ແບບຢ່າງໃນດ້ານການພັດທະນາເສດຖະກິດ ແລະບົດບາດຂອງຈີນຕໍ່ໂລກ: ທ່ານ ໂມຮໍາເໝັດ ຊາຄິບ (Mohammed Saqib), ຜູ້ອໍານວຍການສູນຄົ້ນຄວ້າເສດຖະກິດເຂດໂລກໃຕ້ ໄດ້ເນັ້ນຢໍ້າເຖີງການປ່ຽນແປງຂອງຈີນຈາກການຂະຫຍາຍຕົວດ້ວຍຄວາມໄວສູງໄປສູ່ການພັດທະນາທີ່ເຕັມໄປດ້ວຍຄຸນນະພາບສູງ. ທ່ານເນັ້ນໜັກວ່າ: ຈີນ ມຸ່ງເນັ້ນພັດທະນາປະເທດເປັນຢ່າງດີ, ທັງທາງດ້ານການປະດິດສ້າງເຕັກໂນໂລຊີທັນສະໄໝ, ການຜະລິດເຕັກໂນໂລຊີອັດສະລິຍະ ແລະ ຄວາມຍືນຍົງ. ນອກຈາກນີ້, ຍັງດຳເນີນການປະຕິຮູບດ້ານການເງິນ, ເພີ່ມການລົງທຶນໃນສະຫວັດດີການສັງຄົມ ແລະ ສົ່ງເສີມການບໍລິໂພກພາຍໃນປະເທດ ເຮັດໃຫ້ກາຍເປັນເສົາຄ້ຳສຳຄັນຂອງການຫັນປ່ຽນໃໝ່ທີ່ນັບມື້ດີຂຶ້ນເລື້ອຍໆ.
ສ່ວນ ທ່ານ Arnaud Bertrand, ຜູ້ປະກອບການຊາວຝລັ່ງທີ່ຮູ້ເລິກເຊິ່ງກ່ຽວກັບອາລິຍະທໍາຈີນ ໄດ້ວິພາກວິຈານສື່ມວນຊົນຕາເວັນຕົກທີ່ອອກຂ່າວໃນທາງທີ່ບໍ່ສ້າງສັນກ່ຽວກັບປະເທດຈີນ ແລະ ຊີ້ໃຫ້ເຫັນວ່າ: ມາດຕະການ ເຊັ່ນ: ການຄວບຄຸມການສົ່ງອອກຊິບ (semiconductors) ແລະ ອັດຕາພາສີ 100% ຕໍ່ພາຫະນະໄຟຟ້າຂອງຈີນຂອງບາງປະເທດຕາເວັນຕົກ ແມ່ນມາຈາກຄວາມກັງວົນຕໍ່ການເພີ່ມຂຶ້ນດ້ານເຕັກໂນໂລຊີຂອງຈີນ. ທ່ານໃຫ້ຂໍ້ສັງເກດວ່າ: ຈີນ ພວມຫັນປ່ຽນຈາກການຜະລິດຍີ່ຫໍ້ສິນຄ້າຕ່າງປະເທດມາເປັນການພັດທະນາສິນຄ້າຍີ້ຫໍ້ຂອງຕົນ. ດ້ວຍຄວາມສຳເລັດຢ່າງໜ້າອັດສະຈັນໃນຂະແໜງການຕ່າງໆ ເຊັ່ນ: ລົດໄຟຟ້າ ແລະ ປັນຍາປະດິດ (AI) ເຮັດໃຫ້ຄູ່ແຂ່ງຫລາຍປະເທດໃນຕາເວັນຕົກມີຄວາມວິຕົກກັງວົນ.
ຂະນະທີ່, ທ່ານ Jose Ricardo, ອາຈານສອນຢູ່ມະຫາວິທະຍາໄລເຊົາໂປໂລ ໄດ້ເນັ້ນໜັກເຖິງການຮັດແໜ້ນສາຍພົວພັນລະຫວ່າງຈີນກັບອາເມລິກາລາຕິນ. ທ່ານກ່າວວ່າ: ວົງເງິນການຄ້າລະຫວ່າງຈີນກັບບຣາຊິນໃນປີ 2024 ບັນລຸເຖິງ 157,9 ຕື້ໂດລາ ເຮັດໃຫ້ຈີນກາຍເປັນຄູ່ການຄ້າຕົ້ນຕໍຂອງຫຼາຍປະເທດອາເມລິກາລາຕິນ. ທ່ານ Ricardo ຍັງໄດ້ຍົກໃຫ້ເຫັນບົດບາດທີ່ເພີ່ມຂຶ້ນຂອງຈີນເວທີໂລກ ໂດຍສະເພາະແມ່ນກຸ່ມປະເທດເສດຖະກິດຈະເລີນໃໝ່ ຫຼື BRICS, ເນື່ອງຈາກຈີນໄດ້ຊ່ວຍປັບປຸງລະບຽບການຕ່າງໆ ດ້ານເສດຖະກິດສາກົນ ເພື່ອຜົນປະໂຫຍດລວມ ຕໍ່ບັນດາປະເທດເຂດໂລກໃຕ້.
ແບບຢ່າງການປົກຄອງທີ່ດີຂອງຈີນ: ທ່ານ ໂມຮໍາເໝັດ ຊາຄິບ ໄດ້ຍົກໃຫ້ເຫັນເຖີງການເລືອກຕັ້ງໃນປະເທດຕາເວັນຕົກທີ່ມີນາຍທຶນຄອບຄອງ ເຊິ່ງຕ່າງກັບຈີນທີ່ໃຫ້ຄວາມສຳຄັນກັບການວາງແຜນໃນໄລຍະຍາວ ແລະ ການຕັດ ສິນໃຈຮ່ວມກັນແບບລວມສູນ.
ທ່ານ Arnaud Bertrand ກ່າວວ່າ: ລະບົບການເມືອງຂອງຈີນ ເນັ້ນໜັກເຖິງການປົກຄອງແບບມີຄຸນນະພາບສູງ, ເຊິ່ງມີຜູ້ນຳທີ່ກ້າວຂຶ້ນມາດໍາລົງຕໍາແໜ່ງໄດ້ຜ່ານປະສົບການຫຼາຍປີຈາກທ້ອງຖິ່ນເຖິງລະດັບປະເທດ. ໃນຂະນະທີ່ຕາເວັນຕົກມັກເລືອກຜູ້ນຳທີ່ເນັ້ນຄວາມນິຍົມ ເຊິ່ງອາດຂາດຄວາມສອດຄ່ອງໃນດ້ານນະໂຍບາຍ.
ທ່ານ Jose Ricardo ກ່າວວ່າ: ການປົກຄອງຂອງຈີນທີ່ພັດທະນາຂຶ້ນແຕ່ປີ 1949 ແມ່ນອີງໃສ່ຫຼັກການບໍ່ຮຸກຮານ, ບໍ່ແຊກແຊງ, ຄວາມສະເໝີພາບ ແລະ ຜົນປະໂຫຍດຮ່ວມກັນ. ນະໂຍບາຍໃນການພັດທະນາຂອງຈີນ ແມ່ນຖືເອົາປະຊາຊົນເປັນແກນກາງ ຫຼື ຖືເອົາປະຊາຊົນເປັນກົກ, ເນັ້ນໃສ່ການພັດທະນາທີ່ຍືນຍົງ ແລະ ຍາວນານຫລາຍກວ່າການຫວັງຜົນໃນໄລຍະສັ້ນ ເຊິ່ງມີຄວາມແຕກຕ່າງກັນກັບການປົກຄອງແບບຕາເວັນຕົກ.
ການຄຸ້ມຄອງສະພາບອາກາດຂອງໂລກ ແລະ ການພັດທະນາແບບຍືນຍົງຂອງຈີນ: ການເປັນຜູ້ນໍາຂອງຈີນໃນການຮັບມືກັບການປ່ຽນແປງຂອງສະພາບດິນຟ້າອາກາດ ແມ່ນຫົວຂໍ້ສໍາຄັນຂອງການສົນທະນາ. ທ່ານ ໂມຮໍາເໝັດ ຊາ ຄິບ ບໍ່ເຫັນດີກັບການທີ່ອາເມລິການຖອນຕົວອອກຈາກຂໍ້ຕົກລົງສັນຢາປາຣີ. ຂະນະທີ່ ຈີນ ໄດ້ດໍາເນີນມາດຕະການຢ່າງເດັດຂາດເພື່ອພັດທະນາພະລັງງານສະອາດ ຫລື ພະລັງງານສີຂຽວ. ທ່ານ Arnaud Bertrand ກ່າວວ່າ: ຄວາມຢ້ານກົວກ່ຽວກັບກໍາລັງການຜະລິດສີຂຽວຂອງຈີນຫລາຍເກີນໄປ ຈະເຮັດໃຫ້ບາງປະເທດໃນຕາເວັນຕົກສູນເສຍຄວາມສາມາດໃນການແຂ່ງຂັນກວ່າຄວາມຢ້ານກົວທາງດ້ານເສດຖະກິດ. ສ່ວນ ທ່ານ Jose Ricardo ໄດ້ເນັ້ນຢໍ້າການຮ່ວມມືລະຫວ່າງບຣາຊິນກັບຈີນໃນການພັດທະນາສີຂຽວ ໂດຍຕັ້ງຂໍ້ສັງເກດວ່າ: ຜູ້ຜະລິດລົດຍົນ BYD ແລະ Great Wall Motors ໄດ້ສ້າງຕັ້ງຢູ່ປະເທດບຣາຊິນເຊິ່ງຖືເປັນການເລັ່ງປ່ຽນແປງບຣາຊິນໄປສູ່ພະລັງງານສີຂຽວທີ່ຍືນຍົງ.
ສ່ວນ ທ່ານ Fred M’membe, ປະທານພັກສັງຄົມນິຍົມຂອງຊັມບີ ໄດ້ຊີ້ໃຫ້ເຫັນວ່າ: ສ່ວນໃຫຍ່ຂອງໂຄງ ການພັດທະນາໂຄງລ່າງພື້ນຖານພະລັງງານສີຂຽວ ແລະ ການຊ່ວຍເຫຼືອທີ່ຈໍາເປັນຕໍ່ອາຟຣິກາແມ່ນມາຈາກຈີນ. ພ້ອມນີ້ ທ່ານໄດ້ຕັ້ງຂໍ້ສັງເກດວ່າ: ຄໍາເວົ້າຂອງບາງປະເທດຕາເວັນຕົກກ່ຽວກັບຄວາມຍືນຍົງສ່ວນໃຫຍ່ຂາດການດໍາເນີນການທີ່ເປັນຮູບປະທໍາ ເຮັດໃຫ້ຈີນກາຍເປັນຄູ່ຄ້າທີ່ໜ້າເຊື່ອຖືນັບມື້ຫຼາຍຂຶ້ນສຳລັບການປ່ຽນແປງສູ່ພະລັງງານສີຂຽວໃນອາຟຣິກາ.
ນາຍົກລັດຖະມົນຕີເນປານ: ເປັນຄູ່ຮ່ວມມືກັບຈີນສໍາລັບການຮ່ວມມື ແລະ ການເຕີບໃຫຍ່ຂອງເຂດໂລກໃຕ້: ໃນຄໍາປາໄສຂອງ ທ່ານ K.P. Sharma Oli ນາຍົກລັດຖະມົນຕີເນປານ ໄດ້ຢືນຢັນຄວາມມຸ່ງໝັ້ນຂອງເນປາຍຕໍ່ຂໍ້ລິເລີ່ມໜຶ່ງແລວໜຶ່ງເສັ້ນທາງ (Belt and Road Initiative: BRI) ແລະ ຍ້ອງຍໍບົດບາດຂອງຈີນໃນການສົ່ງເສີມການເຊື່ອມໂຍງ ແລະ ຄວາມຈະເລີນຮຸ່ງເຮືອງຮ່ວມກັນຂອງປະເທດໃນເຂດໂລກໃຕ້. ທ່ານໄດ້ເລົ່າຄືນກ່ຽວກັບການສົນທະ ນາຂອງທ່ານກັບຜູ້ນໍາຈີນໃນການຮັບມືກັບການປ່ຽນແປງຂອງສະພາບດິນຟ້າອາກາດ ແລະ ການສົ່ງເສີມຄວາມສະເໝີພາບທົ່ວໂລກ.
ທ່ານ K.P. Sharma Oli ກ່າວຢໍ້າວ່າ: ເນປານ ເຊິ່ງເປັນທີ່ຕັ້ງຂອງພູເຂົາຫິມະໄລ ແມ່ນມີຄວາມສ່ຽງຕໍ່ການປ່ຽນແປງຂອງສະພາບອາກາດເປັນພິເສດ, ພ້ອມນີ້ ທ່ານໄດ້ຍົກຍ້ອງຄວາມພະຍາຍາມໃນການພັດທະນາສີຂຽວຂອງຈີນ ແລະ ຍ້ອງຍໍຊົມເຊີຍວ່າ ຈີນເປັນຕົວແບບທີ່ດີສໍາລັບປະເທດທີ່ປະເຊີນໜ້າກັບຄວາມທ້າທາຍດ້ານສິ່ງແວດລ້ອມ ຫລື ປະເທດທີ່ພວມເລັ່ງໃສ່ການພັດທະນາສີຂຽວ ແລະ ຍືນຍົງ.