ເມືອງບໍ່ແຕນ ຈັດບຸນເຂົ້າຈີ່ໃຫຍ່ ປະຈໍາປີ 2025

ບຸນເຂົ້າຈີ່ໃຫຍ່ ເມືອງບໍ່ແຕນ ແຂວງໄຊຍະບູລີ ປະຈໍາປີ 2025 ໄດ້ຈັດຂຶ້ນໃນວັນທີ 11 ກຸມພາ 2025 ທີ່ເມືອງດັ່ງກ່າວ ໂດຍການໃຫ້ກຽດເຂົ້າຮ່ວມຂອງ ທ່ານ ເພັດພິໄຊ ສູນວິໄລ ຮອງເຈົ້າແຂວງໄຊຍະບູລີ.

ບຸນເຂົ້າຈີ່ໃຫຍ່ປີນີ້ ແມ່ນໄດ້ກຳນົດຮູບແບບ ແລະ ເນື້ອໃນຂອງງານ, ບັນດາກິດຈະກຳຕ່າງໆ ໃຫ້ມີຫຼາຍສີສັນຕະຫຼອດວັນ-ຄືນ ເຊິ່ງໄດ້ກຳນົດໄລຍະເວລາຈັດງານ 5 ວັນ 4 ຄືນ, ໄດ້ສ້າງຮູບເຂົ້າຈີ່ໃຫຍ່ຈຳລອງ ມີກ້ອນໃຫຍ່ 1 ກ້ອນ, ກ້ອນນ້ອຍ 8 ກ້ອນ, ມີ ການວາງສະແດງສິນຄ້າ ຈາກແຕ່ລະທ້ອງຖິ່ນ ແລະ ຈີ່ເຂົ້າຈີ່ທີ່ເປັນເອກະລັກຂອງແຕ່ລະເຂດ ແລະ ຫ້ອງການ, ມີຮ້ານຄ້າຂາຍເຄື່ອງປະເພດຕ່າງໆ , ມີການສະແດງສິລະປະວັນະຄະດີຈາກໂຮງຮຽນມັດທະຍົມຕອນຕົ້ນ ແລະ ມັດທະຍົມສົມບູນ ຈຳ ນວນ 15 ລາຍການ, ມີນັກຮ້ອງສຽງດີ ປະກອບສ່ວນໃນງານ ຈຳນວນ 10 ຄະນະ, ການປະກວດນາງທິດາເຂົ້າຈີ່ໃຫຍ່ ຈຳນວນ 9 ນາງສາວ ແລະ ການປະກວດອາຫານພື້ນເມືອງ ທີ່ເປັນເອກະລັກ ທີ່ສະແດງເຖິງວິຖີການດຳລົງຊີວິດ ຂອງປະຊາຊົນຊາວ ເມືອງບໍ່ແຕນ ຈຳນວນ 21 ຮ້ານ.

ນອກນີ້ຍັງມີການຈັດໃຫ້ທ່ອງທ່ຽວທຳມະຊາດ ແລະ ວັດທະນະທຳ ເຊັ່ນ: ນ້ຳຕົກ ຕາດສະແນນ, ນ້ຳຕົກຕາດຮຳ, ແກ້ງທຽນ, ແກ້ງຂ່າ, ຫໍໄຕປີດົກ ວັດໂພແທ່ນໂບຣານາຣາມ ແລະ ມີການຊົມຈູດບັ້ງໄຟດອກ ຈຳນວນ 90 ລູກຕື່ມອີກ, ຈາກນັ້ນ ທ່ານ ບຸນພະລັງ ວິໄລສັກ ວ່າການເຈົ້າເມືອງ ກໍ່ໄດ້ຂຶ້ນກ່າວເປີດງານບຸນເຊິ່ງທ່ານໄດ້ກ່າວວ່າ: ການຈັດງານບຸນນີ້ກໍ່ເພື່ອອະນຸລັກຮັກສາ ແລະ ເສີມຂະຫຍາຍວັດທະນະທຳອັນດີງາມຂອງຊາດ ຂອງທ້ອງຖິ່ນ ໃຫ້ຢູ່ຄູ່ສັງຄົມລາວຊາວເມືອງບໍ່ແຕນ ໄປຊົ່ວກາລະນາ, ທັງເປັນການເຕົ້າໂຮມຄວາມສາມັກຄີຮັກແພງອັນແໜ້ນແຟ້ນ ຂອງປະຊາຊົນບັນດາເຜົ່າພາຍໃນເມືອງ, ເຊີດຊູຈິດໃຈຮັກຊາດ ຮັກບ້ານເກີດເມືອງນອນຂອງຕົນ, ອີກທາງໜຶ່ງກໍ່ເປັນການຍູ້ແຮງທາງດ້ານເສດຖະກິດໃຫ້ມີການຂະຫຍາຍຕົວ ໂດຍສະເພາະການດຳເນີນທຸລະກິດ, ປະກອບການຕ່າາງໆ ບັນດາຫ້າງຮ້ານບໍລິການ ແລະ ການຜະລິດໃຫ້ມີຄວາມເຂັ້ມແຂງຂຶ້ນ, ເປັນການເອກອ້າງທະນົງໃຈມູນເຊື້ອ, ເອກະ ລັກຂອງເມືອງ, ວິຖີການດຳລົງຊີວິດຂອງປະຊາຊົນ, ສົ່ງເສີມການທ່ອງທ່ຽວ ດຶງດູດນັກທ່ອງທ່ຽວໃຫ້ເຂົ້າມາທ່ຽວຊົມເມືອງບໍ່ແຕນນັບມື້ນັບຫຼາຍຂຶ້ນ.

Cr: ສາຍຄຳ ບຸນຍາວົງ