ວັນທີ 13 ກຸມພາ 2025, ການຂາຍປີ້ເຂົ້າຊົມຮູບເງົາກາຕູນຈີນ “ນາຈາ 2” ບັນລຸລື່ນກາຍ 10 ຕື້ຢວນ, ກາຍເປັນຮູບເງົາເລື່ອງທຳອິດໃນປະຫວັດສາດຂອງຈີນທີ່ຂາຍປີ້ບັນລຸລື່ນກາຍ 10 ຕື້ຢວນ, ທັງຂຶ້ນເປັນສາມອັນດັບທຳອິດຂອງຮູບເງົາກາຕູນທີ່ຂາຍປີ້ເຂົ້າຊົມໄດ້ຫຼາຍທີ່ສຸດໃນທົ່ວໂລກ. ເລື່ອງນີ້ບໍ່ພຽງແຕ່ເປັນຜົນງານອັນຍິ່ງໃຫຍ່ຂອງອຸດສາຫະກຳຮູບເງົາຂອງຈີນເທົ່ານັ້ນ, ແຕ່ຍັງໄດ້ສ່ອງແສງໃຫ້ເຫັນເຖິງການຍົກລະດັບການຫັນເປັນອຸດສາຫະກຳ ແລະ ການສະແດງເນື້ອໃນທີ່ມີຫົວຄິດປະດິດສ້າງຂອງວັດທະນະທຳຈີນ ເຊິ່ງເປັນແຮງບັນດານໃຈອັນສຳຄັນຕໍ່ການພັດທະນາອຸດສາຫະກຳວັດທະນະທຳຂອງຈີນ.
ຮູບເງົາກາຕູນ “ນາຈາ 2” ສ້າງຂຶ້ນໂດຍຖືເອົາ ເລື່ອງ “ຫ້ອງສິນ” ຫຼື the Investiture of the Godsທີ່ເປັນເທບນິຍາຍອະມະຕະຂອງຈີນເປັນແມ່ແບບ, ເຊື່ອມສານປັດຊະຍາເຕົ໋າ, ລະບົບເທວະດາ ແລະ ເຕັກນິກເລົ່າການເລື່ອງໃນຍຸກປັດຈຸບັນໄດ້ເປັນຢ່າງດີ, ຜ່ານຫົວຂໍ້ທີ່ “ຕົນເອງຕ້ອງກຳແໜ້ນຊາຕາກຳຂອງຕົນ” ສະແດງໃຫ້ເຫັນເຖິງສະຕິຕື່ນຕົວ ແລະ ຈິດໃຈຕໍ່ຕ້ານກັບຊາຕາກຳຂອງສ່ວນເອກະ ເທດ. ການບັນລະຍາຍວັດທະນະທຳດັ້ງເດີມແບບນີ້, ບໍ່ພຽງແຕ່ໄດ້ສ້າງພະລັງຊີວິດໃໝ່ໃຫ້ກັບເທບນິຍາຍດັ້ງເດີມເທົ່ານັ້ນ, ແຕ່ຍັງສອດຄ່ອງກັບຄວາມຕ້ອງການດ້ານຈິດອາລົມ ແລະ ຄວາມນິຍົມດ້ານວິຈິດຕະທັດຂອງຜູ້ຊົມໃນຍຸກປັດຈຸບັນອີກດ້ວຍ. ການສ່ອງແສງຄວາມໝັ້ນໃຈດ້ານວັດທະນະທຳຄືແນວນີ້, ໄດ້ເປີດຊ່ອງທາງໃໝ່ໃຫ້ແກ່ການພັດທະນາອຸດສາຫະກຳວັດທະນະທຳຂອງຈີນ, ຊຸກຍູ້ສົ່ງເສີມໃຫ້ພວກນັກປະດິດຄິດແຕ່ງລົງເລິກຂຸດຄົ້ນມິ່ງຂວັນວັດທະນະທຳມູນເຊື້ອ ແລະ ຊຸກຍູ້ໃຫ້ມີຜະລິດຕະພັນທີ່ມີຫົວຄິດປະດິດສ້າງ ແລະ ສີສັນພິເສດຂອງວັດທະນະທຳຈີນໃຫ້ຫຼາຍຂຶ້ນກວ່າເກົ່າ.
ເວົ້າໃນດ້ານເຕັກນິກແລ້ວ, ພາບທີ່ໃຊ້ເຕັກນິກ CG ໃນ “ນາຈາ 2” ມີຫຼາຍກວ່າ 1,900 ພາບ, ປະລິມານສະສົມແຄສ (Cache)ສຳລັບພາບ CG ດ່ຽວ ມີເຖິງ 10 ເທຣາໄບ; ໃນຮູບເງົາໄດ້ປະສົມປະສານເອກະລັກຮູບແຕ້ມນ້ຳມຶກແບບດັ້ງເດີມຂອງຈີນກັບເຕັກນິກກາຕູນ 3 ມິຕິ ແລະ ໄດ້ສ້າງວິຈິດຕະກຳ “ແບບຈີນ” ທີ່ມີສີສັນພິເສດ, ສະແດງໃຫ້ເຫັນເຖິງເຕັກນິກຜະລິດກາຕູນຈີນທີ່ມີລະດັບສູງ. ຄວາມກ້າວໜ້າດ້ານເຕັກນິກແບບນີ້ບໍ່ພຽງແຕ່ເປັນຂີດໝາຍສະແດງໃຫ້ເຫັນເຖິງການເຕີບໂຕດ້ານອຸດສາຫະກຳກາຕູນຂອງຈີນເທົ່ານັ້ນ, ແຕ່ຍັງສະແດງໃຫ້ເຫັນວ່າ ອຸດສາຫະກຳຮູບເງົາຂອງຈີນໄດ້ມີກຳລັງທີ່ແຂງແຮງເພື່ອແຂ່ງຂັນກັບຮອນລີວຸດ, ຈີນພວມກ້າວພົ້ນຈາກປະເທດໃຫຍ່ດ້ານການຜະລິດຮູບເງົາ ໄປສູ່ປະເທດທີ່ມີຄວາມເຂັ້ມແຂງ ຫຼື ມີອໍານາດດ້ານການຜະລິດຮູບເງົາ.
“ນາຈາ 2 ” ບໍ່ພຽງແຕ່ໄດ້ເຮັດໃຫ້ຜູ້ຊົມມີຄວາມນິຍົມຊົມຊອບຕໍ່ກາຕູນຂອງຈີນເພີ່ມຂຶ້ນເທົ່ານັ້ນ, ແຕ່ຍັງໄດ້ສ້າງຄວາມກະຕືລືລົ້ນໃນການຊົມໃຊ້ເຄື່ອງອຸປະໂພກບໍລິໂພກທີ່ກຳເນີດຈາກຮູບເງົາດັ່ງກ່າວອີກດ້ວຍ. ຜະລິດຕະພັນທີ່ກຳເນີດຈາກຮູບເງົາ “ນາຈາ 2” ລວມມີ: ເຄື່ອງຫຼິ້ນ, ອຸປະກອນການຮຽນ, ອາຫານ, ສິ່ງພິມ, ຕຸກກະຕາຂົນ, ເຄື່ອງໃຊ້ໃນຊີວິດປະຈຳວັນ ແລະອື່ນໆ ຫຼາຍຊະນິດ, ລາຄາຜະລິດຕະພັນເຫຼົ່ານີ້ແມ່ນມີນັບແຕ່ບໍ່ຮອດ 10 ຢວນ ຫາ ຫຼາຍຮ້ອຍຢວນ.
ຢູ່ຮ້ານຄ້ານ້ອຍໃຫຍ່ຕ່າງໆໃນບັນດາຕົວເມືອງໃຫຍ່, ລວມເຖິງເວັບໄຊການຄ້າເອເລັກໂຕຣນິກຂອງຈີນ, ຜະລິດຕະພັນທີ່ເປັນຮູບຂອງຕົວລະຄອນຕ່າງໆ ເປັນຕົ້ນ: ນາຈາ, ອາວປິງ ແລະອື່ນໆ ແມ່ນປະກົດເຫັນໄດ້ຢູ່ທຸກບ່ອນ ເຊິ່ງສາມາດດຶງດູດຜູ້ບໍລິໂພກຈຳນວນຫຼວງຫຼາຍຍາດກັນຈັດຊື້. ຢູ່ຫຼາຍຮ້ານຈົນບໍ່ພໍຂາຍເລື້ອຍໆ, ການຈຳໜ່າຍຜ່ານທາງອອນລາຍກໍມີຄວາມຟົດຟື້ນເຊັ່ນດຽວກັນ. ຍີ່ຫໍ້ FunCrazy ຮ່ວມມືກັບ “ນາຈາ 2” ນຳສະເໜີໂຄງການລະດົມທຶນເພື່ອຜະລິດສິນຄ້າສຳຮອງຂອງຮູບເງົາຜ່ານທາງອອນລາຍ ໂດຍມີເປົ້າໝາຍລະດົມທຶນໃຫ້ໄດ້ 1 ແສນຢວນ, ມາຮອດປັດຈຸບັນ ສາມາດລະດົມທຶນໄດ້ຫຼາຍກວ່າ 25 ລ້ານຢວນ ແລ້ວ.
ນອກຈາກນີ້, “ນາຈາ 2” ບໍ່ພຽງແຕ່ໄດ້ຮັບຜົນສຳເລັດຢ່າງຈົບງາມໃນຕະຫຼາດພາຍໃນປະເທດຈີນເທົ່ານັ້ນ, ແຕ່ຍັງໄດ້ຮັບການຕີລາຄາຢ່າງສູງເຊັ່ນດຽວກັນໃນຕະ ຫຼາດສາກົນ, ໃນນັ້ນ ລວມທັງອາເມຣິກາເໜືອ. ນັບແຕ່ເລີ່ມຕົ້ນການສາຍເປັນຄັ້ງທຳອິດຢູ່ອາເມຣິກາເໜືອ ເມື່ອວັນທີ 8 ກຸມພາເປັນຕົ້ນມາ, “ນາຈາ 2” ໄດ້ຮັບຄວາມນິຍົມຊົມຊອບເປັນຢ່າງສູງຈາກຜູ້ຊົມຕ່າງປະເທດ. ໃນພິທີສາຍຮູບເງົາດັ່ງກ່າວເປັນຄັ້ງທຳອິດຢູ່ລອສແອງເຈີລິສຂອງອາເມຣິກາ ແມ່ນມີຜູ້ຊົມເຕັມໆເລີຍ, ລະບົບຂາຍປີ້ຢູ່ໂຮງຮູບເງົາຂອງນິວຢອກ, ຊິດນີ ແລະຕົວເມືອງອື່ນໆ ຈົນເຖີງຂັ້ນຕິດຂັດຍ້ອນມີຜູ້ຊົມເຂົ້າໃຊ້ລະບົບຫຼາຍເກີນໄປ, ການຂາຍປີ້ລ່ວງໜ້າບາງຄັ້ງ ແມ່ນຂາຍໝົດກ່ອນລ່ວງໜ້າໜຶ່ງອາທິດ.
ທ່ານ ໂຣເບິກ ກິງ ຜູ້ຜະລິດຮູບເງົາຂອງຮອນລີວຸດ ກ່າວວ່າ: “ນາຈາ 2” ໄດ້ສະ ແດງໃຫ້ເຫັນວ່າ: ຮູບເງົາຈີນມີລູກກຸນແຈສໍາຄັນທີ່ສາມາດເລົ່າເລື່ອງທົ່ວໂລກໄດ້ເປັນຢ່າງດີ. ຕາມຂ່າວແຈ້ງວ່າ, “ນາຈາ 2” ຍັງຈະໄປສາຍຢູ່ 10 ປະເທດສະມາຊິກອາຊຽນ. ຈາກນີ້ອີກບໍ່ດົນ, ຜູ້ຊົມຢູ່ປະເທດລາວກໍຈະສາມາດຮັບຊົມຮູບເງົາກາຕູນເລື່ອງນີ້ໄດ້ເຊັ່ນດຽວກັນ.
ໂດຍຜ່ານເຕັກນິກກາຕູນ ແລະ CG ລະດັບສຸດຍອດ, “ນາຈາ 2” ໄດ້ສະແດງໃຫ້ເຫັນວັດທະນະທຳດັ້ງເດີມຂອງຈີນຕໍ່ຊາວໂລກດ້ວຍຮູບແບບໃໝ່ຫຼ້າສຸດ. ຜົນສຳເລັດດັ່ງກ່າວບໍ່ພຽງແຕ່ໄດ້ສະແດງໃຫ້ເຫັນເຖິງມົນສະເໜ່ພິເສດຂອງວັດທະນະທຳຈີນເທົ່ານັ້ນ, ແຕ່ຍັງໄດ້ບັນລະຍາຍໃຫ້ເຫັນເຖີງແນວຄິດທີ່ວ່າ: “ຂອງຊົນຊາດ ກໍເປັນຂອງໂລກ” ອີກດ້ວຍ. ແນວຄິດດັ່ງກ່າວບໍ່ພຽງແຕ່ສາມາດນຳໃຊ້ໃນການຜະລິດຮູບເງົາ ແລະ ລະຄອນໂທລະພາບເທົ່ານັ້ນ, ແຕ່ຍັງໄດ້ສະໜອງບົດຮຽນອັນລ້ຳຄ່າໃຫ້ແກ່ການພັດທະນາແບບຫັນເປັນສາກົນ ແລະ ການແລກປ່ຽນໃນຂົງເຂດວັດທະນະທຳອື່ນໆອີກດ້ວຍ.
Cr: CMG
