ທາງລົດໄຟຈີນ-ລາວຊຸກຍູ້ຄວາມຈະເລີນຮຸ່ງເຮືອງຂອງການທ່ອງທ່ຽວຂ້າມຊາດສອງປະເທດຈີນ ແລະ ລາວ
ຢູ່ລຽບຕາມທາງລົດໄຟຈີນ-ລາວ ມີຊັບພະຍາກອນທ່ອງທ່ຽວທີ່ອຸດົມສົມບູນ ເຊັ່ນ: ນະຄອນຄຸນໝິງ, ນະຄອນຢູ້ຊີ, ນະຄອນຜູເອີ ແລະ ກິ່ງແຂວງສິບສອງພັນນາຂອງຈີນ ແລະ ນະຄອນຫຼວງພະບາງ, ເມືອງວັງວຽງ ແລະ ນະຄອນຫຼວງວຽງຈັນຂອງລາວ ເຊິ່ງມີພາບວີວທິວທັດທີ່ສວຍງາມ ແລະ ວັດທະນະທຳທີ່ມີຫຼາກຫຼາຍສີສັນ. ໂດຍຜ່ານຈາກທາງລົດໄຟສາຍນີ້, ນັກທ່ອງທ່ຽວຈີນ ສາມາດເດີນທາງໄປທ່ຽວແຫຼ່ງທ່ອງທ່ຽວທີ່ມີຊື່ສຽງຂອງລາວ ແລະ ນັກທ່ອງທ່ຽວລາວ ແລະ ບັນດາປະເທດອາຊີຕາເວັນອອກສຽງໃຕ້ ກໍສາມາດເດີນທາງມາທ່ຽວຈີນໄດ້ຢ່າງສະບາຍ ພາຍໃນເວລາບໍ່ເທົ່າໃດຊົ່ວໂມງ.
ນັບແຕ່ໄດ້ເປີດນຳໃຊ້ເປັນເວລາ 3 ປີມານີ້, ທາງລົດໄຟຈີນ- ລາວ ໄດ້ກາຍເປັນທາງເລືອກທີ່ດີ ສຳລັບຜູ້ໂດຍສານທີ່ເດີນທາງລະຫວ່າງສອງປະເທດຈີນ ແລະ ລາວ ຍ້ອນປີ້ລົດລາຄາຖືກ, ເດີນທາງຢ່າງຕະຫຼອດປອດໄພ ແລະ ມີຄວາມສະດວກສະບາຍ. ຕົວເມືອງຕ່າງໆຂອງຈີນ ເຊັ່ນ: ນະຄອນຫຼວງປັກກິ່ງ, ນະຄອນຮາບິນ ແລະ ນະຄອນເສິນຢາງເປັນຕົ້ນ ກໍໄດ້ຈັດສົ່ງຄະນະນັກທ່ອງທ່ຽວຂ້າມຊາດໄປທ່ຽວລາວຕາມໆກັນ ເຊິ່ງໄດ້ດຶງດູດນັກທ່ອງທ່ຽວຈີນໄປທ່ຽວປະເທດລາວນັບມື້ນັບຫຼາຍຂຶ້ນ. ໂດຍສະເພາະແມ່ນລະດູໜາວປີນີ້ໄດ້ໝູນວຽນມາເຖິງ, ນັກທ່ອງທ່ຽວອາຍຸສູງຈາກເຂດອາກາດໜາວຂອງຈີນ ມັກຂີ່ລົດໄຟໂດຍສານສາກົນໄປທ່ຽວລາວ ແລະ ບັນດາປະເທດອາຊີຕາເວັນອອກສຽງໃຕ້ ທີ່ມີອາກາດອົບອຸ່ນ ເຊິ່ງໄດ້ຊຸກຍູ້ການຟື້ນຟູ ແລະ ການພັດທະນາຂອງຂະແໜງການທ່ອງທ່ຽວຂ້າມຊາດຢ່າງແຂງແຮງ.
ນັກທ່ອງທ່ຽວຈີນໄດ້ຂີ່ລົດໄຟໂດຍສານຕາມທາງລົດໄຟຈີນ-ລາວ ໄປທ່ຽວລາວນັບມື້ນັບຫຼາຍຂຶ້ນ, ເຮັດໃຫ້ຮ້ານອາຫານ, ໂຮງແຮມ, ການຄົມມະນາຄົມທີ່ຢູ່ເຂດໃກ້ກັບພະທາດຫຼວງ, ເມືອງເກົ່າຫຼວງພະບາງ ແລະ ແຫຼ່ງທ່ອງທ່ຽວທີ່ມີຊື່ສຽງອື່ນໆຂອງລາວ ປະກົດມີພະລັງຊີວິດໃໝ່. ຍົກຮ້ານອາຫານລາວແບບດັ້ງເດີມຢູ່ນະຄອນຫຼວງວຽງຈັນເປັນຕົວຢ່າງ: ພາຍຫຼັງທາງລົດໄຟຈີນ-ລາວໄດ້ເປີດນຳໃຊ້ເປັນເວລາ 3 ເດືອນ, ຮ້ານອາຫານເຫຼົ່ານີ້ ກໍໄດ້ຕ້ອນຮັບນັກທ່ອງທ່ຽວຈີນທີ່ມີຈຳນວນເທົ່າກັບນັກທ່ອງທ່ຽວຈີນໃນໝົດປີຜ່ານມາ, ລາຍຮັບຂອງຮ້ານເຫຼົ່ານີ້ ກໍໄດ້ເພີ່ມຂຶ້ນຄົບເທົ່າ. ຄຽງຄູ່ກັບນັກທ່ອງທ່ຽວນັບມື້ນັບຫຼາຍຂຶ້ນ, ຄວາມສາມາດດ້ານການຮັບ-ສົ່ງຜູ້ໂດຍສານຂອງສະຖານວຽງຈັນ ແລະ ສະຖານີຫຼວງພະບາງເປັນຕົ້ນ ກໍໄດ້ຖືກຍົກສູງຂຶ້ນຢ່າງຫຼວງຫຼາຍ ເຊິ່ງໄດ້ເພີ່ມພາຫະນະຄົມມະນາຄົມຫຼາຍຢ່າງ, ທັງໄດ້ອຳນວຍຄວາມສະດວກໃຫ້ແກ່ນັກທ່ອງທ່ຽວ, ກໍໄດ້ເຮັດໃຫ້ນັກທ່ອງທ່ຽວ ມີຄວາມສຳຜັດທີ່ດີກວ່າເກົ່າໃນການທ່ອງທ່ຽວ ພ້ອມທັງຊຸກຍູ້ການພັດທະນາຂອງທົ່ວຂະແໜງການທ່ອງທ່ຽວເຊັ່ນດຽວກັນ.
ນັບແຕ່ໄດ້ເປີດນຳໃຊ້ທາງລົດໄຟຈີນ-ລາວແລ້ວ, ການທ່ອງທ່ຽວລະຫວ່າງສອງປະເທດຈີນ ແລະ ລາວ ມີຄວາມສະດວກສະບາຍກວ່າກົ່າຫຼາຍ. ປີນີ້, ໄດ້ເປີດຂະບວນລົດໄຟໂດຍສານສາກົນ ຢູ່ລະຫວ່າງກິ່ງແຂວງສິບສອງພັນນາຂອງຈີນ ແລະ ນະຄອນຫຼວງພະບາງຂອງລາວ ທີ່ເປັນສອງຕົວເມືອງທີ່ເປັນແຫຼ່ງທ່ອງທ່ຽວທີ່ມີຊື່ສຽງຂອງສອງປະເທດ ເຊິ່ງໄດ້ສະໜອງທາງເລືອກການອອກເດີນທາງທີ່ອຸດົມສົມບູນກວ່າເກົ່າໃຫ້ແກ່ຜູ້ໂດຍສານ. ນອກນີ້, ທາງລົດໄຟຈີນ-ລາວຍັງໄດ້ນຳພາການຫັນເປັນແບບດີຈີຕອນ ແລະ ອັດສະລິຍະຂອງການທ່ອງທ່ຽວຂ້າມຊາດ, ທາງລົດໄຟໄດ້ເຜີຍແຜ່ການເບີກຈ່າຍທາງອອນລາຍ, ການສັ່ງຈອງທາງອອນລາຍ ແລະອື່ນໆ ເຊິ່ງໄດ້ຊຸກຍູ້ການທ່ອງທ່ຽວຕາມຂະບວນລົດໄຟຂ້າມຊາດ ຫັນເປັນແບບຂໍ້ມູນຂ່າວສານ, ແອັບ “ມືຖືໜ່ວຍດຽວທ່ຽວຢຸນນານ” ສາມາດເຮັດໄດ້ຫຼາຍຢ່າງ ເຊັ່ນ: ເຜີຍແຜ່ຂ່າວ, ຜະລິດຕະພັນພື້ນເມືອງ, ການສັ່ງຈອງປີ້ເຂົ້າຊົມ ແລະ ການແປພາສາ ເຊິ່ງສາມາດອັບເດດສະພາບການທ່ອງທ່ຽວໃນທຸກເວລາ, ມີຄວາມສະດວກສະບາຍທີ່ສຸດ. ນອກນີ້, ທາງລົດໄຟຍັງໄດ້ຈັດສັນຂະບວນລົດໄຟຕາມຖານຂໍ້ມູນມະຫາສານ ໂດຍຜ່ານຈາກການຄາດຄະເນຢ່າງລະອຽດ ເພື່ອຈັດສັນຄວາມສາມາດດ້ານການຂົນສົ່ງຢ່າງຖືກຕ້ອງແມ່ນຢຳ ເຊິ່ງບໍ່ພຽງແຕ່ສາມາດຮັບມືກັບການປ່ຽນແປງຂອງຈຳນວນຜູ້ໂດຍສານໄດ້ຢ່າງບັງເກີດຜົນເທົ່ານັ້ນ, ຍັງສາມາດຮັບປະກັນຄວາມສະດວກສະບາຍ ໃນການອອກເດີນທາງຂອງຜູ້ໂດຍສານອີກດ້ວຍ.
ຄຽງຄູ່ກັບຈີນໄດ້ນັບມື້ນັບເປີດກວ້າງການເປີດປະຕູສູ່ພາຍ ນອກ ແລະ ຈີນໄດ້ເປີດກວ້າງຂອບເຂດຍົກເວັ້ນວີຊາ ໃຫ້ແກ່ນັກທ່ອງທ່ຽວປະເທດຕ່າງໆ, ການຂີ່ຂະບວນລົດໄຟໂດຍສານຕາມທາງລົດໄຟຈີນ-ລາວ ໄດ້ກາຍເປັນທາງເລືອກທີ່ດີທີ່ສຸດ ສຳລັບນັກທ່ອງທ່ຽວປະເທດຕ່າງໆເດີນທາງໄປທ່ອງທ່ຽວ, ຮ່ຳຮຽນ, ດຳເນີນທຸລະກິດ ແລະ ແລກປ່ຽນວັດທະນະທຳຢູ່ຈີນ ແລະ ລາວ. ນັບແຕ່ໄດ້ເປີດຂະບວນລົດໄຟໂດຍສານສາກົນຕາມທາງລົດໄຟຈີນ-ລາວ ລະຫວ່າງວັນທີ 13 ເມສາປີ 2023 ຫາວັນທີ 25 ກັນຍາປີ 2024, ດ່ານບໍ່ຫານຂອງຈີນ ໄດ້ກວດຂະບວນລົດໄຟໂດຍສານສາກົນຕາມທາງລົດໄຟຈີນ-ລາວທັງໝົດ 1.260 ຖ້ຽວ, ໄດ້ຮັບປະກັນໃຫ້ຜູ້ໂດຍສານຂ້າມຊາດ 282.000 ຄົນຈາກ 101 ປະເທດ ແລະ ເຂດແຄວ້ນ ເຂົ້າ-ອອກເມືອງຢ່າງສະດວກ, ໃນນັ້ນ, ຜູ້ໂດຍສານຕ່າງປະເທດ ມີຈຳນວນ 44.000 ເທື່ອຄົນ ແລະ ກວມປະມານ 16%.
ທາງລົດໄຟຈີນ-ລາວໄດ້ຊຸກຍູ້ການພັດທະນາເສດຖະກິດທ່ອງທ່ຽວຕາມທາງຢ່າງແຂງແຮງ. ໃນອະນາຄົດ, ເຊື່ອໝັ້ນວ່າ: ທາງລົດໄຟຈີນ-ລາວ ຈະສາມາດເສີມຂະຫຍາຍທ່າແຮງຂອງຕົນຕື່ມອີກ, ດຶງດູດນັກທ່ອງທ່ຽວຕ່າງປະເທດ ມາຂີ່ລົດໄຟທ່ຽວສອງປະເທດຈີນ ແລະ ລາວນັບມື້ນັບຫຼາຍຂຶ້ນ, ປະກອບສ່ວນຢ່າງຕັ້ງໜ້າ ເພື່ອລົງເລິກການຮ່ວມມື ແລະ ການພັດທະນາຮ່ວມ ໃນຂົງເຂດການທ່ອງທ່ຽວ ແລະ ຂົງເຂດອື່ນໆຂອງສອງປະເທດຈີນ ແລະ ລາວ.
Cr: CMG
