ໃນຕອນບ່າຍຂອງວັນທີ 31 ມັງກອນ 2025, ທີ່ ກະຊວງ ການຕ່າງປະເທດ, ທ່ານ ທອງສະຫວັນ ພົມວິຫານ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ນາງ ກຣາຕາ ເອັນດາ ເວີຣດານິງຕຣຽສ໌ (Ambassador Grata Endah Werdaningtyas), ເອກອັກຄະລັດຖະທູດ ແຫ່ງ ສ. ອິນໂດເນເຊຍ ປະຈໍາ ສປປ ລາວ, ໂດຍໄດ້ຕີລາຄາສູງຕໍ່ການພົວພັນຮ່ວມມືມິດຕະພາບອັນເປັນມູນເຊື້ອ ລະຫວ່າງສອງປະເທດຕະຫຼອດໄລຍະ 6 ທົດສະ ວັດທີ່ຜ່ານມາ ນັບຕັ້ງແຕ່ສອງປະເທດໄດ້ສ້າງຕັ້ງສາຍພົວພັນທາງການທູດນໍາກັນ ໃນວັນທີ 30 ສິງຫາ 1957. ການພົວພັນ ແລະ ການຮ່ວມມືຂອງສອງປະເທດໄດ້ຮັບການຊຸກຍູ້ສົ່ງເສີມ ແລະ ພັດທະນາຂຶ້ນເປັນກ້າວໆ, ຊຶ່ງສະແດງອອກໃນການແລກ ປ່ຽນການຢ້ຽມຢາມເຊິ່ງກັນ ແລະ ກັນ ຂອງຄະນະຜູ້ແທນຂັ້ນສູງຂອງສອງປະເທດ ຢ່າງເປັນປົກກະຕິ.
ວ່າງບໍ່ດົນມານີ້, ໃນໂອກາດເດີນທາງເຂົ້າຮ່ວມກອງປະຊຸມລັດຖະມົນຕີຕ່າງປະເທດອາຊຽນ ແບບວົງແຄບ (AMM Retreat) ໃນວັນທີ 19 ມັງກອນ 2025 ທີ່ ລັງກາວີ, ປະເທດມາເລເຊຍ ກໍ່ໄດ້ພົບປະສອງຝ່າຍຮ່ວມກັບ ທ່ານ Sugiono, ລັດຖະມົນຕີກະຊວງການຕ່າງປະເທດ ອິນໂດເນເຊຍ, ເຊິ່ງສອງຝ່າຍ ໄດ້ເຫັນດີເປັນເອກະພາບໃນການສືບຕໍ່ພັດທະນາການຮ່ວມມືດ້ານເສດຖະກິດຂອງສອງປະເທດ ທີ່ມີທ່າແຮງບົ່ມຊ້ອນ ກໍຄືການຄ້າ ແລະ ການລົງທຶນ, ໂດຍສະເພາະ ການທ່ອງທ່ຽວ, ກະສິ ກຳ, ອຸດສາຫະກຳ, ການບໍລິການ ແລະ ອື່ນໆ.
ເພື່ອສືບຕໍ່ ແລະ ເສີມຂະຫຍາຍມູນເຊື້ອອັນດີງາມຂອງການຮ່ວມມືຢ່າງໃກ້ຊິດ, ໂດຍສະເພາະການເປັນປະທານຮ່ວມກອງປະ ຊຸມຄະນະກຳມາທິການຮ່ວມ ວ່າດ້ວຍ ການຮ່ວມມືສອງຝ່າຍ ລາວ-ອິນໂດເນເຊຍ ຄັ້ງທີ 6 (JCBC-6) ຊຶ່ງຝ່າຍລາວຈະເປັນເຈົ້າພາບ ພາຍໃນປີ 2025 ໃນເວລາທີ່ສອງຝ່າຍມີຄວາມສະ ດວກ, ຊຶ່ງກອງປະຊຸມດັ່ງກ່າວ ແມ່ນກົນໄກທີ່ສຳຄັນໃນການຕິດ ຕາມ ແລະ ຊຸກຍູ້ການຮ່ວມມືຂອງສອງປະເທດໃຫ້ມີບາດກ້າວຂະຫຍາຍຕົວໃໝ່. ນອກນັ້ນ, ສອງຝ່າຍໄດ້ເຫັນດີເປັນເອກະ ພາບຈະສືບຕໍ່ສະໜັບສະໜູນເຊິ່ງກັນ ແລະ ກັນ ທັງໃນຂອບສອງຝ່າຍ ແລະ ຫຼາຍຝ່າຍ, ໂດຍສະເພາະຂອບການຮ່ວມມືອາຊຽນ ແລະ ເວທີສະຫະປະຊາຊາດ.
ໃນຕອນບ່າຍຂອງວັນດຽວກັນ, ທ່ານລັດຖະມົນຕີ ທອງສະ ຫວັນ ພົມວິຫານ ຍັງໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ໂທມັດສ ລາມມາຣ໌ (Mr. Thomas Lammar), ອຸປະທູດ ແຫ່ງ ຣາຊະອານາຈັກ ລຸກຊໍາບວກ ປະຈໍາ ສປປ ລາວ.
ໃນໂອກາດນີ້, ທ່ານ ລັດຖະມົນຕີ ທອງສະຫວັນ ພົມວິຫານ ໄດ້ສະແດງຄວາມ ຍິນດີຕ້ອນຮັບ ທ່ານ ອຸປະທູດ ພ້ອມຄະນະ ແລະ ຕີລາສູງຕໍ່ການພົວພັນຮ່ວມມືອັນດີ ລະຫວ່າງ ສອງປະ ເທດ, ຊຶ່ງສະແດງອອກໃນການພົບປະແລກປ່ຽນຢ້ຽມຢາມຂອງການນໍາຂັ້ນສູງ, ພິເສດ ແມ່ນການຢ້ຽມຢາມທາງການ ສປປ ລາວ ຈໍານວນ 2 ຄັ້ງ ໃນປີ 2024 ຂອງ ທ່ານ ຊາວີເອ ເບັດແຕນລ໌ (Xavier Bettel), ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແລະ ການຄ້າຕ່າງປະເທດ, ລັດຖະມົນຕີຮ່ວມມື ເພື່ອການພັດທະນາ ແລະ ມະນຸດສະທໍາ ແຫ່ງ ຣາຊະອາ ນາຈັກ ລຸກຊໍາບວກ, ພ້ອມທັງໄດ້ລົງນາມຮ່ວມ ສົນທິສັນຍາມິດ ຕະພາບ ແລະ ການຮ່ວມມື ອາຊີຕາເວັນອອກສ່ຽງໃຕ້ (TAC) ໃນໂອກາດເດີນທາງເຂົ້າຮ່ວມກອງປະຊຸມສຸດຍອດ ອາຊຽນ ທີ່ ນະ ຄອນຫຼວງວຽງຈັນ. ພ້ອມກັນນີ້, ທ່ານລັດຖະມົນຕີ ໄດ້ສະແດງຄວາມຂອບໃຈຢ່າງຈິງໃຈ ມາຍັງລັດຖະບານ ແລະ ປະຊາຊົນ ລຸກຊຳບວກ ທີ່ໄດ້ໃຫ້ການຮ່ວມມື ແລະ ສະໜັບສະໜູນການພັດທະ ນາໃຫ້ແກ່ ສປປ ລາວ ໃນຫຼາຍຂະແໜງການ ເຊັ່ນ: ສາທາລະນະ ສຸກ, ການສຶກສາ, ພັດທະນາຊັບພະຍາກອນມະນຸດ, ພັດທະນາຊົນນະບົດ, ດ້ານອຸດສາຫະກຳທ່ອງທ່ຽວ-ໂຮງແຮມ ແລະ ການບໍລິການ, ດ້ານການເງິນ-ທະນາຄານ ແລະ ດ້ານພັດທະນາພື້ນ ຖານໂຄງລ່າງຂອງພາກລັດ.
ນອກນັ້ນ, ສອງຝ່າຍໄດ້ເຫັນດີເປັນເອກະພາບຈະສືບຕໍ່ແລກ ປ່ຽນການຢ້ຽມຢາມ, ສືບຕໍ່ຊຸກຍູ້ການສົ່ງເສີມການຮ່ວມມືທາງດ້ານການຄ້າ ແລະ ການລົງທຶນ ແລະ ສືບຕໍ່ສະໜັບສະໜູນເຊິ່ງກັນ ແລະ ກັນ ທັງໃນເວທີພາກພື້ນ ແລະ ສາກົນ ເພື່ອເປັນການສົ່ງເສີມການພົວພັນຮ່ວມມືຂອງສອງປະເທດ ໃຫ້ໄດ້ຮັບການພັດທະນາຂຶ້ນເປັນກ້າວໆ.
