ໃນຕອນເຊົ້າຂອງວັນທີ 20 ມີນາ 2025, ກະຊວງການຕ່າງ ປະເທດ ໃນນາມຜູ້ປະສານງານແຫ່ງຊາດຂອງ ສປປ ລາວ ປະຈຳອົງການຝຣັງໂກໂຟນີສາກົນ (OIF) ໂດຍຮ່ວມກັບພາກສ່ວນຕ່າງໆ ກ່ຽວຂ້ອງ ໄດ້ຈັດພິທີທາງການ ເພື່ອສະເຫຼີມສະຫຼອງວັນຝຣັ່ງໂກໂຟນີສາກົນ 20 ມີນາ ປະຈຳປີ 2025 ຂຶ້ນ ພາຍໃຕ້ຫົວຂໍ້ “ຍົກສູງການຊອກຮູ້ຮໍ່າຮຽນດ້ວຍຕົນເອງ ເພື່ອສາມາດປະກອບສ່ວນເຂົ້າໃນການພັດທະນາສັງຄົມຢ່າງເຕັມສ່ວນ” ຢູ່ຫ້ອງປະຊຸມຫ້ອງວ່າການ ແຂວງສະຫວັນນະເຂດ.
ພິທີທາງການດັ່ງກ່າວ ໄດ້ດຳເນີນໄປໂດຍການເປັນປະທານຂອງ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງ ການຕ່າງປະເທດ. ມີການເຂົ້າຮ່ວມຂອງ ທ່ານ ໂພໄຊ ໄຂຄຳພິທູນ, ຮອງເຈົ້າແຂວງສະຫວັນນະເຂດ, ທ່ານຜູ້ຕາງໜ້າຈາກກະຊວງສຶກສາທິການ ແລະ ກິລາ, ທ່ານ ເອກອັກຄະລັດຖະທູດຝຣັ່ງ ປະຈໍາ ສປປ ລາວ, ບັນດາທູຕານຸທູດ ທີ່ໃຊ້ພາສາຝຣັ່ງ, ທ່ານ ຜູ້ຕາງໜ້າຫ້ອງການມະຫາວິທະຍາໄລຝຣັງໂກໂຟນີ (AUF), ບັນດາຄູ-ອາຈານ, ນັກຮຽນ ແລະ ນັກສຶກສາ ທີ່ຮຽນພາສາຝຣັ່ງ ເຂົ້າຮ່ວມປະມານ 300 ທ່ານ.
ໃນພິທີດັ່ງກ່າວ, ທ່ານ ທອງຜ່ານ ສະຫວັນເພັດ ໄດ້ມີຄຳເຫັນ ໂດຍຍົກໃຫ້ເຫັນເຖິງປະຫວັດຄວາມເປັນມາໃນການຮ່ວມຂະບວນການຝຣັງໂກໂຟນີ ຂອງ ສປປ ລາວ ພ້ອມທັງ ໄດ້ຍົກໃຫ້ເຫັນເຖິງການພົວພັນຮ່ວມມືກັບອົງການຝຣັງໂກໂຟນີສາກົນ ກໍ່ຄື ອົງການ OIF ແລະ ການເຄື່ອນໄຫວວຽກງານໂດຍສັງເຂບ ຂອງ ສປປ ລາວ ໃນຂອບວຽກຝຣັງໂກໂຟນີ, ໂດຍສະເພາະໃນການສົ່ງເສີມພາສາຝຣັ່ງ ແລະ ຄຸນຄ່າຂອງຝຣັງໂກໂຟນີ, ແລະ ໄດ້ຕີລາຄາກ່ຽວ ກັບສະພາບການນໍາໃຊ້ພາສາຝຣັ່ງ ໃນພາກພື້ນ ແລະ ໃນທົ່ວໂລກ, ໄດ້ຊຸກຍູ້ການເສີມຂະຫຍາຍການຮ່ວມມື ເພື່ອສົ່ງເສີມການຮຽນ- ການສອນພາສາຝຣັ່ງ ຢູ່ໃນພາກພື້ນອາຊີ-ປາຊີຟິກ ກໍ່ຄືຢູ່ ສປປ ລາວ, ລວມທັງການສົ່ງເສີມການສ້າງວຽກເຮັດງານທຳໃຫ້ແກ່ຊາວໝຸ່ມຍິງ-ຊາຍ ກໍ່ຄືຜູ້ທີ່ເວົ້າພາສາຝຣັ່ງ. ນອກຈາກນີ້, ຍັງໄດ້ຕີລາ ຄາສູງຕໍ່ການພົວພັນຮ່ວມມື ລາວ – ຝຣັ່ງ ກໍ່ຄືການພົວພັນຮ່ວມ ມື ຕະຫຼອດໄລຍະທີ່ຜ່ານມາ ໃນຫຼາຍຂົງເຂດວຽກງານ ໃນນັ້ນລວມທັງການສົ່ງເສີມການຮຽນ-ການສອນ ພາສາຝຣັ່ງ ຢູ່ ສປປ ລາວ.
ໃນໂອກາດດຽວກັນນີ້, ທ່ານ ຮອງເຈົ້າແຂວງສະຫວັນນະເຂດ ແລະ ທ່ານ ເອກອັກຄະລັດຖະທູດຝຣັ່ງ ປະຈຳ ສປປ ລາວ, ຕ່າງກໍ່ໄດ້ປະກອບຄໍາເຫັນ ໂດຍໄດ້ຊີ້ໃຫ້ເຫັນຄວາມສໍາຄັນໃນການສະ ເຫຼີມສະຫຼອງວັນສຳຄັນດັ່ງກ່າວ, ພ້ອມທັງລາຍງານກ່ຽວກັບການເຄື່ອນ ໄຫວວຽກງານໃນຂອບເຂດຄວາມຮັບຜິດຊອບຂອງຕົນ ແລະ ການປະກອບສ່ວນຢ່າງຕັ້ງໜ້າ ເຂົ້າໃນການສົ່ງເສີມການພົວ ພັນ ແລະ ການຮ່ວມມືໃນຂອບວຽກງານຝຣັງໂກໂຟນີເວົ້າລວມ ແລະ ເວົ້າສະເພາະແມ່ນໃນຂອບການສົ່ງເສີມການຮຽນ-ການ ສອນພາສາຝຣັ່ງ ຢູ່ ສປປ ລາວ.
ສປປ ລາວ ໄດ້ເຂົ້າເປັນສະມາຊິກສົມບູນຂອງອົງການຝຣັງໂກໂຟນີສາກົນ ໃນປີ 1991 ແລະ ກໍໄດ້ປະກອບສ່ວນຢ່າງຕັ້ງໜ້າ ໃນການເຄື່ອນໄຫວວຽກງານຕ່າງໆຂອງອົງການດັ່ງກ່າວ, ລວມທັງການຮ່ວມມື ໃນການສົ່ງເສີມພາສາຝຣັ່ງ, ຄວາມຫຼາກຫຼາຍທາງດ້ານວັດທະນະທຳ, ການຮ່ວມມືດ້ານເສດຖະກິດ ແລະ ດິຈິຕອນ. ສປປ ລາວ ໄດ້ດຳເນີນການຮຽນ-ການສອນພາສາຝຣັ່ງ ຢູ່ນະ ຄອນຫຼວງວຽງຈັນ ແລະ ຢູ່ 3 ແຂວງ ຄື: ຫຼວງພະບາງ, ສະຫວັນ ນະເຂດ ແລະ ຈຳປາສັກ. ພາສາຝຣັ່ງ ແມ່ນໄດ້ຮັບການສົ່ງເສີມ ແລະ ນຳໃຊ້ ຢູ່ໃນຂະແໜງການສຶກສາ ແລະ ສາທາລະນະສຸກ, ໂດຍສະເພາະແມ່ນໄດ້ມີການສົ່ງເສີມການຮຽນ-ການສອນພາສາຝຣັ່ງ, ການຝຶກອົບຮົມຄູ-ອາຈານ ແລະ ການພັດທະນາຫ້ອງຮຽນສອງພາສາລາວ-ຝຣັ່ງ ໃນລະດັບປະຖົມ ແລະ ມັດທະຍົມ, ລວມທັງໃນສະຖາບັນການສຶກສາລະດັບສູງ.
ນອກຈາກນີ້, ຍັງໄດ້ມີການຮ່ວມມືໃນຂົງເຂດອື່ນໆ ເຊັ່ນ: ສາທາ ລະນະສຸກ, ເສດຖະກິດ, ການຄ້າ, ການລົງທຶນ, ວັດທະນະທໍາ, ສື່ມວນຊົນ, ການພັດທະນາ, ເຕັກໂນໂລຊີຂໍ້ມູນຂ່າວສານ ແລະ ອື່ນໆ.
ອົງການຟຣັງໂກໂຟນີສາກົນ (OIF) ແມ່ນອົງການຈັດຕັ້ງສາກົນລະຫວ່າງລັດຖະບານ ທີ່ເຕົ້າໂຮມເອົາບັນດາປະເທດຕ່າງໆ ທີ່ໃຊ້ພາສາຝຣັ່ງ ເຂົ້າດ້ວຍກັນ, ສ້າງຕັ້ງຂຶ້ນໃນວັນ 20 ມີນາ 1970, ຊຶ່ງໃນເບື້ອງຕົ້ນມີຊື່ວ່າ ອົງການຮ່ວມມືທາງດ້ານວັດທະ ນະທໍາ ແລະ ເຕັກນິກ (Agence de Cooperation, Culturelle et Technique ຫລຶ ACCT ), ເຄື່ອນໄຫວທາງດ້ານການຝຶກອົບຮົມວິຊາຊີບ ແລະ ເຕັກນິກ ແລະ ດ້ານວັດທະ ນະທໍາ, ມາຮອດປີ 2005 ຈຶ່ງໄດ້ປ່ຽນຊື່ມາເປັນ ອົງການຟຣັງໂກໂຟນີສາກົນ (Organisation Internationale de la Francophonie ຫລື OIF), ມີສະມາຊິກທັງໝົດ 93 ປະເທດທີ່ຢູ່ໃນ 5 ທະວີບຂອງໂລກ, ມີສຳນັກງານໃຫຍ່ຕັ້ງຢູ່ນະຄອນ ຫຼວງປາຣີ, ປະເທດຝຣັ່ງ.
