ສູນກາງແນວລາວສ້າງຊາດ ໄດ້ໄຂກອງປະຊຸມຄົບຄະນະບໍລິຫານງານພັກ ສູນກາງແນວລາວສ້າງຊາດ ເປີດກວ້າງ ປະຈຳປີ 2024 ຂຶ້ນ ຢ່າງເປັນທາງການ ໂດຍການເປັນປະທານ ຂອງສະຫາຍ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ, ເລຂາຄະນະພັກ, ປະທານສູນກາງແນວລາວສ້າງຊາດ, ມີບັນດາສະຫາຍຮອງເລຂາຄະນະພັກ, ຄະນະປະຈຳພັກ, ກຳມະການພັກ, ຄະນະໜ່ວຍພັກ ອ້ອມຂ້າງ ສູນກາງແນວລາວສ້າງຊາດ ພ້ອມດ້ວຍແຂກຖືກເຊີນເຂົ້າຮ່ວມ, ໃນວັນທີ 20 ທັນວາ 2024 ທີ່ສູນກາງແນວລາວສ້າງຊາດ;
ກອງປະຊຸມຄັ້ງນີ້, ໄດ້ສະຫຼຸບຕີລາຄາຄືນການຊີ້ນຳ-ນຳພາ ຂອງຄະນະບໍລິຫານງານພັກ ສູນກາງແນວລາວສ້າງຊາດ ປະຈຳປີ 2024 ສະໄໝທີ V ເປັນຕົ້ນແມ່ນ ສະພາບການເກັບກຳຫາງສຽງສັງຄົມ, ການນຳພາຈັດຕັ້ງຜັນຂະຫຍາຍບັນດາມະຕິ, ຄຳສັ່ງຂອງພັກ ແລະ ວຽກງານການເມືອງ-ແນວຄິດ, ການນຳພາວຽກງານພັກ-ພະນັກງານ, ການປັບປຸງການຈັດຕັ້ງ, ການກະກຽມດຳເນີນກອງປະຊຸມໃຫຍ່ຂອງອົງຄະນະພັກ ພ້ອມທັງຕີລາຄາຄືນຈຸດດີ, ຈຸດອ່ອນ, ຂໍ້ຄົງຄ້າງ, ບົດຮຽນທີ່ຖອດຖອນໄດ້ ໃນໄລຍະຜ່ານມາ ແລະ ວາງທິດທາງວຽກງານຈຸດສຸມ ປີ 2025;
ວາລະດຳເນີນກອງປະຊຸມ ຈະໄດ້ດຳເນີນໄປເປັນເວລາ 2 ວັນ ຄື: ວັນທີ 20 ແລະ ວັນທີ 23 ທັນວາ 2024 ຈຶ່ງຈະສໍາເລັດ.
