ເຂື່ອນໄຟຟ້ານ້ຳງື່ມ -1 ຍັງບໍ່ມີແຜນທີ່ຈະໄຂປະຕູນ້ຳລົ້ນ ໃນສອງສາມວັນຕໍ່ໜ້າ

ພາຍຫຼັງທີ່ມີແຈ້ງການປ່ອຍນ້ຳຂອງເຂື່ອນໄຟຟ້ານ້ຳລິກ 1-2 ໃນວັນທີ 14 ກັນຍາ 2024 ນີ້ ແລະ ໃນວັນດຽວກັນ ທ່ານ ທ່ານ ສົມໃຈ ສີຈັນທະລາດ ຜູ້ອຳນວຍ ການ ເຂື່ອນໄຟຟ້ານໍ້າງື່ມ -1 ໄດ້ໃຫ້ຄຳເຫັນ ກ່ຽວກັບຄວາມເປັນໄປໄດ້ຂອງການໄຂປະຕູນ້ຳລົ້ນຂອງເຂື່ອນໄຟຟ້ານໍ້າງື່ມ -1 ໂດຍກ່າວວ່າ ໂອກາດທີ່ຈະລະບາຍນ້ຳອອກຈາກເຂື່ອນໄຟຟ້ານໍ້າງື່ມ -1 ພາຍໃນສອງສາມວັນນີ້ ແມ່ນເປັນໄປໄດ້ຍາກ ເນື່ອງຈາກລະດັບນ້ຳຍັງບໍ່ຮອດ ປະຕູລະບາຍນ້ຳລົ້ນ

ທ່ານ ສົມໃຈ ກ່າວວ່າ ຕ້ອງພີຈາລະນາ ເບິ່ງໄປຢ່າງຫນ້ອຍໜຶ່ງອາທິດ ຈຶ່ງຈະປະເມີນເຖິງຄວາມເປັນໄປໄດ້ທີ່ຈະໄຂປະຕູລະບາຍນ້ຳລົ້ນ.

ໃນວັນທີ 14 ກັນຍາ 2024 ເລີ່ມເວລາ 10:00 ໂມງ ເປັນຕົ້ນໄປ, ເຂື່ອນຜະລິດໄຟຟ້ານໍ້າລີກ 1-2 ໄດ້ປ່ອຍນໍ້າອອກຈາກເຂື່ອນ ຜ່ານອຸໂມງລະບາຍນໍ້າລົ້ນ ຂອງເຂື່ອນໄຟຟ້າ 1 ແມັດ, ມີປະລິມານນໍ້າໄຫຼອອກລວມທັງການຜະລິດແມ່ນ 267 ແມັດ/ ວິນາທີ, ເຊິ່ງຈະມີການປິດ-ເປີດປະຕູລະບາຍນໍ້າລົ້ນຈະມີການປັບຕົວປ່ຽນແປງຕາມປະລິ ມານນໍ້າໄຫຼເຂົ້າອ່າງຕົວຈິງ.

ຈຸດທີ່ສາຍນ້ຳຈາກເຂື່ອນໄຟຟ້ານ້ຳລີກ 1-2 ໄຫຼປ່ອງໃສ່ ສາຍນ້ຳທີ່ອອກຈາກ ເຂື່ອນໄຟຟ້ານ້ຳງື່ມ 1 ປະມານ 3,7 ກິໂລແມັດ ຈາກເຮືອນຈັກຂອງເຂື່ອນໄຟຟ້ານ້ຳງື່ມ -1

ຂໍ້ມູນສະພາບນ້ຳຂອງເຂື່ອນໄຟຟ້ານ້ຳງື່ມ -1 ເວລາ 8:00 ໂມງ ຂອງວັນທີ 14 ກັນຍາ 2024

 ລະດັບນ້ຳໜ້າເຂື່ອນ 211.14 masl (ທຽບໃສ່ລະດັບໜ້ານ້ຳທະເລ)

 ປະລິມານນ້ຳຝົນ 39.0 mm (ບໍລິເວນໂຄງການ)

 ປະລິມານນ້ຳ ໄຫຼເຂົ້າອ່າງເກັບນ້ຳ 929.778 m3/s (ແມັດກ້ອນຕໍ່ວິນາທີ)

 ປະລິມານນ້ຳ ໃນອ່າງເກັບນ້ຳ 6,730,453,600 ແມັດກ້ອນ

 ທຽບເປັນເປີເຊັນ 94,47 %

———————-

ຂໍ້ມູນເພີ່ມຕື່ມກ່ຽວກັບສະພາບນ້ຳຂອງເຂື່ອນ ທີ່ ຜ-ຟຟລ ຄຸ້ມຄອງ

ທີ່ມາ: EDL-Generation Public Company