ຫວ່າງມໍ່ໆມານີ້, ທ່ານ ສີຈິ້ນຜິງ ປະທານປະເທດຈີນທີ່ພວມເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງກຸ້ຍໂຈ່ວ ໄດ້ເດີນທາງໄປບ້ານເຜົ່າຕົ້ງຈ້າວຊິງ ກິ່ງແຂວງເຜົ່າມົ້ງເຜົ່າຕົ້ງສຽນຕົ່ງໜານ ເພື່ອສຳຫຼວດຊອກຮູ້ຂໍ້ມູນເປັນການສະເພາະ. ຢູ່ໜ້າປະຕູໂຂງບ້ານເຜົ່າຕົ້ງ, ຊາວບ້ານທັງຫຼາຍທີ່ໃສ່ຊຸດຊົນເຜົ່າສວຍສົດງົດງາມ ໄດ້ຮ້ອງເພງປະສານສຽງເຜົ່າຕົ້ງເຊິ່ງເປັນມໍລະດົກວັດທະນະທຳນາມມະທຳຂອງມວນມະນຸດ ທີ່ສືບທອດມາຫຼາຍກວ່າ 2.500 ປີເພື່ອຕ້ອນຮັບທ່ານ ສີຈິ້ນຜິງ.
ວັນທີ 3 ກຸມພາ 2021, ເມື່ອຕອນເຄື່ອນໄຫວຢ້ຽມຢາມບ້ານຮວ້າອູ່ ທີ່ມີຊາວເຜົ່າມົ້ງເປັນຕົ້ນຕໍຢູ່ນະຄອນປີ້ເຈ ແຂວງກຸ້ຍໂຈ່ວ, ທ່ານ ສີຈິ້ນຜິງ ເຄີຍຍ້ອງຍໍວ່າ: “ເຄື່ອງປັກແສ່ວເຜົ່າມົ້ງມີຄວາມດັ້ງເດີມ ພ້ອມທັງມີເອກະລັກຕາມສະໄໝນິຍົມ”.
ວັນທີ 17 ມີນານີ້, ໃນການຢ້ຽມຢາມບ້ານເຜົ່າຕົ້ງຈ້າວຊິງແຂວງກຸ້ຍໂຈ່ວ, ທ່ານ ສີຈິ້ນຜິງ ໄດ້ຍົກໃຫ້ເຫັນອີກຄັ້ງໜຶ່ງວ່າ: ເຮືອນຮ້ານ, ບ້ານບູຮານ, ເຄື່ອງດົນຕີມໍລະດົກນາມມະທຳ, ການຮ້ອງເພງປະສານສຽງເຜົ່າຕົ້ງ, ເອກະລັກພິເສດຂອງຊົນເຜົ່າເຫຼົ່ານີ້ ແມ່ນເກົ່າແກ່ລຽບງ່າຍທັງມີເອກະລັກຕາມສະໄໝນິຍົມຫຼາຍ.
ການເຄື່ອນໄຫວຢ້ຽມຢາມແຂວງກຸ້ຍໂຈ່ວສອງເທື່ອ ໃນຮອບ 4 ປີຜ່ານມາ ໄດ້ສ່ອງແສງໃຫ້ເຫັນເຖິງການຄົ້ນຄິດຢ່າງເລິກເຊິ່ງຂອງທ່ານ ສີຈິ້ນຜິງ ກ່ຽວກັບການຫັນປ່ຽນ ແລະ ການພັດທະນາທີ່ມີລັກສະນະປະດິດສ້າງຂອງວັດທະນະທຳຊົນເຜົ່າ.
ວັດທະນະທຳຊົນເຜົ່າສ່ວນໜ້ອຍ ເປັນສ່ວນປະກອບທີ່ຂາດບໍ່ໄດ້ຂອງວັດທະນະທຳຈີນ, ເຊິ່ງບໍ່ພຽງແຕ່ໄດ້ບັນຈຸຄວາມຊົງຈຳທາງປະຫວັດສາດອັນເກົ່າແກ່ລຽບງ່າຍເທົ່ານັ້ນ, ຍັງມີຄຸນຄ່າໃນຍຸກປັດຈຸບັນທີ່ມີເອກະລັກແບບສະໄໝນິຍົມ. ການທີ່ຊຸກຍູ້ວັດທະນະທຳຊົນເຜົ່າສ່ວນໜ້ອຍໃຫ້ມີການພັດທະນາແບບປະດິດສ້າງຢ່າງບໍ່ຢຸດຢັ້ງນັ້ນ ຈະເຮັດໃຫ້ເອກະລັກພິເສດຂອງຊົນເຜົ່າພົ້ນເດັ່ນຂຶ້ນໃນການນຳໃຊ້ ແລະ ເປັ່ງລັດສະໝີໃໝ່ຢ່າງບໍ່ຢຸດຢັ້ງ.
