ປີ 2024 ປກສ ແຂວງໄຊຍະບູລີ ສາມາດແກ້ໄຂຄະດີຢາເສບຕິດໄດ້ 213 ເລື່ອງ

ພັອ ຄຳສິນ ຜິວວັນນາ ຫົວໜ້າກອງບັນຊາການ ປກສ ແຂວງໄຊຍະບູລີ ໄດ້ລາຍງານໃຫ້ຮູ້ໃນກອງປະຊຸມສະຫຼຸບວຽກງານ ປກສ ປະຈຳປີ 2024 ແລະ ວາງທິດທາງວຽກງານຈຸດສູມ ປີ 2025 ທີ່ຈັດຂຶ້ນໃນວັນທີ 30-31 ທັນວາ 2024 ວ່າ: 1 ປີຜ່ານມາ, ກອງບັນຊາການ ປກສ ແຂວງໄຊຍະບູລີ ໄດ້ຕັ້ງໜ້າສຸມໃສ່ ເຄື່ອນໄຫວເຮັດວຽກງານວິຊາສະເພາະດ້ວຍຄວາມຮັບຜິດ ຊອບ, ໂດຍສະເພາະແມ່ນປະຕິບັດຕາມ 4 ແຜນງານໃຫຍ່ ແລະ 41 ໂຄງການ ທີ່ກະຊວງປ້ອງກັນຄວາມສະຫງົບວາງອອກ, ຕິດ ພັນກັບການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ສາມາດແກ້ໄດ້ 213 ເລື່ອງ ແລະ ຢຶດຂອງກາງໄດ້ຈຳນວນໜຶ່ງ.

ທ່ານ ຫົວໜ້າກອງບັນຊາການ ປກສ ໄຊຍະບູລີ ກ່າວວ່າ: ບັນຫາອາຊະຍາກຳ ແລະ ປະກົດການຫຍໍ້ທໍ້ຕ່າງໆໃນສັງຄົມໄດ້ເກີດຂຶ້ນຕໍ່ເນື່ອງ, ໃນປີຜ່ານມາມີຄະດີເກີດຂຶ້ນ 246 ເລື່ອງ (ທຽບໃສ່ປີ 2023 ເພີ່ມຂຶ້ນ 25 ເລື່ອງ); ຫຼາຍກວ່າ ໝູ່ແມ່ນຄະດີລັກຊັບພົນລະເມືອງມີ 136 ເລື່ອງ; ຕໍ່ໜ້າສະພາບການຄືແນວນັ້ນ, ກໍາລັງປ້ອງກັນຄວາມສະຫງົບແຂວງ ສາມາດແກ້ລາຍຄະດີຕ່າງໆໄດ້ 165 ເລື່ອງ, ກັກຕົວຜູ້ກະທຳຜິດໄດ້ 261 ຄົນ ຍິງ 38 ຄົນ. ສໍາລັບຄະດີຢາເສບຕິດ ສາມາດແກ້ໄດ້ 213 ເລື່ອງ, ກັກຕົວຜູ້ກະທຳຜິດໄດ້ 252 ຄົນ ຍິງ 32 ຄົນ; ຢຶດຂອງກາງໄດ້: ຢາບ້າ ຈໍານວນ 145.209 ເມັດ ຢາໄອສ໌ kkk-1000 ນໍ້າໜັກ 1.182 ກິໂລກຼາມ ແລະ ວັດຖຸທີ່ກ່ຽວພັນອື່ນໆອີກຈຳນວນໜຶ່ງ.

ພາບ-ຂ່າວ: ບຸນເຫຼືອ