ກະຊວງການຕ່າງປະເທດ ສະເຫຼີມສະຫຼອງບຸນປີໃໝ່ລາວ

ເນື່ອງໃນໂອກາດສົ່ງທ້າຍປີເກົ່າ ພ.ສ 2566 ແລະ ຕ້ອນຮັບປີໃໝ່ລາວ ພ.ສ 2567 ທີ່ຈະມາເຖິງນີ້, ກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກ ຮ່ວມກັບ ບັນດາທູຕານຸທູດຕ່າງປະເທດ ແລະ ອົງການຈັດຕັ້ງສາກົນປະຈຳລາວ ໄດ້ຈັດພິທີສະເຫຼີມສະຫຼອງບຸນປີໃໝ່ລາວຂຶ້ນໃນວັນທີ 12 ເມສາ 2024,ທີ່ ສະໂມສອນກິລາ TPC, ບ້ານອີໄລໃຕ້, ເມືອງນາຊາຍທອງ, ນະຄອນຫຼວງວຽງຈັນ,ເປັນກຽດເຂົ້າຮ່ວມໂດຍ ທ່ານ ສະເຫຼີມໄຊ ກົມມະສິດ,ຮອງນາຍົກລັດຖະມົນຕີ,ລັດຖະມົນຕີກະຊວງການຕ່າງປະເທດ ພ້ອມດ້ວຍພັນລະຍາ ແລະ ມີຄະນະພັກ-ຄະນະນຳກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກ ພ້ອມດ້ວຍບັນດາທູຕານຸທູດ, ກົງສູນກິດຕິມະສັກຕ່າງປະເທດ,ຜູ້ຕາງໜ້າອົງການຈັດຕັ້ງສາກົນປະຈຳລາວ ເຂົ້າຮ່ວມ.

ໃນໂອກາດອັນສະຫງ່າລາສີນີ້, ທ່ານຮອງນາຍົກລັດຖະມົນຕີສະເຫຼີມໄຊ ກົມມະສິດໄດ້ຕາງໜ້າໃຫ້ຄະນະພັກ-ຄະນະນຳກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກຂຶ້ນກ່າວຄຳເຫັນ ແລະ ອວຍພອນໄຊອັນປະເສີດເນື່ອງໃນໂອກາດປີໃໝ່ລາວໃຫ້ແກ່ບັນດາພະນັກງານ ແລະ ບັນດາແຂກທີ່ເຂົ້າຮ່ວມງານມີສຸຂະພາບເຂັ້ມແຂງ,ມີພະລະນາໄມສົມບູນ,ມີຜົນສໍາເລັດອັນໃໝ່ໃນໜ້າທີ່ວຽກງານ,ມີຄວາມຜາສຸກໃນຊີວິດສ່ວນຕົວ ແລະ ຄອບຄົວທຸກປະການຕະຫຼອດປີ ພ.ສ 2567 ນີ້ ແລະ ຕະຫຼອດໄປ ເພື່ອສືບຕໍ່ຮ່ວມກັນປະຕິບັດຫນ້າທີ່ດ້ວຍຜົນສຳເລັດ ແລະ ນຳເອົາຜົນປະໂຫຍດສູງສຸດມາສູ່ປະເທດຊາດ ແລະ ປະຊາຊົນຂອງຕົນ. ການຈັດພິທີສະເຫຼີມສະຫຼອງໃນຄັ້ງນີ້ກໍຖືເປັນອີກຫນຶ່ງເວທີໃນການເຜີຍແຜ່ຮີດຄອງປະເພນີ ແລະ ວັດທະນະທຳອັນດີງາມຂອງລາວເຮົາ ທີ່ມີມາແຕ່ດົນນານອອກສູ່ສາຍຕາສາກົນ ແລະ ເຊີນຊວນບັນດານັກທ່ອງທ່ຽວຕ່າງປະເທດໃຫ້ເຂົ້າມາຢ້ຽມຢາມລາວນັບມື້ຫຼາຍຂຶ້ນ ໂດຍສະເພາະໃນໂອກາດປີທ່ອງທ່ຽວລາວ 2024 ນີ້.

ພ້ອມດຽວກັນນີ້,ທ່ານຮອງນາຍົກລັດຖະມົນຕີ ສະເຫຼີມໄຊ ກົມມະສິດ ກໍ່ໄດ້ຖືໂອກາດສະແດງຄວາມຮູ້ບຸນຄຸນ ແລະ ຂອບໃຈທຸກໆທ່ານໃນໄມຕີຈິດມິດຕະພາບອັນແໜ້ນແຟ້ນ,ການສະໜັບສະໜູນອັນລໍ້າຄ່າ ແລະ ການຮ່ວມມືຢ່າງຕໍ່ເນື່ອງ ທີ່ມີຕໍ່ກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກກໍ່ຄືຕໍ່ລາວຈາກບັນດາປະເທດເພື່ອນມິດ ແລະ ອົງການຈັດຕັ້ງສາກົນຕະຫຼອດມາ, ລວມເຖິິງການສືບຕໍ່ໃຫ້ການສະໜັບສະໜູນ ແລະ ການຊ່ວຍເຫຼືອແກ່ລາວໃນຕໍ່ໜ້າ,ຈະເປັນການປະກອບສ່ວນອັນສໍາຄັນເຂົ້າໃນການເຄື່ອນໄຫວການເປັນປະທານອາຊຽນຂອງລາວໃນປີ 2024 ພາຍໃຕ້ຄໍາຂວັນ “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ” ໄດ້ຢ່າງຄ່ອງຕົວ ແລະ ປະສົບຜົນສໍາເລັດ, ພ້ອມທັງເປັນການປະກອບສ່ວນເສີມຂະຫຍາຍການພົວພັນຮ່ວມມືທັງໃນຂອບສອງຝ່າຍ ແລະ ຫຼາຍຝ່າຍ ລວມເຖິງການຮ່ວມມືໃນເວທີພາກພື້ນ ແລະ ສາກົນ.

ຈາກນັ້ນ,ກໍໄດ້ມີພິທີບາສີສູ່ຂວັນ ແລະ ຫົດນໍ້າອວຍພອນປີໃໝ່ເຊິ່ງກັນ ແລະ ກັນຕາມຮີດຄອງປະເພນີອັນດີງາມທີ່ສືບທອດກັນມາແຕ່ບູຮານນະການຂອງລາວເຮົາ.

#ຂ່າວ #ວສລ

ພາບ: ວຽງມາ ລຸນທະວົງ