ລັດຖະບານ ຈະມີທິດທາງ ແລະ ມາດຕະການ ເພື່ອຜັນຂະຫຍາຍມະ ຕິກົມການ ເມືອງສູນກາງພັກ ເລກທີ 04/ກມສພ, ລົງ ວັນທີ 11 ພະຈິກ 2024 ກ່ຽວກັບການສ້າງເສດຖະກິດເອກະລາດເປັນເຈົ້າຕົນເອງ (ສອຈ) ເຂົ້າໃນການພັດທະນາເສດຖະກິດ- ສັງຄົມປະຈໍາປີ 2025 ເພື່ອກ້າວໄປເຖິງການຮ່າງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ X ຄືແນວ ໃດ ?. ນີ້ແມ່ນຄໍາຊັກຖາມຂອງສະມາຊິກສະພາແຫ່ງຊາດທີ່ມີຕໍ່ລັດຖະບານ.
ຕໍ່ຄໍາຖາມດັ່ງກ່າວ, ທ່ານ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສປປ ລາວ ໃຫ້ຮູ້ໃນໂອກາດຊີ້ແຈງຕໍ່ຄໍາຊັກຖາມຂອງສະມາຊິກສະພາແຫ່ງຊາດຢູ່ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ໃນວັນທີ 26 ພະຈິກ 2024 ທີ່ຫໍສະພາແຫ່ງຊາດ ວ່າ: ເພື່ອຈັດຕັ້ງປະຕິບັດມະຕິດັ່ງກ່າວ, ລັດຖະບານຈະສຸມໃສ່ 6 ຂົງເຂດບູລິມະສິດ ດັ່ງນີ້:
1). ສຸມໃສ່ປັບປຸງ ແລະ ພັດທະນາຂົງເຂດການເງິນ-ເງິນຕາ ເພື່ອກ້າວໄປສູ່ການເພິ່ງຕົນ ເອງກຸ້ມຕົນເອງທາງດ້ານງົບປະມານ ເຊັ່ນ: ສູ້ຊົນຈັດເກັບລາຍຮັບໃຫ້ໄດ້ເພີ່ມຂຶ້ນ ຕາມຄໍາຂວັນ “ລາຍຮັບພາຍໃນກຸ້ມລາຍຈ່າຍພາຍ ໃນມີສ່ວນສະສົມ ເພື່ອຊຳລະໜີ້ສິນ ແລະ ບຸກທະລຸການຄຸ້ມຄອງລາຍຮັບໄປສູ່ທັນສະໄໝ” ແນໃສ່ຫຼຸດຜ່ອນການເພີ່ງພາການກູ້ຢືມຈາກຕ່າງປະເທດຕາມທິດ ສອຈ ໂດຍຫັນມານໍາໃຊ້ແຫຼ່ງທຶນຈາກພາຍໃນ ເປັນຕົ້ນຕໍ, ຊຶ່ງໃນໄລຍະ 4 ປີມານີ້ ເຫັນໄດ້ວ່າ ການເກັບລາຍຮັບມີການເພີ່ມຂຶ້ນ ແລະ ເກີນແຜນເປັນປີທີ 4 ຕິດຕໍ່ກັນ, ພິເສດປີ 2024 ໝົດປີຄາດວ່າຈະເກີນແຜນປະມານ 10% ເທົ່າກັບປະມານ 5 ພັນກວ່າຕື້ກີບ ແລະ ຄາດວ່າໃນປີ 2025 ຈະມີສ່ວນສະສົມເພີ່ມຂຶ້ນເພື່ອຊໍາລະໜີ້ສິນໃຫ້ຫຼຸດລົງຕາມທິດນໍາ ສອຈ…
– ຮັກສາສະຖຽນລະພາບທາງດ້ານເງິນຕາ ໃຫ້ໝັ້ນທ່ຽງ ໂດຍສະເພາະ ຖືສໍາຄັນການຄວບຄຸມເງິນ ເຟີ້ ດ້ວຍການນໍາໃຊ້ເຄື່ອງມືນະໂຍບາຍເງິນຕາດັດສົມປະລິມານເງິນ ໃຫ້ມີປະສິດທິພາບ; ປະຕິບັດນະໂຍບາຍອັດຕາແລກປ່ຽນ ຕາມກົນໄກຕະຫຼາດທີ່ມີການຄຸ້ມຄອງຂອງລັດແລະ ອື່ນໆ.
2). ສຸມໃສ່ການຜະລິດກະສິກຳ ເພື່ອຄໍ້າປະກັນສະບຽງອາຫານ, ທົດແທນການ ນໍາເຂົ້າ ແລະ ຜະລິດເປັນສິນຄ້າ ເພື່ອສົ່ງອອກ ໂດຍສຸມໃສ່ໃຫ້ສາມາດກຸ້ມຕົນເອງທາງດ້ານ ສະບຽງອາຫານ ໂດຍສະເພາະ ຜະລິດເຂົ້າກິນ, ຜະລິດພືດສະບຽງອາຫານ ແລະ ຊີ້ນ, ປາ, ໄຂ່ ໃຫ້ກຸ້ມ ການບໍລິໂພກຢູ່ພາຍໃນ ເພື່ອຫຼຸດຜ່ອນການນໍາເຂົ້າ ຫຼື ເອີ້ນວ່າ ດຸ່ນດ່ຽງການນໍາເຂົ້າ-ສົ່ງອອກ…
3). ຈະໄດ້ສືບຕໍ່ສຸມໃສ່ພັດທະນາດ້ານພະລັງງານໄຟຟ້າ ໃຫ້ໄດ້ທັງປະລິມານ ແລະ ຄຸນນະພາບ ເພື່ອໃຫ້ສາມາດຮັບປະກັນການສະໜອງໄຟຟ້າໃຫ້ມີຄວາມສະຖຽນ ແລະ ພຽງ ພໍກັບຄວາມຕ້ອງການພາຍໃນເປັນບູລິມະສິດ. ໃນໄລຍະຜ່ານມາ, ເຖິງແມ່ນວ່າປະເທດເຮົາສາມາດ ຜະລິດໄຟຟ້າໄດ້ຫຼາຍ ແລະ ສົ່ງອອກຂາຍໃຫ້ຕ່າງປະເທດ, ແຕ່ຍັງມີການນໍາເຂົ້າໄຟຟ້າເພື່ອສະໜອງພາຍໃນ ເນື່ອງຈາກລະບົບສາຍສົ່ງ ເພື່ອລໍາລຽງກະແສໄຟຢູ່ພາຍໃນປະເທດ ຍັງບໍ່ທັນເຊື່ອມຈອດກັນ. ສະນັ້ນ, ລັດຖະບານ ຈະສືບຕໍ່ປະຕິບັດມາດຕະການແກ້ໄຂເລັ່ງດ່ວນ ແລະ ມາດຕະການແກ້ໄຂໃນໄລ ຍະກາງໂດຍສະເພາະແມ່ນຈະສຸມໃສ່ລະບົບຕາຄ່າຍໄຟຟ້າຢູ່ພາຍໃນໃຫ້ເຊື່ອຈອດກັນຕາມນະໂຍບາຍສ້າງລະບົບສາຍສົ່ງແຫ່ງຊາດ, ເລັ່ງຊຸກຍູ້ໂຄງການຜະລິດໄຟຟ້າພະລັງງານລົມ, ພະລັງງານແສງຕາເວັນ, ຊີວະມວນ…
4). ສ້າງຄວາມເຂັ້ມແຂງ ແລະ ຄວາມໝັ້ນຄົງທາງດ້ານນໍ້າມັນເຊື້ອໄຟ, ເນື່ອງຈາກ ວ່າປະເທດເຮົາ ຍັງບໍ່ມີແຫຼ່ງນໍ້າມັນດິບ ແລະ ໂຮງກັ່ນນໍ້າມັນເທື່ອ, ຈຶ່ງຕ້ອງອາໄສການນໍາເຂົ້າມາຈາກຕ່າງປະເທດ 100%. ສະນັ້ນ, ເພື່ອສ້າງຄວາມໝັ້ນຄົງທາງດ້ານນໍ້າມັນເຊື້ອໄຟ ລັດຖະບານ ຈະສຸມໃສ່ສ້າງຄັງແຮສໍາຮອງນໍ້າມັນ ດ້ວຍການສຸມໃສ່ສ້າງສາງເກັບນໍ້າມັນ ແລະ ປັດຈຸບັນ ກຳລັງປັບປຸງດຳລັດ 331/ນຍ ວ່າດ້ວຍທຸລະກິດນໍ້າມັນເຊື້ອໄຟ ແລະ ຄົ້ນຄວ້າຍຸດທະສາດທາງດ້ານນໍ້າມັນເຊື້ອໄຟຄືນໃໝ່ ໂດຍສະເພາະ ການດັດສົມບັນດາບໍລິສັດນໍາເຂົ້າໃຫ້ມີຈໍານວນໜ້ອຍລົງ, ການສຶກສາຄົ້ນຄ້ວາກໍ່ສ້າງທໍ່ ສົ່ງນໍ້າມັນ, ການສ້າງໂຮງກັ່ນນໍ້າມັນ…
5). ການກຸ້ມຕົນເອງທາງດ້ານການສະໜອງວັດຖຸດິບໃຫ້ແກ່ໂຮງງານອຸດສາຫະກຳ, ປັດຈຸບັນ ບັນດາໂຮງງານອຸດສະຫະກຳສ່ວນຫຼາຍ ແມ່ນນໍາເຂົ້າວັດຖຸດິບຈາກຕ່າງປະເທດ (ນັບ ທັງໂຮງງານຕັດຍິບ ກໍນໍາເຂົ້າແຜ່ນແພ, ເສັ້ນດ້າຍ; ໂຮງງານຊັນເປເປີ ກໍຍັງນໍາເຂົ້າໄມ້ວິກຈາກຕ່າງປະເທດ, ໂຮງງານຂຸດຄົ້ນ-ປຸງແຕ່ງເກືອກາລີສົ່ງອອກ ແຕ່ຢູ່ພາຍໃນ ກໍຍັງມີການນໍາເຂົ້າປຸ໋ຍປະສົມ ຫຼື ເຄມີ, ມີການຂຸດຄົ້ນ-ປຸງແຕ່ງສົ່ງອອກເຫຼັກຮູບແບບແຮ່ດິບ ແຕ່ພັດນໍາເຂົ້າເຫຼັກແທ່ງ, ແຜ່ນ ແລະ ສໍາເລັດຮູບ, ສົ່ງອອກຢາງພາລາ ພັດນໍາເຂົ້າຢາງຕີນລົດ ແລະ ອື່ນໆ). ໃນຕໍ່ໜ້ານີ້ ລັດຖະບານ ຈະສຸມ ໃສ່ສ້າງຄວາມເຂັ້ມແຂງໃຫ້ຜູ້ປະກອບການພາຍໃນ ເພື່ອເປັນຕ່ອງໂສ້ສະໜອງວັດຖຸດິບໃຫ້ແກ່ໂຮງງານອຸດສາຫະກຳ, ຈຳກັດການສົ່ງອອກຊັບພະຍາກອນ…
6). ຈະສຸມໃສ່ໂຄສະນາປຸກລະດົມ ທົ່ວປວງຊົນ ຮ່ວມແຮງຮ່ວມໃຈ ແລະ ເປັນເຈົ້າການ ໃນການສ້າງເສດ ຖະກິດກຸ້ມຕົນເອງ, ສົ່ງເສີມການຊົມໃຊ້ຜະລິດຕະພັນພາຍໃນທີ່ເຮົາຜະລິດເອງ ແລະ ໃຫ້ມີຈິດໃຈຮັກຊາດ, ຮັກຄວາມເປັນເອກະລາດ, ບົນຈິດໃຈປະຢັດມັດທະຍັດ, ຫຼຸດຜ່ອນການນໍາເຂົ້າ ສິນຄ້າທີ່ບໍ່ຈໍາ, ສິນຄ້າຟູມເຟືອຍ, ສິນຄ້າທີຜະລິດໄດ້ຢູ່ພາຍໃນປະເທດເປັນຈາກຕ່າງປະເທດ, ພ້ອມກັນ ປະຕິບັດຄໍາຂວັນທີ່ວ່າ “ລາວເຮັດ ລາວໃຊ້ ລາວໄດ້ ລາວຈະ ເລີນ” ໃຫ້ແຂງແຮງ ແລະ ເປັນຮູບປະທໍາຫຼາຍຂຶ້ນກວ່າເກົ່າ.
