ມວນຊົນຊາວຫຼວງພະບາງອານຸໂມທະນາບຸນຜ້າປ່າສາມັກຄີ ສົມທົບທືນກໍ່ສ້າງຫໍທຳມະສະພາ

ວັນທີ່ 27 ທັນວາ 2024 ນີ້ ຄະນະສົງອົງການພຸດທະສາສະໜາສຳພັນລາວ ແຂວງຫຼວງພະບາງ ສົມທົບກັບອົງການປົກຄອງແຂວງຫຼວງພະບາງ ໄດ້ຈັດງານບຸນແຫ່ຜ້າປ່າສາມັກຄີ ເພື່ອລະດົມທືນສົມທົບການກໍ່ສ້າງຫໍທຳມະສະພາ ອົງການພຸດທະສາສະໜາສຳພັນລາວ ແຂວງຫຼວງພະບາງ ທີ່ກຳລັງກໍ່ສ້າງບໍ່ທັນສຳເລັດ. ມີ ທ່ານ ສົມສະຫວາດ ເລັ່ງສະຫວັດ ອະດິດຮອງນາຍົກລັກຖະມົນຕີ ພ້ອມດ້ວຍການນໍາຂອງແຂວງ, ນະຄອນ ຫຼວງພະບາງ ແລະຊາວພຸດທະສາສະນິກະຊົນຜູ້ໃຈບຸນເຂົ້າຮ່ວມ.

ທ່ານ ບຸນສົມ ຄຸນມະນີ ປະທານແນວລາວສ້າງຊາດແຂວງ ໄດ້ກ່າວເປີດງານວ່າ: ງານບຸນແຫ່ຜ້າປ່າເປັນອີກກິດຈະກຳໜື່ງ ທີ່ຊາວຫຼວງພະບາງໄດ້ສືບທອດກັນມາໄດ້ຫຼາຍປີ ເພື່ອປຸກລະດົມວັດຖຸ ແລະປັດໄຈ ຈາກທົ່ວສັງຄົມຕາມຄວາມສັດທາຂອງຊາວພຸດທະສາສະນິກະຊົນ ເພື່ອຫາແຫຼ່ງທຶນສົມທົບເຂົ້າໃນການສ້າງສາ – ພັດທະນາສີາງສາທາລະນະຕ່າງໆ ເພື່ອຜົນປະໂຫຍດໃຫ້ແກ່ສັງຄົມ ເຊັ່ນ: ການກໍ່ສ້າງໂຮງຮຽນສົງ, ບູລະນະປະຕິສັງຂອນວັດວາ, ອາຮາມ ພາຍໃນແຂວງ ໃຫ້ມີຄວາມຈະເລີນຮຸ່ງເຮືອງ ທັງເປັນການດືງດູດເອົານັກທ່ອງທ່ຽວ ມາທ່ອງທ່ຽວຫຼວງພະບາງ ໃຫ້ມີຄວາມຄຶກຄື້ນຂື້ນຕື່ມ.

ພາຍຫຼັງເປີດພິທີທາງການ ໄດ້ເລີ້ມຂະບວນແຫ່ຈາກ ເສັ້ນທາງໃນເດີ່ນກິລາໃນຮົ່ມຂອງແຂວງ ບ້ານນາສ້າງເຫວີຍ ນະຄອນ ຫຼວງພະບາງ ຈົນເຖີງອາຄານກໍ່ສ້າງຫໍທຳມະສະພາ ບໍລິເວນໂຮງຮຽນມັດທະຍົມສົມບູນສົງ ວັດພູຄວາຍໂພຄາຣາມ ແລ້ວມີການຟັງທຳມະເທດສະໜາ ສະຫຼອງກອງຜ້າປ່າ. ໃຫ້ກຽດນຳພາຂະບວນແຫ່ໂດຍ ທ່ານ ສົມສະຫວາດ ເລັດສະຫວັດ ອະດິດຮອງນາຍົກລັດຖະມົນຕີ, ພ້ອມດ້ວຍການນຳຂອງແຂວງຫຼວງພະບາງ, ພະແນກການ-ກົມກອງ, ພະນັກງານທະຫານ-ຕ່ຳຫຼວດ, ພະນັກງານລັດຖະກອນ, ເຖົ້າແກ່-ຜູ້ຊົງຄຸນວຸດທິ, ຕະຫຼອດຮອດປະຊາຊົນ ຊາວພຸດທະສາສະນິກະຊົນຜູ້ໃຈບຸນ, ເຂົ້າຮ່ວມຢ່າງຫຼວງຫຼາຍ.

ສຳລັບທືນທີ່ໄດ້ຮັບ ຈາກການຮ່ວມອານຸໂມທະນາບຸນ ຈະມອບໃຫ້ອົງການພຸດທະສາສະໜາສຳພັນລາວ ແຂວງຫຼວງພະບາງ ເພື່ອປະກອບສ່ວນກໍ່ສ້າງຫໍທະມະສະພາ ໃຫ້ສຳເລັດຕາມແຜນການ.