ໄຂກອງປະຊຸມໃຫຍ່ຄັ້ງທີ IX ອົງຄະນະພັກເມືອງອຸທຸມພອນ

ກອງປະຊຸມໃຫຍ່ຄັ້ງທີ IX ອົງຄະນະພັກເມືອງອຸທຸມພອນ, ແຂວງສະຫວັນນະເຂດ ໄຂຂື້ນຢ່າງເປັນທາງການໃນວັນທີ 27ມັງກອນ 2025 ທີ່ສະໂມສອນຂອງເມືອງໂດຍການເຂົ້າຮ່ວມຂອງ ສະຫາຍ ບຸນໂຈມ ອຸບົນປະເສີດ ກໍາມະການສູນກາງພັກ, ເລຂາພັກແຂວງ ເຈົ້າແຂວງສະຫວັນນະເຂດ, ສະຫາຍ ທອງໃສ ໄຊຍະວົງຄໍາດີ ກໍາມະການພັກແຂວງ,ເລຂາພັກເມືອງ ເຈົ້າເມືອງອຸທຸມພອນ.

ສະຫາຍ ທອງໃສ ໄຊຍະວົງຄໍາດີ ໄດ້ກ່າວເປີດກອງປະຊຸມຢ່າງເປັນທາງການ, ສະຫາຍ ໂພໄຊ ອິນທະວົງສາ ຮອງເລຂາພັກເມືອງ,ຜູ້ຊີ້ນໍາວຽກພັກ-ພະນັກງານ ໄດ້ຜ່ານບົດລາຍງານການເມືອງຕໍ່ກອງປະຊຸມ ເຊິ່ງສະຫາຍໄດ້ຕີລາຄາຄືນຜົນຂອງການຈັດຕັ້ງປະຕິບັດກອງປະຊຸມໃຫຍ່ຄັ້ງທີ VIII ຂອງອົງຄະນະພັກເມືອງ ຕະຫຼອດໄລຍະ 05 ປີທີ່ຜ່ານມາ,ເຊິ່ງໃນນີ້ມີທັງກາລະໂອກາດ ແລະ ສິ່ງເອື້ອອໍານວຍຄວາມສະດວກຫຼາຍດ້ານເປັນຕົ້ນ: ລະບົບການເມືອງມີສະຖຽນລະພາບ,ມີຄວາມໜັກແໜ້ນ,ເຂັ້ມແຂງ,ສັງຄົມມີຄວາມສະຫງົບ ເປັນລະບຽບຮຽບຮ້ອຍ.

ຈາກນັ້ນ ສະຫາຍ ຄໍາພົງ ສຸລິເຍດ ກໍາມະການພັກເມືອງ,ຮອງເຈົ້າເມືອງ ໄດ້ລາຍ ງານຕໍ່ກອງປະຊຸມ ກ່ຽວກັບແຜນພັດທະນາເສດຖະກິດ-ສັງຄົມຂອງເມືອງ. ສະຫາຍໃຫ້ຮູ້ວ່າ: ໃນໄລຍະຜ່ານມາເຫັນວ່າ ດ້ານໂຄງປະກອບທາງດ້ານເສດຖະກິດໄດ້ດໍາເນີນໄປຖືກທິດ ແລະ ຂະຫຍາຍຕົວຕໍ່ເນື່ອງ ສະເລ່ຍ 5,2% ຕໍ່ປີ,ລວມຍອດຜະລິດຕະ ພັນພາຍໃນ ( GDP) ບັນລຸໄດ້ 10.072 ກວ່າຕື້ກີບ,ສະເລ່ຍຕໍ່ຫົວຄົນ 21 ລ້ານກວ່າກີບ/ຄົນ/ປີ, ທົ່ວເມືອງສາມາດຜະລິດເຂົ້າເປືອກໄດ້ 289.349 ໂຕນ, ສະເລ່ຍໃສ່ຫົວຄົນຜູ້ໜຶ່ງໄດ້ຮັບເຂົ້າເປືອກ 582 ກິໂລ/ຄົນ/ປີ,ປູກພຶດສະບຽງອາຫານບັນລຸ 13.439 ກວ່າໂຕນ,ການລ້ຽງສັດ ແລະ ການປະມົງ,ທົ່ວເມືອງມີສັດລ້ຽງສະສົມທັງໝົດ 281.967 ໂຕ.

ຜູ້ແທນກອງປະຊຸມ ໄດ້ປະກອບຄໍາເຫັນຕໍ່ກອງປະຊຸມ, ໃນນີ້ມີການປະກອບຄໍາເຫັນຈາກຕາງໜ້າຂົງເຂດ ປກຊ-ປກສ,ຂົງເຂດເສດຖະກິດ, ຂົງເຂດວັດທະນະທໍາ-ສັງຄົມ,ຕາງໜ້າໜ່ວຍພັກປອດໃສ,ເຂັ້ມແຂງ,ໜັກແໜ້ນ, ຕາງໜ້າຄອບຄົວຕົວແບບການປູກເຂົ້າ-ຫຍ້າ ແລະ ລ້ຽງງົວ,ການລ້ຽງປາໃສ່ນາເຂົ້າ,ນອກນັ້ນກໍ່ມີເມືອງຈໍາພອນ ແລະ ເມືອງໄຊບູລີ ໄດ້ປະກອບຄໍາເຫັນຕໍ່ກອງປະຊຸມ.

ກອງປະຊຸມຈະໄດ້ປ່ອນບັດຄັດເລືອກເອົາຄະນະບໍລິຫານງານພັກເມືອງອຸທຸມພອນ ຊຸດທີ IX .

ກອງປະຊຸມຄັ້ງນີ້ ຈະໄດ້ດໍາເນີນໄປເປັນເວລາ 2 ວັນ ຈິ່ງຈະສໍາເລັດ.

Cr. ບຸນຊູ ພົມມະເທບ