ສໍາເລັດການເກັບກູ້ອາວຸດປືນເສິກ, ປືນລ່າເນື້ອ ແລະ ວັດຖຸລະເບີດພາຍໃນ 16 ບ້ານໃນທົ່ວເມືອງໄຊບູລີ.

ວັນທີ 12 ມັງກອນ 2025 ນີ້. ທ່ານ ອ່ອນລໍາພັນ ບົວສີແກ້ວ ກໍາມະການພັກແຂວງ ເລຂາຄະນະບໍລິຫານງານພັກເມືອງ ເຈົ້າ ເມືອງໄຊບູລີ ທັງເປັນປະທານປ້ອງກັນຊາດປ້ອງກັນຄວາມສະ ຫງົບຂັ້ນເມືອງ ໄດ້ໃຫ້ສໍາພາດຕໍ່ຜູ້ສີ່ຂ່າວເມືອງໄຊບູລີ ຂອງພວກເຮົາວ່າ: ຜ່ານການຈັດຕັ້ງປະຕິບັດການເຄື່ອນໄຫວຕົວຈິງຂອງຄະນະກໍາມະການຈັດຕັ້ງປະຕິບັດວຽກງານເກັບກູ້ອາວຸດປືນເສິກ, ປືນລ່າເນື້ອ ແລະ ວັດຖຸລະເບີດຢູ່ເມືອງໄຊບູລີ ໃນທ້າຍປີ 2024 ຫາ ເດືອນ ມັງກອນ ປີ 2025 ນີ້. ດ້ານການເຄື່ອນໄຫວຕົວຈິງມີທັງໝົດ 2 ກໍາລັງຄື: ກໍາລັງ ປກຊ – ປກສ ເມືອງ ,ກໍາລັງ ປກສ ກຸ່ມບ້ານ 10 ກຸ່ມບ້ານ ແລະ ກໍາລັງກອງຮ້ອຍກອງຫຼອນ 01 ກອງຮ້ອຍ ໃນທົ່ວເມືອງ ໄດ້ເຂົ້າຮ່ວມປະຕິບັດ.

ຕີລາຄາການຈັດຕັ້ງປະຕິບັດໃນໄລຍະຜ່ານມາ ສາມາດເກັບກູ້ອາວຸດປືນ ໄດ້ທັງໝົດ 82 ກະບອກ. ໃນນີ້ປະເພດປືນແກັບມີ 58 ກະບອກ, ປືນອັດລົມ 10 ກະບອກ, ປືນລູກຊອງມີ 1 ກະ ບອກ ພ້ອມລູກກະສູນ 01 ລູກ. ປືນເສິກ ( CKC) 01 ກະ ບອກ. ໜໍ້ຊັອດໄຟຟ້າ ( ສັດນໍ້າ) ຈໍານວນ 03 ໜ່ວຍ. ວັດຖຸລະເບີດ M 18 ຈໍານວນ 01 ໜ່ວຍ. ໝາກແຕກລົມ 02 ໜ່ວຍ. ປືນສັ້ນ 05 ກະບອກ. ປືນ AK 02 ກະບອກ. ປືນ K 59 02 ກະບອກ ພ້ອມດ້ວຍ ລູກກະສູນ 16 ລູກ. ປືນ 7,65 ມີ 1 ກະບອກ ພ້ອມລູກກະສູນ 07 ລູກ. ປືນ T77 ມີ 02 ກະບອກ ພ້ອມລູກກະສູນ 21 ລູກ.

ຈໍານວນກຸ່ມ ທີ່ເກັບກູ້ອາວຸດປືນເສິກ, ປືນລ່າເນື້ອ ແລະ ວັດຖຸລະເບີດ ມີ 16 ບ້ານ. ຍັງຈັດຕັ້ງປະຕິບັດແຕ່ບໍ່ທັນສໍາເລັດມີ 36 ບ້ານ ເຊິ່ງພາກສ່ວນທີ່ກ່ຽວຂ້ອງ ພວມເອົາໃຈເກັບກູ້ ແລະ ຈະສືບຕໍ່ ຈົນກວ່າຈະສໍາເລັດຕາມແຜນການທີ່ວາງໄວ້.

ທີ່ມາ: ວິທະຍຸແຂວງສະຫວັນນະເຂດ