກອງປະຊຸມດັ່ງກ່າວ ແມ່ນກິດຈະກຳຂອງພາກທຸລະກິດ ຈັດຂຶ້ນໃນທຸກໆປີໝູນວຽນຕາມການເປັນປະທານອາຊຽນ. ໃນຄັ້ງນີ້, ມີບັນດາຜູ້ນຳອາຊຽນ ແລະ ປະເທດຄູ່ຮ່ວມມືພາຍນອກ, ຜູ້ຕາງໜ້າພາກລັດ ແລະ ຄະນະຜູ້ບໍລິຫານທີ່ປຶກສາທຸລະກິດອາຊຽນ, ຕົວແທນພາກທຸລະກິດຂອງແຕ່ລະປະເທດສະມາຊິກ ແລະ ບັນດາຄູ່ຮ່ວມທຸລະກິດຕ່າງໆໃນພາກພື້ນເຂົ້າຮ່ວມ.
ໂອກາດດັ່ງກາ່ວ, ທ່ານ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສປປ ລາວ ໄດ້ຂຶ້ນກ່າວຄຳເຫັນໃນຫົວຂໍ້: “ສ້າງເສັ້ນທາງໃຫ້ກ້າວໄປຂ້າງໜ້າ, ສະທ້ອນຄວາມເປັນຈິງຂອງການເປັນປະທານອາຊຽນ”, ທ່ານນາຍົກໄດ້ເນັ້ນເຖິງກາລະໂອກາດ ແລະ ສິ່ງທ້າທາຍ, ໂດຍສະເພາະການເຊື່ອມໂຍງທາງດ້ານເສດຖະກິດໃນພາກພື້ນ, ເຊິ່ງຮຽກຮ້ອງໃຫ້ ອາຊຽນ ຕ້ອງໄດ້ຮ່ວມມືກັນສ້າງຄວາມກົມກຽວ ແລະ ຍຶດໝັ້ນຄວາມເປັນແກນກາງຂອງອາຊຽນ ທັງນີ້ ກໍເພື່ອເປັນການສົ່ງເສີມບົດບາດອາຊຽນທີ່ເປັນຜູ້ນຳພາໃຫ້ເຂັ້ມແຂງ ໃນການຮ່ວມມືດ້ານການເມືອງ, ເສດຖະກິດ, ສັງຄົມ, ການປົກປັກຮັກສາສິ່ງແວດລ້ອມ ແລະ ການພັດທະນາແບບຍືນຍົງກັບບັນດາຄູ່ຮ່ວມມືຕ່າງໆ.
ພ້ອມນີ້, ທ່ານນາຍົກລັດຖະມົນຕີ ໄດ້ສະແດງຄວາມຊົມເຊີຍ ຕໍ່ຜົນສໍາເລັດໃນການຜັນຂະຫຍາຍບັນດາແຜນວຽກບູລິມະສິດ ຂອງສະພາທີ່ປຶກສາທຸລະກິດອາຊຽນໃນໄລຍະຜ່ານມາ ໂດຍສະເພາະການຮ່ວມມືດ້ານການຄ້າ ແລະ ການລົງທຶນ ທີ່ໄດ້ປະກອບສ່ວນສຳຄັນ ເຂົ້້າໃນການຟື້ນຟູເສດຖະກິດ-ສັງຄົມ ທີ່ໄດ້ຮັບຜົນກະທົບຈາກໄພທຳມະຊາດ, ການແຜ່ລະບາດຂອງພະຍາດໂຄວິດ-19 ແລະ ຄວາມຫຍຸ້ງຍາກດ້ານເສດຖະກິດ ແລະ ການເງິນ ທີ່ໃນທົ່ວໂລກກໍາລັງປະເຊີນໃນປັດຈຸບັນ.
ທ່ານນາຍົກລັດຖະມົນຕີ ສອນໄຊ ສີພັນດອນ ໄດ້ສືບຕໍ່ເຂົ້າຮ່ວມພິທີປິດກອງປະຊຸມ ແລະ ຮ່ວມເປັນສັກຂີພິຍານ ໃນພີທີມອບ-ຮັບການເປັນປະທານກອງປະຊຸມສຸດຍອດພາກທຸລະກິດ ແລະ ການລົງທຶນອາຊຽນ, ໂດຍຜູ້ຕາງໜ້າ ສປປ ລາວ ແມ່ນ ທ່ານ ອຸເດດ ສຸວັນນະວົງ, ປະທານສະພາການຄ້າ ແລະ ອຸດສາຫະກໍາແຫ່ງຊາດລາວ ຂຶ້ນຮັບການເປັນປະທານຕໍ່ຈາກອິນໂດເນເຊຍ ແລະ ຈະເປັນເຈົ້້າພາບຈັດກອງປະຊຸມ ABIS ໃນປີ 2024.
ຂ່າວ;ພາບ: ກົມປະຊາສຳພັນ ສຳນັກງານນາຍົກລັດຖະມົນຕີ
See insights and ads
Boost post
All reactions:
1