ທ່ານນາງ ສວນສະຫວັນ ວິຍະເກດ ລັດຖະມົນຕີ (ລມຕ) ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ພ້ອມຄະນະໄດ້ເຄື່ອນໄຫວຢ້ຽມຢາມ ບ້ານຊົນເຜົ່າອາຄາໂອ້ມາ ເມືອງບຸນເໜືອ ແຂວງຜົ້ງສາລີ ໃນວັນທີ 11 ທັນວາ 2024.
ທ່ານ ຈັນເພັງ ເລົາລີ ນາຍບ້ານໂອ້ມາ ໄດ້ໃຫ້ຮູ້ວ່າ: ເຜົ່າອາຄາໂອ້ມາ ທົ່ວແຂວງມີ 7 ບ້ານ, ສະເພາະເມືອງບຸນເໜືອມີບ້ານຊົນເຜົ່າອາຄາໂອ້ມາ 1 ບ້ານ, 80 ຫຼັງຄາເຮືອນ, ພົນລະເມືອງ 468 ຄົນ, ຍິງ 225 ຄົນ, ປະຊາຊົນມີອາຊີບເຮັດໄຮ່, ເຮັດນາ, ເອກະລັກຂອງຊົນເຜົ່າແມ່ນການນຸ່ງຖື, ນຸ່ງສິ້ນມີຕີນ, ມີແພຄາດຫົວ, ປັກລວດລາຍທີ່ເປັນເອກະລັກສວຍງາມຂອງເຜົ່າ, ຮີດຄອງປະເພນີມີປະຕູເຂົ້າບ້ານ ແລະ ຖືສາສະໜາຜີ.
ໃນໂອກາດເຄື່ອນໄຫວຢ້ຽມຢາມຄັ້ງນີ້, ທ່ານ ລມຕ ກະຊວງ ຖວທ ໄດ້ຮ່ວມກິດຈະກຳປັກແສ່ວ, ຊົມການສະແດງຂອງຊົນເຜົ່າ ແລະ ຊີມອາຫານທີ່ເປັນເອກະລັກເຂົ້າປໍປາ, ດື່ມນໍ້າຊາ ແລະ ອື່ນໆ.
ຂ່າວ-ພາບ: ພູວັນ
