ກອງປະຊຸມໃຫຍ່ ຄັ້ງທີ IX ຂອງຜູ້ແທນອົງຄະນະພັກເມືອງສຸຂຸມາ ແຂວງຈຳປາສັກ ໄດ້ໄຂຂຶ້ນຢ່າງເປັນທາງການ ໃນຕອນເຊົ້າຂອງວັນທີ 13 ມີນາ 2025, ຢູ່ສະໂມສອນເມືອງ ໂດຍການໃຫ້ກຽດເຂົ້າຮ່ວມເປັນປະທານຂອງສະຫາຍ ອາລຸນໄຊ ສູນນະລາດ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງໆຈຳປາສັກ, ສະຫາຍ ປະດິດ ວັນນະລັດສະໝີ ຄະນະປະຈໍາພັກແຂວງ ປະທານກວດກາພັກແຂວງ, ສະຫາຍ ສົມເພັດ ບຸດສະດີ ກຳມະການພັກແຂວງ ເລຂາຄະນະບໍລິຫານງານພັກເມືອງ ເຈົ້າເມືອງສຸຂຸມາ. ມີການນໍາແຂວງ, ອະດີດພະນັກງານອາວຸໂສບໍານານ, ການນໍາພະແນກການຂອງແຂວງ, ການນໍາ 8 ເມືອງ, ການນໍານະຄອນປາກເຊ ພ້ອມດ້ວຍຄະນະປະຈໍາພັກເມືອງ, ກໍາມະການພັກເມືອງ, ເລຂາຄະນະພັກຮາກຖານ, ເລຂາໜ່ວຍພັກບ້ານ ແລະ ຜູ້ແທນສົມບູນຈໍານວນ 185 ສະຫາຍ, ຍິງ 18 ສະຫາຍ ເຊິ່ງເປັນຕົວແທນໃຫ້ສະມາຊິກພັກໃນທົ່ວເມືອງ 2.302 ສະຫາຍ, ຍິງ 515 ສະຫາຍ ເຂົ້າຮ່ວມ.
ໂອກາດກ່າວເປີດກອງປະຊູມ, ສະຫາຍ ສົມເພັດ ບຸດສະດີ ໄດ້ກ່າວວ່າ: ກອງປະຊຸມໃຫຍ່ຜູ້ແທນອົງຄະນະພັກເມືອງສຸຂຸມາ ຄັ້ງທີ IX ໄດ້ໄຂຂຶ້ນໃນທ່າມກາງບັນຍາກາດທີ່ທົ່ວພັກ-ທົ່ວລັດ, ທົ່ວກຳລັງປະກອບອາວຸດ ແລະ ປວງຊົນລາວທັງຊາດ ໄດ້ສຸມໃສ່ການຈັດຕັ້ງປະຕິບັດມະຕິກອງປະຊຸມໃຫຍ່ຂອງພັກແຕ່ລະຂັ້ນຢ່າງເປັນຂະບວນຟົດຟື້ນ. ພ້ອມນີ້ກອງປະຊຸມໃຫຍ່ຜູ້ແທນອົງຄະນະພັກເມືອງຄັ້ງນີ້ ແມ່ນມີຄວາມສໍາຄັນຍິ່ງ ເຊິ່ງຈະໄດ້ພິຈາລະນາຕົກລົງຮັບຮອງເອົາທິດທາງ, ຄາດໝາຍສູ້ຊົນ, ແຜນວຽກຮອບດ້ານ ສໍາລັບການນໍາພາເມືອງສຸຂຸມາ ກ້າວຂຶ້ນສູ່ຄວາມເຂັ້ມແຂງ, ນໍາເອົາຄວາມຢູ່ດີກິນດີມາໃຫ້ປະຊາຊົນ, ພ້ອມນັ້ນ ກໍຈະໄດ້ເລືອກຕັ້ງເອົາຄະນະບໍລິຫານງານພັກເມືອງຊຸດໃໝ່ ເພື່ອສືບຕໍ່ນໍາພາ ພາລະກິດປະຕິວັດ ໃຫ້ກ້າວຂຶ້ນຢ່າງຕໍ່ເນື່ອງ ແລະ ໜັກແໜ້ນ ສູ່ຈຸດໝາຍທີ່ວາງໄວ້. ສະນັ້ນ, ຈິ່ງຮຽກຮ້ອງມາຍັງຜູ້ແທນກອງປະຊຸມທຸກສະຫາຍ ຈົ່ງເຊີດຊູຄວາມເປັນເຈົ້າການ ແລະ ຄວາມຮັບຜິດຊອບສູງ, ສຸມທຸກສະຕິປັນຍາເຂົ້າໃສ່ໃນການຄົ້ນຄວ້າ, ຕົກລົງບັນຫາສໍາຄັນໃຫ້ເລິກເຊິ່ງ ຖືກຕ້ອງ, ປະກອບສ່ວນໃຫ້ກອງປະຊຸມໃຫຍ່ຄັ້ງນີ້ ດໍາເນີນໄປດ້ວຍຜົນສຳເລັດຕາມລະດັບຄາດໝາຍ.
ໂອກາດນີ້, ສະຫາຍ ປອ ຄໍາໄຕ ແກ້ວປະເສີດ ຮອງເລຂາ ພັກເມືອງປະທານກວດກາພັກເມືອງ ຍັງໄດ້ຜ່ານຮ່າງລາຍງານການເມືອງທັງສອງພາກ ໂດຍຕີລາຄາໝາກຜົນການນໍາພາ – ຊີ້ນໍາວຽກງານຮອບດ້ານຂອງອົງຄະນະພັກເມືອງໃນ 5 ປີຜ່ານມາ ພ້ອມທັງຜ່ານທິດທາງແຜນການ, ຄາດໝາຍສູ້ຊົນ ແລະ ວຽກງານຈຸດສຸມໃນການນໍາພາແຕ່ນີ້ ຫາປີ 2029. ຈາກນັ້ນ, ສະຫາຍ ສົມສະໜິດ ສີສັງວອນ ຄະນະປະຈໍາພັກເມືອງຮອງເຈົ້າເມືອງສຸຂຸມາ ຜ່ານແຜນພັດທະນາເສດຖະກິດ – ສັງຄົມ 5 ປີ ຄັ້ງ ທີ VIII (2020 – 2024) ເຊິ່ງເສດຖະກິດຂອງເມືອງ ແມ່ນສືບຕໍ່ຂະຫຍາຍຕົວຢ່າງຕໍ່ເນື່ອງ ສະເລ່ຍ 6,9% ຕໍ່ປີ, (ແຜນ 7,7%), ສາມາດເຮັດໃຫ້ລວມຍອດຜະລິດຕະພັນຂອງເມືອງ ບັນລຸໄດ້ 3.446,89 ຕື້ກີບ, ທຽບໃສ່ແຜນປະຕິບັດໄດ້ລື່ນ 4,86% (ແຜນ 3.287,07 ຕື້ກີບ), ສະເລ່ຍຕໍ່ຫົວຄົນ 10.988.117 ກີບ ຫຼື ເທົ່າກັບ 700 ໂດລາສະຫັດຕໍ່ຄົນຕໍ່ປີ ເຮັດໃຫ້ໂຄງປະກອບເສດຖະກິດມີການປ່ຽນແປງຕາມທິດທີ່ຕັ້ງໜ້າເປັນຕົ້ນ: ຂະແໜງກະສິກຳເພີ້ມຂື້ນສະເລ່ຍ 5,12% ກວມ 52,22%, ຂະແໜງອຸດສາຫະກຳເພີ້ມຂື້ນ 9,66% ກວມ 25,56%, ຂະແໜງບໍລິການເພີ້ມຂຶ້ນ 8,33% ກວມ 22,22% ຂອງລວມຍອດຜະລິດຕະພັນ.
ນອກນີ້ ຜູ້ແທນກອງປະຊຸມຍັງຈະໄດ້ຮັບຟັງການປະກອບຄໍາເຫັນຂອງຄະນະພັກຮາກຖານບ້ານ, ຕົວແບບກຸ່ມການຜະລິດສິນຄ້າ ແລະ ຄອບຄົວຕົວແບບການຜະລິດກະສິກຳ; ຮັບຟັງການຜ່ານບົດສໍາຫຼວດການນໍາພາລວມ ຂອງຄະນະບໍລິຫານງານພັກເມືອງຕະຫຼອດໄລຍະ 5 ປີຜ່ານມາ. ຈາກນັ້ນ, ຜູ້ແທນກອງປະຊຸມໃຫຍ່ ຈະໄດ້ພ້ອມກັນໃຊ້ສິດປະຊາທິປະໄຕ ດຳເນີນການປ່ອນບັດເລືອກຕັ້ງເອົາຄະນະບໍລິຫານງານພັກເມືອງຊຸດໃໝ່ ເພື່ອເປັນຫຼັກແຫຼ່ງແກ່ນສານນໍາພາຈັດຕັ້ງປະຕິບັດມະຕິກອງປະຊຸມໃຫຍ່ຂອງພັກ ກໍຄືມະຕິກອງປະຊຸມໃຫຍ່ ຄັ້ງທີ IX ຂອງອົງຄະນະພັກເມືອງ, ແຜນພັດທະນາເສດຖະກິດ – ສັງຄົມຂອງເມືອງ ແຕ່ນີ້ຮອດປີ 2029.
ຕອນທ້າຍກອງປະຊຸຸມ ຍັງຈະໄດ້ຮັບຟັງການໂອ້ລົມໃຫ້ທິດຊີ້ນໍາ ຂອງ ສະຫາຍ ອາລຸນໄຊ ສູນນະລາດ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງຈໍາປາສັກ ຕື່ມອີກ
ກອງປະຊຸມໃຫຍ່ຜູ້ແທນອົງຄະນະພັກເມືອງສຸຂຸມາ ຄັ້ງທີ IX ຈະດຳເນີນໄປເປັນເວລາ 2 ວັນຈຶ່ງຈະສຳເລັດ
ຂ່າວ: ປະພິດ ສີສົມບູນ
ພາບ: ທ.ຈັນທະວີສັກ
