ຄະນະກຳມະການຄຸ້ມຄອງໄພພິບັດ ແຂວງໄຊສົມບູນ ຈັດກອງປະຊຸມ ສະຫຼຸບວຽກງານຄຸ້ມຄອງໄພພິບັດ ແລະ ກອງທຶນສັງຄົມສົງເຄາະ ປະຈໍາປີ 2024 ແລະ ແຜນການປີ 2025 ໃນຕອນເຊົ້າຂອງວັນທີ່ 13 ມັງກອນ 2025 ນີ້ ທີ່ຫ້ອງປະຊຸມພະແນກແຮງງານ ແລະ ສະຫວັດດີການສັງຄົມແຂວງ ໂດຍການເປັນປະທານຂອງທ່ານ ຕົ່ງມົວ ຊົວໂກ້, ຮອງເຈົ້າແຂວງໄຊສົມບູນ, ປະທານຄະນະກຳມະການຄຸ້ມຄອງໄພພິບັດຂັ້ນແຂວງ.
ທ່ານ ຂັນໄຊ ນາມມີໄຊ ຮອງຫົວໜ້າຂະແໜງສັງຄົມສົງເຄາະ ໄດ້ຜ່ານບົດສະຫຼຸບຕໍ່ກອງປະຊຸມ ໂດຍໄດ້ຍົກໃຫ້ເຫັນວ່າ:ໃນໄລຍະ 1 ປີຜ່ານມາ ໄດ້ເກີດອັກຄີໄພໄຟໄໝ້ເຮືອນປະຊາຊົນຢູ່ເມືອງອະນຸວົງ, ເມືອງທ່າໂທມ, ເມືອງລ້ອງຊານ ຈໍານວນ 4 ຄັ້ງ ລວມມູນຄ່າຄວາມເສຍຫາຍທັງໝົດ 224 ລ້ານກວ່າກີບ, ເກີດເຫດການລົມພາຍຸພັດເຮືອນປະຊາຊົນ, ໂຮງຮຽນ 2 ແຫ່ງ ແລະ 1 ຫ້ອງການບ້ານ ຢູ່ເມືອງອະນຸວົງ, ເມືອງທ່າໂທມ ແລະ ເມືອງຮົ່ມ, ເມືອງລ້ອງແຈ້ງ ແລະ ເມືອງລ້ອງຊານ ຈໍານວນ 6 ຄັ້ງ ມູນຄ່າຄວາມເສຍຫາຍທັງໝົດ 1.186 ລ້ານກ່ວາກີບ, ຜົນກະທົບຈາກໄພພິບັດທຳມະຊາດນ້ຳປ່າໄຫຼຊຸໂຄງການຊົນລະປະທານ ຈຳນວນ 9 ແຫ່ງ ຢູ່ເມືອງອະນຸວົງ, ເມືອງທ່າໂທມ, ເມືອງລ້ອງແຈ້ງ ລວມມູນຄ່າຜົນເສຍຫາຍ 22 ຕື້ກວ່າກີບ.
ໃນປີ 2024 ນີ້ ໄດ້ໃຫ້ການຊ່ວຍເຫຼືອປະຊາຊົນທີ່ຖືກຜົນກະທົບຈາກໄພທຳມະຊາດ ໃນນັ້ນ ຊ່ວຍເຫຼືອເປັນເຂົ້າສານ, ເຄື່ອງອຸປະໂພກ-ບໍລິໂພກ ແລະ ເງິນສົດ ເພື່ອບັນເທົາທຸກສຸກເສີນໄຫ້ແກ່ຄອບຄົວທີ່ໄດ້ຮັບຜົນກະທົບຈາກໄພແຫ້ງແລ້ງ, ຜົນກະທົບຈາກອັກຄີໄພໄໝ້ເຮືອນ ແລະ ພາຍຸລົມພັດ ຈຳນວນ 68 ຄອບຄົວ ລວມມູນຄ່າທັງໝົດ 368 ລ້ານກວ່າກີບ.
ຈາກນັ້ນ ຄະນະກຳມະການຂັ້ນແຂວງ ແລະ ເມືອງ ໄດ້ພ້ອມກັນປະກອບຄໍາຄິດຄໍາເຫັນຕໍ່ຮ່າງບົດສະຫຼຸບ ເປັນຕົ້ນແມ່ນ ຕໍ່ກັບບັນຫາຄວາມຫຍຸ້ງຍາກຕ່າງໆ ໃນການຈັດຕັ້ງປະຕິບັດວຽກງານ, ການປະສານງານກັບພາກສ່ວນທີ່ກຽວຂ້ອງ, ການສ້າງ ແລະ ນໍາໃຊ້ກອງທຶນ ຫຼື ງົບປະມານ ເພື່ອຕອບໂຕ້ໄຟພິບັດທັນການ, ກະກຽມຄວາມພ້ອມໃນການຮັບມື ແລະ ການລະດົມທຶນຈາກພາກສ່ວນຕ່າງໆ.
ພາບ-ຂ່າວ: ຟອງ ນໍ່ນິນທາ
