ໄຂກອງປະຊຸມໃຫຍ່ຜູ້ແທນອົງຄະນະພັກເມືອງດາກຈຶງ ຄັ້ງທີ XVI

ກອງປະຊຸມໃຫຍ່ຜູ້ແທນອົງຄະນະພັກເມືອງດາກຈຶງ ແຂວງເຊກອງ ຄັ້ງທີ XVI ໄຂຂຶ້ນໃນວັນທີ 10 ກຸມພາ ນີ້, ທີ່ສະໂມສອນເມືອງດັ່ງກ່າວ ໂດຍພາຍໃຕ້ການເປັນປະທານຂອງ ສະຫາຍ ເພັງນາ ຈັນທະພອນ ກໍາມະການພັກແຂວງ ເລຂາພັກເມືອງ ເຈົ້າເມືອງດາກຈຶງ ແລະ ເປັນກຽດເຂົ້າຮ່ວມມີສະຫາຍ ເຫລັກໄຫລ ສີວິໄລ ກໍາມະການສູນກາງພັກ ເລຂາພັກແຂວງ ເຈົ້າແຂວງເຊກອງ.

ສະຫາຍ ເພັງນາ ຈັນທະພອນ ໄດ້ກ່າວໄຂກອງປະຊຸມວ່າ: ກອງປະຊຸມໃຫຍ່ຄັ້ງນີ້, ໄຂຂຶ້ນໃນທ່າມກາງເຫດການ ການເມືອງ ທີ່ມີຄວາມໝາຍຄວາມສໍາຄັນຢ່າງຍິ່ງ ທັງເປັນກົດເກນ ແລະ ບາດລ້ຽວປະຫວັດສາດ ໃນການກໍານົດທິດທາງ, ໜ້າທີ່ສໍາຄັນສໍາລັບການພັດທະນາເມືອງດາກຈຶງ ເພື່ອກ້າວສູ່ຈຸດ ໝາຍທີ່ວາງໄວ້ດ້ວຍເງື່ອນໄຂໃໝ່. ກອງປະຊຸມ, ຈະໄດ້ດໍາເນີນໄປເປັນເວລາ 2 ວັນ ໂດຍຈະໄດ້ທົບທວນຄືນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XV ແລະ ແຜນພັດທະນາເສດຖະກິດ-ສັງຄົມ ຂອງເມືອງ ໃນໄລຍະ 5 ປີ (2020-2024) ຜ່ານມາ ເພື່ອຊອກໃຫ້ເຫັນຜົນສໍາເລັດດ້ານດີ, ດ້ານອ່ອນ ແລະ ຂໍ້ຄົງຄ້າງ ເພື່ອນໍາໄປແກ້ໄຂໃຫ້ຖືກຕ້ອງ, ວ່ອງໄວ ແລະ ທັນການ. ພ້ອມນັ້ນ, ກໍຖອດຖອນເອົາເປັນບົດຮຽນທີ່ດີ ເພື່ອສືບຕໍ່ນໍາພາ-ຊີ້ນໍາວຽກງານໃນຊຸມປີຕໍ່ໆໄປ, ບົນພື້ນຖານມີການວິເຄາະ-ວິໄຈສະພາບຄວາມເປັນຈິງ ແລະ ແທດເໝາະກັບແນວທາງນະໂຍບາຍ ຂອງພັກ, ພ້ອມທັງ ຮັບຮອງເອົາທິດທາງຄາດໝາຍສູ້ຊົນ ແລະ ໜ້າທີ່ວຽກງານແຕ່ລະດ້ານໃນຊຸມປີຕໍ່ໜ້າ ເພື່ອແນໃສປະຕິບັດແນວທາງຂອງພັກ, ແຜນນະໂຍບາຍ ແລະ ລະບຽບກົດໝາຍ ຂອງລັດ ໃນການສ້າງສາພັດທະນາເມືອງດາກຈຶງ ໃຫ້ຫັນໄປສູ່ຄຸນນະພາບໃໝ່.

ໃນກອງປະຊຸມ, ຜູ້ແທນສົມບູນຈະໄດ້ໃຊ້ສິດປະຊາທິປະໄຕ ຂອງຕົນດໍາເນີນການເລືອກຕັ້ງເອົາຄະນະບໍລິຫານງານພັກເມືອງດາກຈຶງ ສະໄໝທີ XVI ຊຶ່ງເປັນການນໍາສູງສຸດ ຂອງພັກຂັ້ນເມືອງ, ເປັນໃຈກາງເຕົ້າໂຮມຄວາມສາມັກຄີປອງດອງເປັນເອກະພາບພາຍໃນພັກ ແລະ ສືບຕໍ່ນໍາພາ-ຊີ້ນໍາສະມາຊິກພັກ, ພະນັກງານ ແລະ ປະ ຊາຊົນບັນດາເຜົ່າພາຍໃນເມືອງ ຜັນຂະຫຍາຍມະຕິກອງປະຊຸມໃຫຍ່ໃນຄັ້ງນີ້ ເຂົ້າສູ່ຂະບວນການວຽກດງານຕົວຈິງ ແລະ ໃຫ້ມີຜົນສໍາເລັດຕາມລະດັບຄາດໝາຍທີ່ວາງໄວ້.

Cr: ສັນຍາ